АУЫЖВГIАНЧIВИ ДЖЫПХА ЙТАГЫЛАТА ЙЫНХИТI

Арыпхьара сквш шIыц йапылуата Абаза район администрация апны арыпхьагIвчва ралачIвара август а 26 йакIвшатI. Ауи йалан апхьартаква, асабигIзартаква, аршIыйара Квта рунашвачпагIвчва. Абаза муниципальна район администрация ахъада КIВЫЖДЗА Руслан Мурат йпа алачIвара гIахъитIуата арыпхьара анхагIвчва апхьара сквш шIыцла драйхIвахIвтI, згIвадара багъьа, чхIара рымата, апхьагIвчва рдахIвраква щардата йынхарныс шырзитахъу райхIвтI. ЙагIвсыз асквш ауацIа арыпхьара нхартаква рпны йыззынадзаз гьмачIым. Арайон администрация ахъада цIыпх згIарбараква бзийыз анхагIвчва йгIарквнадыргаз артшхъвагаква риттI: Арыпхьарала йгьи наукала КЧР а-Министерства ачIахIра грамотаквала рынхара гIалыркIгIатI Псыжв йапхъахауа Гимназия ангьльыз бызшвала арыпхьагIв АБЫТI Валентина МухIаджьыр йпхIа, Къарапагва арыпхьара Квта технологияла арыпхьагIв ХВЫТI Марина Заудин йпхIа, АлбыргIан квтанай апхьарта историяли обществознаниели арыпхьагIв МЕРЕМКЪВЫЛЬ Майя ХIазраъиль йпхIа. Абаза район администрация ахъада йграмотаква гIарквнадыргатI Псыжв йапхъахауа Гимназия йгьи «Алашара» сабигIзарта рынхагIвчва гвыпква, Къвбина квтанай апхьарта информатикала арыпхьагIв ГУЛЯЕВА Инна Иван йпхIа, Псыжв йгIвбахауа апхьарта информатикала арыпхьагIв КЪАРМА Людмила Борис йпхIа, Абаза районла «Асаби ршIыйара Квта» аметодист МЕРЕМКЪВЫЛЬ Юлия Рамазан йпхIа, ЙынджьыгьчкIвын квтанай апхьарта апедагог-адгалагIв БЫДЖЬ Людмила Бита йпхIа. Абаза район арыпхьарала йгьи культурала а-УнашвахъцIарта знапIыцIу МАРТАЗА Зимфира МхIамат йпхIа арайонла арыпхьара апны псахрата йыншаз йауацIыхта дгIаквчважватI: – Апхьара сквш шIыц хIапылуата ансисквша йадыгIгалуа айззараква рпны хIыззынадзаз йгьи хачIвыта йхIпыру хIаквчважвитI. УахьчIва хIайчважварагьи ззынарху йагIвсыз апхьара сквшы агIарбараква, апхъахьыла хIыздынхалуаш ауысква ракIвпI. Абаза район арыпхьара нхартаква рпны жваба йнадзауа афедеральна уагIахъа проектква рыуа пщба абзазара йалагIжьитI: «Демография», «Современная школа», «Успех каждого ребенка», «Цифровая образовательная среда». «Демография» проект асабигIзартаква рпны йайцIбадзу агвыпква рыхъазла атыпква рпхьадзара йалархIара йазынархапI. ХIрайон ауацIала 3–7 сквша йырту асабиква рыхъазла кьазу гьаъам. ХачIвыта хIпахь йгылу хысквша йайцIбу асабиква раныргIалра акIвпI. АуагIахъа проект апкъ йтата АлбыргIан кыт апны тып 80 зму асабигIзарта-ясля ауыхвара йалгатI. СынчIва октябрь агIан ауи агIахътIра хIайгвгъитI. Ауи анархарала гвбжара ъахIыму Къвбина кытла акIвпI. ХIгвыгъитI ауаъагьи сабигIзарта шIыц гIаншарныс. Псыжв апны хысквшадза йырту агвып йаланакIуа асабиква ркьазу ужвыгьи йаъаркIвапI. Ауаъа ахIабльа шIыц ласыта тшъауацIнахуа