«АУАГІАКВА УРЫЗГВАПАЗЛАРА МАГІНЫ АМАПІ»

 зму абзазагІв, Абашта айсра Ду аветеран ТКАЧЕВ Константин Сергей йпа щарда мцІуата йысквш 95 йыртлапІатІ. Ауи дымгIащауата мшигІадза атшрычІвайраква акІвйыршитІ, йанакIвызлакIгьи дгватшныпІ, йнашх лашарапІ, сурат йгІвитІ. Константин Сергей йпа йырхъйауа асуратква швабыжта йджьащахъвапІ, йлашарапІ, лахІварата йгІауыларцІауагьи гьмачІым. Апейзажква зымгІвагьи дунейкІ узыгIахъыртІуазшва нур джьащахъвакІ гІархъыцІитІ. Ауат йгІадырбауа ахІвра, адзы, апстхІваква щардала уырпшрыквын, йпІатІауазшва уыла йгІацІалитІ. АхІахъвква, атыдзква, архъа йгІайуа ахІврапшдзаква – зымгІва рчвапшыраквала йацахъитІ, йапшуа агІвычІвгІвысгьи зынла апсабара дшахъвыкІу гІайнаргвалашвахитІ, ауат зырхъйаз дшгІвычІвгІвыс нардзугьи кьангьашра гьазгІаугуам. Ткачев Константин асквш 1924, мартІ а 4 агІан Ставрополь край йаланакІуа БеломечетскIа станица апны дйытІ. БыжькласскІ дангІарылга Невинномысск йаргваныз Свистуха кыт йаныргIалу атехникум дапхьатІ, уыхвагІв ъачІвагІа гІацІигатІ. ЖвагІ сквша днамдзаскIва Абашта айсра Ду гІалагатІ. Ауи йыквлагІвчва зымгІва рапшта афронт дпшцІалтІ. – Сызлаз агвып МарагІацІцІырта Хъара йыргатІ, ауаъа авиация йапщылазлушыз аъачІвагІагІвчва ъадрыхІазыруаз акурсква хІгІарылдыргатІ. Сара хысыгІврадистта садрыпхьун, – йгІайгвалашвахитІ Константин Сергей йпа. АйсыгIв шIа мчыта ахьта йылалын, хымызкІ ачымазагІвтара дщтIан. Ауи дангІахъынхІвых дызлаз агвып афронт йпшцІалхьан. Датша курскІ дрыларцІахын, авиация техника абжараква дырхьпшгIвыта йапхьара найырдзахтІ. УадыргІвана й-29-хауа артиллерия полк дрылата, сержант айцІба чын йымата дайсытІ, ахІауа апны агъа йпшІагылуаз асамолетква раъаща йырхъвыхуан. Константин данхвыцыз азаман йгІашІарышвта сурат йгІвырныс бзи йбун. Йыздыруада асквш 1942 акъраль алгъачІ йаналаз агIан ачкІвын заман тшыткІ шйауаз сурат йгІвырныс къару ъагІайауаз. Ажва гьалам айсра ауи йгІвуаз асуратква йара ашвыга нашхыйаква шаланацІуз. Асквш 1950 агІан Ткачев Константин йунагІва дгІахъынхІвыхтІ, шІыцшІыц амамыр бзазара тшайрыщцахтІ, абиблиотека, афачыгІв завод, суратхъыхыгІвта дынхатІ, унагІварагьи далалтІ. Йхъапщыли йари гІвыпхІчва гІадзындыргылтІ, ауатгьи – быжьгІвы, йатагІадрихызгьи пщгІвы гІарыцІагылхтІ. УахьчІвала аветеран Черкесск город дбзазитІ, «Орден Отечественной войны» йгьи цмедалькІ йгвпы дрыпшдзитІ. Ткачев Константин Сергей йпа сквш 95 анихъыцІ атшын дыздыруаз зымгІвагьи гІайайхІвахІвтІ, РФ а-Президент Путин Владимир йгьи Къарча-Черкес Республика а-Хъада Темрезов Рашид рразыра швъаква гІайадзатІ. Ауи йунагІва йызнашылуа зымгІвагьи швабыжта дгІарайгвыргъьитІ, ауаса айсра агІан йыла йыцІсыз арыцхIагIа дукІ далачважварныс бзи йгьибум. Ауи ацкІысгьи сурат ъайгІвуа апещ йнайдылитІта йынхараква йрыхайыргІвазитІ. Атш пшдзаква, йгвлахІару апсабара, абыхъв сагьасаква, йапшым ахІврапшдзаква йгІауачважвушызшва йырхъйарныс йылшитІ, йаргванква рсуратквагьи бзита йгІайдахІвитІ. РахІа йхвыцу абгъьыц апны угІалагата акьльисаква рхъыквква рпны йыцІшвтхуата гватрадъа закІгьи гьгІанижьуам, ашвыгаквагьи дыгьрайгьдзум. Константин Сергей йпа уанипшра йныбыжьла рыцІа дшІадзущитІ. Ауи гъынгьи пхынгьи апахь апны йаныргІалу атурник апны атшрычІвайраква йырхъйитІ. Аветеран йширыбагъьауала, агІвычІвгІвыс дызлу ауагІаква бзи йбара атахъыпІ. – УгІакІвзыршауа зымгІва рацкІыс уара угвыбзыгъата тшупхьадзузтын, урыламызларквын рыцІа йагъьпІ. Ахъамабзира гвнахІ дупІ. Зынгьи уара йгІауархІвра утахъым ажва гвауаква датша заджвы йквнаумырган. УызхъакІвласлауа агIвычIвгIвыс амаль амамкІва знымзара-зны джьауап гІауитхуаштІ. Ауи нымшара ахъазла йыхв науыркъвырныс уаламган. Ауи агIан уызгІвадарагьи бзийызлуштІ, унашхгьи лашаразлуштІ, – йгІаликIгІитІ абзазара йызнымкІва рхъвыхра щарда ззыгІанаргылыз ахІба-уасаражв.