АЙЪАЗАГIВ ЙНЫХА ДАЗЦIАБЫРГПI

ЙанакIвызлакIгьи арыпхьагIв йгьи айъазагIв ръачIвагIаква зымгIва рацкIыс абзазара йатахъыта йырпхьадзун. Ари йапшу ахъвыцра ужвы йъагIадзазгьи ауагIа рдунейпшыща йгIалахатI. ЙалкIгIата, амедицина тшадызкIылра змурадугьи, йгIалызххьазгьи ауи шуыс майрам, джьауапкIра ду шапщылу, чхIара шатахъу гIайгвынгIвра амагIны дупI. УахьчIва сгIазквчважвуш апхIвыспа аъачIвагIа гIалхра лгвы аквкIта дадгылтI. Ауи багъьата йщаквлыргылтI айъазагIвта дапхьарныс, ауагIа, ачымазагIвква рызгIвадара ахчара дазынхарныс шылтахъу. КВАСА Джьамильа Черкесск йцбахауа аквтанай апхьарта асквш 2007 дангIалга амщтахь ЙазакIу акъральыгIва рхъвыхраква дахIврала йылкIын, Москва йтагылу ауагIахъаква райгвара университет (РУДН) «Лечебное дело» факультет апхьара дыцIалтI. АпхIвыспа йшылхIвауала, йапхъахауа акурс агIан зымгIва лызшIыцын, йлымаджьащахъван, абаргвыраквагьи гьмачIмызтI. Ауи апхъала йлымбасыз бзазара далашватI. Акъала ду абзазара уцри шта уанаъу, уцриква зымгIва ансимшы йанубауа йгьапшым. Москва ауагIа рдунейпшыщагьи, рбзазащагьи, рхъвыцщагьи датшапI, араъа зымгIва гвжважвагIваракI рылата йнагIвгIагIвитI. Ауаса Джьамильа закIгьи швара гьгIалыланамцIузтI. Ауи апхьара сахIатква йызпхьауа йырхъазымкIвагьи дашIамсуа лхъа дадынхалуан, апхьара гьахълымрыпузтI, абиблиотека сахIат пхьадзарала дыгIвнанхун. Джьамильа запыт ларгванкви лцрикви гIалгвалашвалун, лгвы ауыла йаъан. МачI-мачIымца ауи араъа абзазара дащцахтI, агIвзачва шIыцква лаутI. Йхпахауа акурс данахъыс амщтахь лбзазара зпылщылуаш нархаракI – офтальмолог, акушер, невролог – гIалылхра атахъын. – Апхъапхъа сшхъвыцуазла неврологта сапхьара насырдзарныс стахъын. УадыргIвана офтальмолог ъачIвагIа рыцIа йшсаргвану, йышсгвапхауа гIасгвынгIвытI. Ауи ахIатырла, офтальмологта сапхьара насырдзахырныс щаквсыргылтI,– лхIвитI апхIвыспа. Джьамильа офтальмология йазынарху зымгIва бзита, лгвы аквкIта йыллырдыруан. Ауи йгIалылхыз аъачIвагIа амадзаракви акъвышракви ллырдырра лмурадта шIыцрата дзынйуз зымгIва азгIашыкъра лымата дадгылуан. АпхIвыспа лдырраква лрыцIолара дшащту зылазхIвуз арыпхьагIвчва тшыбжьара дахъысырныс алаква йырпщылу азгIваквала афедеральна наука-рхъвыхра институт (ФГБНУ НИИ глазных болезней) дырщтитI. Астудент здырраква цIолу йгьи швапха байа зырхIаз айъазагIвчва гвыбзыгъа гвып дрыднагалтI. Араъа Джьамильа анхара абгата тшалттI. АйъазагIвчва закIгьи лагъьарымщауа рдырраква лыцагIвыршун, анхара апны амальта йгIарысабап ауашла, ачымазагIв ушицхърагIушла йлылабжьун. ДасузлакIгьи апхIвыспа лынхара апны йгIалыхъвахуаш акъвышраква лыцагIвыршун. Ларгьи ахIбачва ргвыгъараква гIалырцIабыргуата, гвнымгIвыра кIара дашIашвузтын дырцIгIун, швапха шгIархъылхуаш дащтан. – Сара атшыбжьараква съадзархъысуаз азцIгIаракI сымазтын, йа закIы счвыбаргвызтын, тшыззынасырхушыз ахIба айъазагIвчва аъан. Ауат зынгьи гватрадъа сазцIгIаракIгьи гьгIанырымжьтI, дзачIвызлакIгьи гвышхвара гIасылайцIун. Ауи йгIалцIла саргьи сынхара рахIа-рахIа йсымаджьащахъвахун,– лхIвитI атшыбжьараква дшырхъысыз гIалгвалашвахуата Джьамильа. ЗхъвдаквцIараква йнардзата йзырхъйуз, ауыс адгылща здыруаз апхIвыспа атшыбжьараква данрылга амщтахь йара ауаъа дынхарныс дгIанырыжьхтI. АйъазагIв шIа араса йъалызхъарцIаз дайгвыргъьун, лджьауапкIра рахIагьи йалахIауа дынхауа далагатI. Амедицина апны ацкьара зымгIва йрапхъапI. Джьамильа йлыцынхауа йшырхIвауала, ауи цкьарала заджвгьи дгьлайгIайуашым, лынхара бзи йылбитI, гвчIагIвра лылапI. Ауаса, лара апхIвыспа, ачымазагIв йгвы унадзара, йхьыгIа йалзырдзгIуш амальква йрыцта ажва гвапа гIаурагьи зымгIва йрапхъата йылпхьадзитI. – АчымазагIв йызгIва уайъазара, ахъвшвква йыдгалра йырхъазымкIвагьи, айъазагIв йажвагьи хвышхвата йзычпара сынхара апны хъадата йспхьадзитI, –лхIвитI ауи. Дара ачымазагIвквагьи айъазагIв шIа швабыжта йылзыразпI, азгIва рхъызраштылхуа Джьамильа ажва гвапаква лзыгIанадырхитI, абзираквала йлызхIвахIвитI. Ауат йырхъазымкIвагьи Джьамильа дызлу агвыпгьи лзыразпI, лынхара йнардзата йъалырхъйауа ахъазла пIатIу лыквырцIитI, кьангьашракI йа цхърагIаракI дазыбжазтын йлыцыркIитI. Ансимшы Джьамильа лнашх щтIыхта бзи йылбауа анхарта дцитI. Ауи йлызпшуа ауагIа рхьыгIа йалырдзгIара лмурадта лынхара дадгылитI, йара ауаса лнашх пшдзата амш аурала ачымазагIвква руысква аллыргитI, лхъа дазыразта лбзазарта дадгылхитI. АпхIвыспа лъачIвагIала дъамгIващаз, лгвы йацчпу ауыс дъадкIылу насыпрата йылпхьадзитI. Ауи йшылхIвауала, айъазагIв ъачIвагIа гIалызхыз дзачIвызлакIгьи Гиппократ йквра йамайжьауата, руыс ацIыхъва йнадырдзауата йынхара атахъыпI. УахьчIвала Кваса Джьамильа алаква йырпщылу азгIваквала НИИ дынхауищтара хысквша цIитI. Ари азаман айшыс ауацIа айъазагIв шIа лара лшвапхагьи лырхIахьатI, йапхъахуз амшква рагIан йылчвыбаргвыз айъазара уысквагьи лзымайрахатI. Ауи ансимшы лхъа дадынхалра атахъыта йылпхьадзитI, ауи агIан абзазара йгIалалуа ашIыцраква зызгIарысабапуа дшайъазагIвхуш лрыбагъьитI. Джьамила дызлу агвып апны зымгIва драйцIбазтынгьи, закIылагьи дгIархьымшвауата дынхитI. «Бзи йубауа уъачIвагIала уанынхауа уджьауапкIрагьи йухауа ауыс асабапрагьи рахIагьи йдухитI», – лхIвитI мурад бзи шарда зму хIхаквлагIв, зхъагвы акву айъазагIв шIа Кваса Джьамильа.