йгIалцIла акытла йхпахауа сабигIзарта уыхвара атахъыпI. СынчIва ЙынджьыгьчкIвын йгьи АлбыргIан сабигIзартаква рпны сквшыкIи бжакIи угIалагата йырту асабиква анхIыргIалтI, Псыжв апны – гIвысквши быжьмызкIи йырту рпны йгIашIарышвта. ХIызту аъаща йшгIанарбауала, апхьарта йыцIамылс асаби йтахъу нахъауата дгIадзынгылра ахъазла асабиква ранрабачвагьи рыдынхалрала амальква псахра атахъыпI. Ан-абачва абжьара уысквала рдырраква агъьчIвра ахъазла «Саби зму атгIачваква цхърагIара рзадгалра» проект апкъ йтата акьангьашра квтаква гIандыршатI. УахьчIвала хIреспубликала кьангьашра квтата хпа нхитI. Ауат йрыуапI «Мамонтенок» сабигIзарта апны йаныргIалугьи. Ауат ангIалра рыдхIчпалын, ан-абачва азцIгIара анрыму аъачIвагIагIвчва тшырзынадырхитI. ЙагIвсыз асквш асабигIзартаква рунашвачпагIвчвагьи рбжьагIвчвагьи джьгарта йапшым анкъвакъвраква йрылан. Псыжв «Алашара» сабигIзарта хIкъраль ауацIала йакIвшаз «Лучшие детские сады России 2021» анкъвакъвра йапхъагылагIвхатI. Ари апш гIатгара йазынадзаз асабигIзарта анхагIвчва гвыпи рунашвачпагIв Ачбокъва Зурида СултIан йпхIи аразыра ажваква рзынахIырхитI. ХIреспубликала йакIвшаз «Асквш абжьагIвы» анкъвакъвра апны Абаза район дащтийыгIвта далан «Звездочка» сабигIзарта абжьагIвы Агырба Льильа. «Аленушка» сабигIзарта аунашвачпагIв Ажьи Оксана Рамазан йпхIа хIрегионла йакIвшаз ацри бызшваква ргIахчара йазынархаз асеминар-айчважвара далан. Апроект апкъ йтата «Современная школа» нархарала апхьарта шIыцква руыхвитI, ауат йыззыбжу аъамапсымаквала йадыргалитI, аспортзалква дырчIаджьитI. ХIрайон апны сынчIва йалаган йшварагIвару аъаща йтаз Псыжв йапхъахауа Гимназия дырчIаджьитI. Ауыхвараква йрылгарквын, асабиква кьазукIта йапхьарныс рылшуштI. Йара ари апроектла пщапхьартакI рпны «Точка роста» квтаква рынхара джвыквырцIатI. Ауаъа информатика, технология, ОБЖ предметквала асабиква йрыдынхалитI, робот техникала йгьи шахматла акружокква гIандыршатI. Абаза районла йынхауа «Точка роста» квтаква рпны йыздынхалуа асабиква рпхьадзара 286-гIвы йнадзитI, ауат йрыуата «Шахматы» программа 155-гIв гIаланадыркIтI. Псыжв йгIвбахауа апхьарта йаныргIалу «Точка роста» Квта «Технология» предметла Россия ауацIала йакIвшаз йхътIу онлайн-апхьара сахIат джьгарта йалан, арыпхьарала Россия а-Министерства йгIалнакIгIатI. Апхьара сквшы ауацIа Псыжв йапхъахауа Гимназия апны анаука-технология нархараквала Квта гIахъхIтIуаштI. Ауи ахIатырла апхьарта кабинетта гIвба йгьи лаборатория пещта гIвба дырчIаджьтI. Физика, химия, биология предметквала асабиква разыгIальаматра йалархIара ахъазла акабинетква уыжвгIанчIви ъамапсымала йадгалазлуштI, апхьагIвчва знадзара хIагIу архъвыхракви атшыбжьара нхаракви акIвдыршарныс рылшуштI. Апроект