АУНАГIВА ЗЛАЩАКВГЫЛУ ПХIВЫСПI

АнцIралагьи йырхIвитI ажважвта «АпхIвыс аунагIва дагьаласпI»-хIва. АпхIвыс йанылмыргIалуата хъацIа къаругIвацала аунагIва гьщаквгылуам. АлбыргIан кыт абзазагIв НАКIВАХВ Радима аунагIва йахъазымкIва лхIабльагьи дгIвычIвгIвыс нархъата, дахIба пшдзата дрылапI. Къарапагва йауу ГIвыкIьа Май йпхIа Радима асквш 1946, октябрь а 14 дйытI. Ауи азаман ахIвсса рарыпхьара ан-абачва дукI ацIыхъва йыгьтамгылуазтI, «апхIвыспа адзквпIи дагIвызапI»-хIва йлызсакъуан, збальыгъ йнадзауа унагIвара дшаларжьуашыз йащтан. Радимагьи лылахь йылбзазартахаз АлбыргIан дгIанагтI. Ауи сквш 21 дыртата НакIвахв ХIасамби йпа МухIамади лари унагIвара гIандыршан, ужвы йъагIадзазгьи ракъыль аквшвауа йацбзазитI. Радима НакIвахвргIа рунагIва днашылынгьи лажва гвауа гIвычIвгIвыскI йыгьйымгIастI. Ауи ланхъва Актихангьи ауи йаталанхъвахугьи йыртахъу налырхъауа, лсабиква дырхьпшуа абзазара дацгIамгIвайстI. МухIамади Радими цыгIвпачви гIвыпхIчви – ХIарис, Муса, ФатIима, Ильас, Амар, Фасйа, Артур, Аслан рщапIы йхвындыргылтI. АчкIвынчва ХIариси Муси Черкесск йбзазитI, арахьарат акыт йтапI. ФатIима Алибердыкъва датацапI, аткван дынхитI. Фасйагьи акъала аласаква ъарчпауа ацех дынхитI. ЗымгIвагьи ргвы рзыбжахымкIва йтгIачвахатI. АчкIвынчва ракIвпIта, «рнапIы ахьы гIацIпIлитI» ззырхIвауа йрапшпI, йыззычпам гьаъам. Ртыдзква дара рпхдзыла, дара рнапIыла йацацхърагIауа йаквырцIатI, йандыргIалтI, заджвгьи ймайхIвапсауата йбзазитI, йгIарыцIагылыз рхвыцква гIадзындыргылитI. Асабиква рарыпхьара къаругьи чхIарагьи атахъыпI, агвыбзыгъарагьи ауат йрыцхта. Радима лбзазара мгIва апны гIапсара щарда дгIарылстI. ЛпахIба ХIарис къвырльыкъв йхауата Афганистан даныргагьи лунагIва дгIашылхындзыкIьа лгвы сысуа йылгатI. Радима асовхозгьи, акыт ацехгьи дынхауа лсабиква лыгIзатI. НакIвахв Радима Май йпхIа уахьчIвала тшпсщара дчIвапI. Ауи лгIариква акыт швапхата йрымапI, йщаквкIыпI. Ауат збзиру ани аби йрыларцIаз агIвычIвгIвысагIара акIвпI. МухIамади Радими ртгIачваква йгIарыцIагылхыз 20-гIвы йнадзитI, ауат йгIархъшахъыцIхтагьи пщгIвы рымапI. УахьчIвала ауат рпхарали райгвыгIврали йкIвыршата йбзазитI НакIвахвргIа ртгIачва. Радима лтацачва – Таня, Марината гIвыджь, Лиза, Зули дырзыразпI, лгвы йацчпата, ракъыль аквшвауата, йылзыгвжважвауа йаъапI. Ари апхIвыс абаза рызкъква гIалдахIвитI. КвтIудзырдза, баста, мамырса, хъвыдзхIальыуа, хъкIхIальыуа, хIатыкъ, бахсыма НакIвахвргIа рунагIва апны йыгьчIащыгIвам, уанцалакIгьи райшва йыквгылапI. ЙгIадзынгылуа лсабиквагьи Радима хIабаза рызкъква бзи йдлырбитI, йалрыщцитI, йкIьыдакву «мамаду лдзырдза»-хIва йгIагваралитI. Агвла агвы дагIвызапI. Радима лыгвлачви лари ащтаныкъвара цкьа, азазыъаща пшдза рызбжьапI. – АхIабльа закI гIаншазтын лблахъгьи лчашврыгIвгагьи лыма дгIайитIта мацIауралагьи айкьангьашралагьи дхIыцIагылапI. Дыззычпам гьаъам, гIапсарагьи гьылдырам. ХIаргьи хвы лзыгIбитI, хIылшIацIгIитI. АлахI згIвадара гIалиттI, щардала ахIба бзита ахIабльа дхIымарызла! – лгвгIанаграквала дсыцагIвшатI Радима лыгвла Йуан ФатIима. НакIвахв Радима асквш 1978 агIан «Материнская слава» медаль гIалквнадыргатI. МартI а 8 – ауагIахъаква зымгIва йырзацапшу апхIвыс лы-Мш йадахIвуата Радима слайхIвахIвуата лунагIва йанакIвызлакIгьи абаракьатра гIвназларныс, лызгIвадара багъьата лтгIачва, ауат ргIариква насыпла йырчвыта рыхайырква дрылапшырныс лзыстахъпI. Жвынтахъа пшдза змазлуш Анчва дрыуайчIвыргIатI!