Актуально Глава КЧР Рашид Темрезов в Тырныаузе КБР принял участие в открытии Дворца культуры им. Кайсына Кулиева Актуально Четверть сотрудников компаний КЧР по неосторожности «сливают» рабочие логины и пароли интернет-мошенникам Актуально Представителей IT-индустрии КЧР пригласили на бесплатный вебинар по акселерационной программе от Минцифры России Актуально Врач рассказала, кому категорически противопоказан кофеин Актуально В КЧР определили победителя регионального этапа Всероссийского конкурса »Учитель года России» - 2024

АУАГIАХЪАКВА ЗЫМГIВА ЙАЦДЫРТЛАПIАТI

20.05.2019 213
АУАГIАХЪАКВА ЗЫМГIВА ЙАЦДЫРТЛАПIАТI
Асквш 1943, ноябрь а 2 агIан льажьа рымамкIва Квта Азия йгьи Къазахстан йтыргаз акъарча уагIахъа 14 сквша рцри шта йачвыхъарата йбзазатI. Ауат асквш 1957 агIан Къарча-Черкес йгIахъынхIвыхта радгьылква йанрызгIайх йгIашIарышвта ауи амш дыртлапIитI. СынчIва сквш 62 ахъыцIитI ауи агвыргъьахъв. Ауи йадахIвуата Къарча-Черкес Республика апны йапшым амитингкви аконцерткви адыргалтI. Черкесск «АдзыгIвбжьа ЙачIва» культура-тшпсщара парк йтагылу Амфитеатр апны чIахIра айззари концерти акIвшатI. Ауи йалан Къарча-Черкес Республика а-Хъада ТЕМРЕЗОВ Рашид, КЧР АуагIа Айззара (а-Парламент) а-Председатель ИВАНОВ Александр, КЧР а-Правительства а-Председатель УАЗ Аслан, КЧР а-Хъади а-Правительстви р-Администрация аунашвачпагIв УАЗ Мурат, РФ а-Федеральна Айззара а-Федерация а-Совет йалу САЛПАГАРОВ Ахмат, КЧР а-Правительстви а-Парламенти ргIащтийыгIвчва, адиннкъвгагIвчва, абзазагIвчва, апхьагIвчва. АпшыгIвчва рыхъазла акъарчаква жвипщсквша руацIа гIазабти рыцхIагIати йырбаз, рцри шта йшазгIайхуаз, ауи асквшква йаъаз агIаншараква г I а у з ы р г в а л а ш в а х у а афильм гIадырбатI. Лагъь КIавкIаз амсылманква р-Координационна Квта а-Председатель БЕРДИЕВ Исмаил-хIаджь йгьи Къарча-Черкесла аправослав диннкъвгагIв, аблагочинна аба НАРТОВ Александр адепортация йаладзыз ауагIа гIаргвалашвахуата йгIайззаз духIа гIаддрахвтI. Ари агвыргъьахъв мшы йазынархата КЧР а-Хъада Темрезов Рашид ахIвахIвра телеграммаква гIайадзатI. «Акъарчаква руагIахъа гIащаквгылхрала снашвайхIвахIвуата, ари амш ацIабырг шхъахьхаз гIалскIгIара стахъыпI. Асквш 1957, май а 3 агIан жвипщсквша агIвыма шта йаъаз акъарчаква рпны йгIайхырныс лшара раутI. Ари ауагIахъа рыцхIагIа щарда йгIарылстI, ауаса ргIвычIвгIвысагIи ркультури рхчатI, рыштаква йгIахъынхIвыхын, акъраль атшауацIыхра йазынхатI» – йаныпI Лагъь КIавкIаз ауысквала РФ аминистр ЧЕБОТАРЕВ Сергей йгIайщтийыз асальамшвъа. – ХIреспублика атурых апны акъарчаква ргIащаквгылхра а-Мш йалкIгIу гыларта амапI. Сквшщарда цIитI ауи ауагIахъаква зымгIва хIацыта йхIыртлапIауищтара. Асквш 1943, ноябрь а 2 агIан акъарчаква ладзыли хьыгIали йырчвыз мгIва йыквылтI. Ахъачва Абашта айсра Ду йпшцIата анамыцаква йырпшIагыла йанайсуаз, ауат ран-рабачва, ргIариква, ртгIачваква йъаргузгьи рымдыруата йтыргун. Акъарчаква Квта Азии Къазахстани рпны йгIазхчаз зны йшгIацапахуашла ргвы йтаз азхъацIари амайчра нхари ракIвпI, ауат йъатыргаз аштаква рэкономика атшауацIыхра къару ду аларцIатI, – йхIватI Темрезов Рашид. – ХIахIбачва рцри штаква йрызрымаз абзибара, ацIабырг шхъахьхушла разхъацIара арыцхIагIараква йгIарылсырныс йгIарцхърагIатI. Ага рхъвыхри гIапсари рчхIарыгьи, хIуагIахъа ргвы кIадымрыхIауа, рышта йазрымаз абзибара рхчатI. ЙангIахъынхIвых амщтахь заман айшысла райщчва уагIахъаква йрыцта