йаланакIуа «Успех каждого ребенка» программа арайон йауата хвапхьартакI йгьи «Асаби ршIыйара Квта» алалтI, апхьартаква дара йгIалырхыз анархараквала йынхитI, ауат апхьагIвчва апхъахьыла йыръачIвагIахуш агIалхра йацхърагIитI. СынчIва арыпхьарала йгьи культурала хI-УнашвахъцIарта аъачIвагIагIвчва «Точка роста» йгьи «Успех каждого ребенка» нархарала йынхауа акружокква шадгалу, апхьартаква ауыжвгIанчIви ъамапсымаква шгIадрысабапуа, асабиква азыгIальаматра ззрыму дырхъвыхуаштI. «Цифровая образовательная среда» программала арайон апхьартаква зымгIва ласыта йынхауа Интернет рызкIылыгIгатI, Къвбина апхьарта йгьи Псыжв йапхъахауа Гимназия ауыжвгIанчIви ъамапсымаква гIарадзахьатI, арахьарат апхьартаквагьи уыжвгIанчIви ъамапсымала йадгалазлуштI. Апхьара сквш шIыц апны ужвыгьи йджьащахъву проекткI – «Кванториум-09» – абзазара йалалуаштI. ХIреспублика ауацIала йайтыпауа технопаркта гIвба апхьартаква йакIвшуштI. Абаза районла ауи Псыжв йгIвбахауа апхьарта апны йынхуштI. Йаргвану апхьартаква рсабиква ауаъа йгIарглуштI, асквш ауацIа 2–3 нархарала 170-гIвы апхьарныс рылшуштI. Россия Федерация а-Президент Путин Владимир йгIаджвыквцIарала асквш 2022 угIалагата апхьартаква рырчIаджьра злакIвдыршуш апрограмма джвыквылуаштI. Ауи апрограмма хIрайон йауата хапхьартакI алалуаштI – Къвбина, АлбыргIан йгьи Псыжв йапхъахауа Гимназия. Анахьанат апхьартаквагьи апхъахьыла ари апрограмма йшаларцIуш ацIыхъва хIтагылуаштI. Арыпхьара нхартаква рпны псахрата йыншауа зымгIва ззынарху асабиква рапхьаща агъьчIвра акIвпI. Россия а-Президент йунашвала уахьчIва джьгарта абзазара йалалитI арыпхьара анадзара зладырхъвыхуаш ашвагаква. СынчIва октябрь агIан «Рособрнадзор» ахачIвква йрылапI й-6-хауа – й-8-хауа аклассква рпны НИКО (Национальные исследования качества образования) рхъвыхраква ракIвыршара. Ауат архъвыхраква рпны апхьагIвчва компьютер гIадрысабаплуштI. Асквш 2020 сентябрь – октябрь йгьи асквш 2021 мартI угIалагата майдза йпщбахауа – йжвизхауа аклассква рапхьагIвчва архъвыхра нхараква (Всероссийские проверочные работы ВПР) ргIвытI, рдырраква дырхъвыхтI. Архъвыхра агIарбараква апхьартаква, арыпхьагIвчва йгьи ан-абачва рыхъазла рмагIны дупI. АрыпхьагIв апхьагIвчва рдырраква рыцIа йъальальу йзыбитI, апхъахьыла дыздынхалуаш, йынхара ззынайырхуш йдыритI. АпхьагIвчва рдырраква гIазырцIабыргуа ГИА (Государственная итоговая аттестация) акIвпI. ЙагIвсыз апхьара сквшы апны хIрайонла 100- гIвы й-9-хауа акласс йгIалгатI, ауат йрыуата 10-гIвы – «хвбала». Й-11-хауа акласс 28-гIв гIалгатI, ауат йрыуата 5-гIвы йазалху аттестат гIарквнадыргатI. СынчIва ЕГЭ мыгIвхъгаракIгьи аъамкIва йакIвшатI, ауи акIвыршара йалаз арыпхьагIвчва, атехника ъачIвагIагIвчва, экзамен