АУАГІАХЪАКВА РКУЛЬТУРА ТЫНХАКВА РХЧАРТА

Къарча город апны зынхара асквш 1938 агІан йджвыквызцІаз апедагогика институт уахьчІвала Лагъь КІавкІазла йахъазымкІва йбергьльу акъральыгIва университетква йрыуапІ. Араъа абызшваквала, датшагьи нархара щардала арыпхьагІвчва дрыхІазыритІ. Асквшква 1957–1958 рагІан апедагогика институт апны абаза йгьи черкес филологияква ркафедра гІахъыртІын, дахІврала йынхитІ. Асквш 1972 йгІашІарышвта афилология факультет адекан, апхьахьа, абызшвадырыгІв, апрофессор КЪЛЫЧ Рауф НыхІв йпа йгІаджвыквцІарала апхьагIвчва агІапын тшпсщара йангІауырщтра анаука-практика айззараква акІвдыршалун. Кълыч Рауф дъадзанхуз азаман ауацIала ауи апш айззарата 18 адигалтІ, йжвежвхуз – йара адуней анихІваджь, йгIважвахуз йгIашIарышвта апхьахьа йхъмаштылра йазынархапІ. Асквш 2015 йгІашІарышвта Кълыч Рауф йыхьыз зхъхІвалгІу арыпхьагІвчва райззараква ракІвыршара джвыквырцІахтІ. Асквш 2017 агІан Къарча-Черкес къральыгІва университет агІаджвыквцІарала арыпхьагІвчва ръачІвагІа азъазара йъаладырхІауа аинститут йгьи «Алашара» дуней адкІылара рацкІрала йызкьазууыз «Клычевские чтения» апкъ йтата ауниверситет апны «Абаза культури абызшви р-Квта» йгьи «АнагІвай культури абызшви р-Квта» гІахъыртІытІ. Асквш 2019, мартІ а 8 абазаква зымгІвагьи йхІхъардугаз апхьахьа Кълыч Рауф сквш 85 йхъыцІуашын. Ауи йазынархата Къарча-Черкес къральыгІва университет апны «Клычевские чтения – 2019» зхьзыз арыпхьагІвчва райззара акІвшатІ. Ауи йалан апхьахьаква, агІвгІвчва, ауысагІвчва, Абхаз Республика апхьахьаква, «Алашара» адкІылара апрезидент Эгьзакь Мусса, Къабард-Балкъар Республика йгIатыцІыз агвып, арыпхьагІвчва, астудентква. Йара ауи атшын Къарча-Черкес къральыгІва университет апны «Ачеркес-къабард культури абызшви р-Квта», «Акъарча-балкъар культури абызшви р-Квта» гІахъыртІытІ. Ауи йалаз апхьахьаква, агІвгІвчва, арыпхьагІвчва ацри бызшваква рхчара магІныта йаму йаквгІашІастІ. Апрофессор ПІаз Сергей, «Алашара» апрезидент Эгьзакь Мусса, ауниверситет аректор Узденов Таусултан, ауысагІв Хвби Назир асасчва гвхътІыла йрайхІвахІвтІ. Ачеркес йгьи акъарча культури абызшви рквтаква ргІахътІра швабыжта йшайгвыргъьауа гІалыркІгІатІ, хІапхъахьыла ауат рынхара астудентква рарыпхьара ймачІымкІва йшацхърагІуш рхІватІ. Айззара йалакІу ахъвы анхара йалан ауниверситет аунашвачпагІвчва, арыпхьарали наукали КЧР а-Министерства анхагІвчва, «Алашара» адкІылара апрезидент Эгьзакь Мусса, ауагIахъа жвлара организацияква рунашвачпагІвчва, ареспублика йаланакІуа арайонкви агород гІаныршаракви рквтанай апхьартаква рарыпхьагІвчва, астудентква. Айззара апны йгІачважваз апрофессор Кълыч Рауф йынцІра-бзазара йауацІыхта йаквгІашІастІ, абхаз-адыгьа бызшва гвып йаланакІуа абызшваква ртшауацІыхри рхчари йырзынарху амальква гІалыркІгІатІ. Эгьзакь Мусса йшихІвазла, апхьахьа Кълыч Рауф НыхІв йпа абаза бызшва адынхалрала уыста йырхъйаз хвы