аэкономика, акультура, аспорт рпны агIарбара хIагIаква йырзынадзатI. ХIахIбачва рышта йангIахъынхIвых амш зынгьи йыгьхIхъаштылхуашым, ауи агIан хIабадучви хIабачви арыцхIагIаква йрыщтагIайуаз атурых бгъьыц гIахъыртIытI. Азаман зымгIва атара йтанаргылхитI. ХIара зынгьи ауи арепрессияква йрыладзыз гьхIхъаштылуашым, ауи апш зынгьи йнымшахыргIатI, зымгIва хIацыта хIуачIвымш, хIреспублика атшауацIыхра хIырзынхуштI. КъарчачкIвын муниципальна район ахIбачва р-Совет апредседатель Хубиев Гитче ари агвыргъьахъв йыладзква хъгылата йшйыртлапIауа гIаликIгIатI, айсра агIан акъарчаква ргIатгараква дрыквгIашIастI, ауат нхарала ргIарбараква шхIаракIыз йхIватI. КЧР ауагIахъаква разазаъащаквала а-Совет апредседатель Казаков Валерий акъарчаква ргIащаквгылхра а-Мш хIреспублика ауагIахъаква зымгIва рыхъазла магIын ду шаму, ауагIа рацзакIыра йшадамыгъу гIаликIгIатI. – Сквш 62 цIытI акъарчаква ргIащаквгылхра хIыртлапIауищтара. Абанпараква тшырпсахитI, ауаса хIуыжвгIанчIвиква ахIбачва ргIагвалашвахраквала рбзазара хIатла рыла йгIацIаржьитI, адепортация йаналашва асквшква рагIан хьыгIата, рыцхIагIата, лдзгIарата йрадзаз цIолата йгIаргвынгIвитI, – лхIватI КЧР Ажвлара палата апредседатель Молдованова Вера. – АлдзгIаракви агвъаджьыгIвари йгIаныржьыз ахвыртаква рыгвква йрыквта, руачIвымш шцуш рымдыруата, зны йъабзазуз аштаква гIаргвалашвата йгIахъынхIвыхтI акъарчаква. Ауат цхърагIара напIы рыззрауыз райщчва уагIахъаква рщапIы йхвынгылхра ахъазла ргвышхвагата йырзалтI. ЙагIвсыз асквшышвква рагIан адепортация, агеноцид йрыламшваз уагIахъакIгьи гьгIанымхатI. Заджвгьи йуагIахъа ртурых йхъаштлырныс дгьахвитым. АцзакIыра, абагвынгIвыра, ацацхърагIара збжьу ауагIахъаква йанакIвызлакIгьи арыцхIагIараква зымгIва йрызгIарылсуаштI. Ари амш йгIачважваз зымгIва адепортация йалашваз акъарчаква рыцхIагIата йырбаз, лдзгIарата йрадзаз, чхIарата йгIадырбаз гIалыркIгIун. Ареспублика саби чымазагIвтара айъазагIв хъада лзаместитель, АуагIахъа фронт ашIыпIа хъвшара асопредседатель Тльабыча Изабелла йгIадзынгылуа абанпара тшырзыналырхауата атурых хвы шазырбуш, амамыри агвынгIвыри дара йшырнапIыцIу, ауагIахъаква ращтаныкъвара багъьазтын хIреспубликагьи апхъала йшчIвырхъуш гIалылкIгIатI. – Акъарчаква рцри шта йангIахъынхIвых атшын ауат ргIащаквгылхра йа-Мшта йхIпхьадзитI, – йхIватI КЧР а-Хъади а-Правительстви р-Администрация аунашвачпагIв Уаз Мурат. – Ауи йхъаду агвыргъьахъвква йрылапхьадзапI. ХIреспубликала ауагIахъаква зымгIва хIабаркIыта тгIачвакIта хIбзазитI, дзачIвызлакIгьи йгIатгараква хIрайгвыргъьитI, арыцхIагIаква ацагIвхIшитI. Зынгьи йнымшахыргIатI акъарчаква гIазылсыз апш рыцхIагIа, хIуагIахъаква айгвари ацацхърагIари рызбжьазтI, йкъагIаргIатI хIреспублика. Арепрессия уагIа щардагIв аладзтI, ауи арыцхIагIа гIаздымсылыз къарча тгIачвакIгьи гьгIанымхатI. Ауи йапшу агIаншара нашхыйаква амамыр хIхчарныс, хI-Псадгьыл бзи йыгIбауа, ацIабырг йанакIвызлакIгьи йшхъахьхуш йазхъахIцIауа хIырбжьитI. ХIуыжвгIанчIвиква ртурых рдыруа, рахIбачва йырхътыцIыз арыцхIагIа хвы аквырцIауа йгIадзныргылра магIын ду амапI. Агваран йгIаталыз «Эльбрус» къральыгIва гIахIвра ансамбль, Къарча-Черкес йгьи Къабард-Балкъар республикаквала гIатгара зму артист Газаев Алим, Къарча-Черкес Республикала гIатгара зму артистква Меремкъвыль Ачар йгьи Катчиев Руслан агвыргъьахъв дрыпшдзатI, йгIайззаз ауагIа рнашх щтIырхтI. 
213 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный