АУЫЖВГIАНЧIВИ ЗАМАН ЙАКВДЫРГIАПСИТI

КЧР Ажвлара палата апны «Арыпхьара» уагIахъа проект хIреспубликала йшырхъйахауа йазынархаз алачIвара акIвшатI. Ажвлара палата йалу йырхъазымкIва, алачIвара йгIадрайгватI арыпхьарали наукали КЧР аминистр КРАВЧЕНКО Инна, КЧР а-Хъади а-Правительстви р-Администрация аунашвачпагIв йзаместитель СЕМЕНОВ Ахмат, наукала, арыпхьарала, культурала, спортла йгьи чкIвыныргIа руысквала КЧР а-Парламент акомитет апредседатель ГАНШИН Алексей, Черкесск город амэрия арыпхьарала аунашвачпарта знапIыцIу йзаместитель СЛОБОДЧИКОВА Наталья. АлачIвара акIвзыршаз КЧР Ажвлара палата апредседатель МОЛДОВАНОВА Вера ажва зылтыз арыпхьарали наукали КЧР аминистр Кравченко Инна йапшым анархараквала «Арыпхьара» уагIахъа проект абзазара йшаларжьуа йауацIыхта даквгIашIастI. – «Арыпхьара» уагIахъа проект апкъ йтата агIпроекткI лыхIхтI, ауат йрыуапI «УыжвгIанчIви апхьарта», «Сабипхьадза йдахIвра», «Саби зму атгIачваква йрыцкIра», «ЙгIайуа азаман арыпхьагIв», «Асоциальна джьгарра» датшагьи, – лхIватI аминистр. – Ареспублика проектква хIырхъйара ахъазла афедеральна бюджет ахча гIаунащтырныс цангIалракI хIчпатI йгьи асквш 2019 агIан хпроекткI сом мильуан 412,9 рзынахIырхатI. Асквшква 2020–2022 руацIала абзазара йалагIжьуаш апроектква рыхъазла субсидията йхIзалырхуаш йазынархата агIангIалракI хIчпатI, йшалу ауат сом мильуан 2066,71 гIарыцIаркIитI. Кравченко Инна йшгIалылкIгIазла, арыпхьарала РФ а-Министерства йрыдырчпалыз ангIалра апкъ йтата асквшква 2019–2021 руацIала хIреспублика апны сабигIзартата 13 руыхвуштI. Ауат йрыуапI АлбыргIан кыт апны – 80-гIв, ВакIважьыльа кыт апны 80-гIв йырзалху асабигIзартаква. «УыжвгIанчIви апхьарта» проектла асквшква 2020–2022 руацIала тыпта 1525 зму хапхьартакI руыхвуштI. – Ауаса хIреспублика апны сквш 50 айхIала утхъахырквын йыруыхваз асабигIзартакви апхьартакви гьмачIым, ауат шажвыз гвынгIвырапI, – лхIватI ауи. – Акыт апхьартаквагьи рылата капитальна рчIаджьра йазыбжу щардапI. Арыпхьарали наукали КЧР аминистр асквш 2020 йгIашIарышвта хIреспублика апны «Земский учитель» федеральна программа абзазара йшаларжьуа даквгIашIастI. СынчIва ауи апрограмма 27-гIв гIаланакIуаштI. УахьчIвала акыт йынхарныс зтахъыта ахIвара швъа згIвыз 60-гIв йнадзитI. Асквш 2022 агIан апрограмма 22-джь аланакIуаштI. «УыжвгIанчIви апхьарта» проектла асквш 2021-дза кыт апхьартата 72 рпны ацифра йгьи агуманитар дырраквала «Точка роста» квтаква гIахъыртIуаштI. ЙагIвсыз асквш агIан йгIахъыртIыз 19 квтакI рпны апхьагIвчва ауыжвгIанчIви технологияквала йадрыпхьитI. Асквш 2020 агIан «Точка роста» квтаква 42-ла йгIарылахIуштI, асквш 2021 агIан датшагьи 11 гIахъыртIуаштI. Аквтаква рпны технологияла, ОБЖ-ла, информатикала арыпхьагIвта 96-гIв атшыбжьараква йырхъыстI. Кравченко Инна апычIв классква рапхьагIвчва фачIв пхала йадгалрагьи даквгIашIастI. – РФ а-Президент Путин Владимир йхъвдаквцIараква рыпкъ йтата асквш 2020, сентябрь а 1 угIалагата асквш 2023, сентябрь а 1-дза тлахантлахан й-1-хауа–4-хауа аклассква рапхьагIвчва хвыдъа фачIв пхала йадгалра хIазцуштI, – лхIватI ауи. – ХIреспублика апны апычIв классква рапхьагIвчва 23050-гIвы йнадзитI. Асквш 2020, сентябрь а 1 угIалагата асквш 2020, декабрь а 31-дза ауат рчара адгалра ахъазла афедеральна бюджет сом зыкь 91806,9 гIаунащтуаштI, ареспублика бюджет – сом зыкь 21885,8. Акласс унашвачпагIвчва руысгьи схIвара стахъыпI. УахьчIвала ауат 3077-гIв йнадзитI. Асквш 2020, сентябрь а 1 угIалагата ауат рынхаша сом хвынзыкь гIалахIитI. Аминистр лгIачважвара амщтахь ареспублика Ажвлара палата йалу йызлачважвауа ауысла ргвгIанагракви ражванахъакви рхIватI. Араса Лагъь-КIавкIаз къральыгIва академия аколледж адиректор Гурина Ирина аквтанай апхьартаква рпны акласс унашвачпагIвчва ракIвымкIвагьи рколледж йапшу апхьартаква рпынгьи агвыпква йырхъпшылуа рахча йгIацлырквын штамамызлуш лхIватI. – Аколледжква рпны йапхьауа рызбжа айхIа й-9-хауа акласс йгIацIцIыз ракIвпI, – лхIватI ауи. – Ауат йрыуу агвыпква йырхъпшылуа арыпхьагIвчвагьи рахча йгIацырцIарныс рквнагазшва йызбитI. Кравченко Инна аколледж аунашвачпагIв йылхIвауа дадгылтI йгьи ауи ауыс афедеральна квта апны йшадынхалуа гIалылкIгIатI. АлачIвара йалаз ацри бызшваква рарыпхьара шадыргалуа ушамрыразуагьи рхIватI. «РФ а-Президент йпны йгIаныршу ауагIа млыкврхIарала йгьи къральыгIва къвырльыкъвхарала Россия академия» йхIаракIу дыррала акъральыгIва нхарта а-Лагъь-КIавкIаз институт хъвшара адиректор Тльыс Азамат ацри бызшва рдырра акоммерция йалам аорганизацияква гIаланаркIрала ажванахъа гIайгтI. Ари алачIвара апны датшагьи уыскI йалапштI: КЧР Ажвлара палата ахьызла РФ Ажвлара палата йалазлуш. ЗымгIвагьи йацшIакIта Тльыс Азамат РФ Ажвлара палата далазларныс йквнадыргатI.