ъаркIуаз апункт аунашвачпагIв йнардзата рхъвдаквцIараква ъадырхъйаз сырзыразпI. Асабиква рарыпхьара апны гыларта хъада зму арыпхьагIв йакIвпI. «Образование» уагIахъа проект апкъ йтата арыпхьагIв йдырра йалархIара, йыхв щтIыхра йазынхитI «Учитель будущего» федеральна проект. Ари апроект шIыцракI гIалалтI – сынчIва уалагата арыпхьара нхартаква рунашвачпагIвчва раттестация джыпха шIыцла йакIвшуштI. Эксперт гвып йалу архъвыхраква злакIвдыршуш агIарбараква 20 йнадзитI. АунашвачпагIв йынхаща ацIыхъвагIарбараквала аунашвачпагIвчва ррейтинг щаквдыргылуаштI. Арыпхьарала йгьи культурала а-УнашвахъцIарта апны ари ауысла анхара хIалагахьатI. Сентябрь ауацIа Абаза район йаланакIуа арыпхьара нхартаква рунашвачпагIвчва рынхащала ауи апш швъа хIрыхIазыруаштI. СынчIва сентябрь а 1 угIалагата апхьартаква зымгIва рпны «Программа дополнительного образования» абзазара йалалитI. УахьчIвала «Навигатор» портал уталырквын, кружокта, секцията йаъу, ауат рпрограммаква тшрыхауыргIваза ауитI, апхьагIвчва ранрабачва рыцта йыргвапхауа гIалырхта асквш ауацIа рдырраква, рылшараква йрыладырхIа ауаштI. Арат ауысквала нхара ду акIвдыршитI Абаза район «Асаби ршIыйара Квта» анхагIвчва. ЙагIвсыз апхьара сквшы ауацIа апычIв классква рапхьагIвчва хвыдъа йдырчатI. Асабиква йрадзауа афачIвква рнадзара зырхъвыхуа «Родительский контроль» комитетква апхьартипхьадза йынхатI.  Къвбина квтанай апхьарта арыпхьарали абжьара уысквали адиректор йзаместитель ХIВЫРЙА Альбина Мурид йпхIа йагIвсыз апхьара сквшы апны псахрата йыншази дахIврата йрымази алачIвара йалаз ахалыргIвазатI. Ауи апхьарта апны айсра-патриот нархарала уыс щарда шакIвдыршауа гIалылкIгIатI. «Алашара» сабигIзарта аунашвачпагIв АЧБОКЪВА Зурида СултIан йпхIа апхьартаква йгIархьымшвауата гвыргъьахъв щарда шадыргалуа гIалхIватI. АсабигIзарта абжьагIвчва асабиква рцри бызшва дырдырра гватра шазалырхауа, абаза цIасква йшрыхадыргIвазауа, ауи ауысла нхарата йакIвдыршауа айззара йалаз йрыцагIвылшатI. Йара ауи атшын АлбыргIан квтанай апхьарта апны Абаза муниципальна район администрация арыпхьарала йгьи культурала а-УнашвахъцIарта аметодкабинет знапIыцIу ЧКВА Бела Зауыр йпхIа йгьи аметодист БЕШТАОВА Разия Зауыр йпхIа апхьартаква рдиректорква арыпхьарали абжьара уысквали рзаместительква, апедагог-адгалагIвчва, йапшым апредметквала адкIылараква рунашвачпагIвчва йрынйатI. Ауат йапшым анкъвакъвраква рпны йапхъагылагIвхаз апхьагIвчва йгьи ауат зрыхIазырыз ачIахIра грамотаква рырттI, апхьара сквшы апны арыпхьарали абжьара уысквали шIыцрата, псахрата йаъу йалачважватI. Абаза район йаланакIуа апхьартаква йгьи асабигIзартаква зымгIва цкьата йалыргата, анхагIвчвагьи апхьара сквшы йазыхIазырта йызкьазуу апхьара сквш