аквцІауачвапІ. – КІавкІазла йахъазымкІва зыхьыз бергьльу абызшвадырыгІв Кълыч Рауф йынхараква йгІадзынгылуа абанпара рарыпхьара апны магІын ду рымапІ. Ауи дыздынхалыз агIвмонографиякI, ахажваркI, апхьагаква, аметодика цхърагІагаква, 70 йайхIу йнаука гІвыраква уахьчІва йъагІадзаз арыпхьагІвчви апхьагІвчви йддырдыритІ, йгІадрысабапитІ. СквшигІадза йакІвшауа арыпхьагІвчва райззараква нхарала йдырхІаз ашвапха йъаквчважвауа шІыпІата йалитІ. Ауи йапшу аъаща ацри бызшваква рхчари арыпхьарала апхъаламгІвайсри йацхърагІитІ, – йгІаликІгІатІ Эгьзакь Мусса. «Ногай Эл», «Къарачай Алан Халкъ» жвлара организацияква рунашвачпагІвчва Казаков Валерий, Боташев Сулеймен, «Апсадгьыл» абаза-абхаз организацияква радкIылара акоординатор Мыхц Рамазан ргІачважвараква ареспублика апхьартаква рпны ацри бызшваква рарыпхьара йапщылу ауысква йырзынадырхатІ. Ауат йшгІалыркІгІазла, ажвлара организацияква, арыпхьарали наукали а-Министерства йгьи ан-абачва рылшараква адыркІылырквын, рпахь йдыргылуа ахачІвква райхІара рзырхъйуштІ. Апрофессор ПІаз Сергей аконференция йалаз тшырзынайырхауата йгІахъыртІыз ачеркес йгьи акъарча культуракви абызшвакви рквтаква магІныта йрыму гІайхІватІ. – УахьчІва йадыгІгалыз анаука-практика конференция йадахІвуата йгІахъхІтІыз аквтаква згІаджвыквцІару ауниверситет аректор Узденов Таусултан йакІвпІ. Ауи апхъала йгІахъхIтІыз агІвба дахІврала йынхитІ, шІыцрата йыздынхалуагьи гьмачІым. Абаза, къарча, нагІвай, черкес бызшваквала арыпхьагІвчва хІуниверситет апны акІвымкІва датша зджьарагьи йыгьдрыхІазыруам. Ауи швабыжта хІхъа аладухитІ, астудентква рдырраква цІолазлара ахъазла йхІылшауа хІырхъйитІ. Аквтаква рпны йагъьу арыпхьагІвчва йдырхІаз ашвапха байа гІазырбауа ашвъаква, турых магІны зму асуратква мачІмачІымца йазнакІкІуаштІ, ауатгьи ашІаква рынхара апны йгІадрысабапырныс рылшуштІ, – йхIватI ПIаз Сергей. – УахьчІва хІайззара апрофессор Кълыч Рауф йхъыцІуашыз асквш 85 йазынархапІ. Ауи йнаука нхараква тшрыхазыргІвазаз зымгІвагьи рцІолара гІалыркІгІитІ. Апхьахьа йкъаругьи йдырраквагьи дырмайгьдзауата йынцІра шабгаз ззынайырхаз ауыс тшауацІназрыхуаш абанпара хІапхъахьылагьи йгІадзынгылуашта хІайгвгъитІ. Къарча-Черкес къральыгІва университет аректор Узденов Таусултан йшгІаликІгІазла, арыпхьагІвчви астуденткви агвынгІвыра рызбжьата йацынхитІ. Ауниверситет акафедраква йырхъазымкІва йгІахъыртІыз акультура квтаквагьи арыпхьара уыс йацхърагІуштІ. – Анаука конференция йгІадгылыз зымгІвагьи разыра ажва швзынасырхитІ. Ансисквша ауи йгІалалуа рпхьадзара йалахІитІ, ауат зымгIвагьи асабиква йрыдынхалырныс йшхІазыру йазхъахIцIитI. УахьчІва йсгвапата абаза, къарча, черкес йгьи нагІвай бызшваквала ауниверситет акъарула йхІрыхІазыруа ажурналквагьи уыжвласыла адуней йшгІаквылуаш ахабаргьи швсырдыритІ, – йхІватІ ауниверситет аректор. Абаза, къарча-балкъар, къабард-черкес, нагІвай бызшвакви рлитератури руыжвгІанчІви аъаща, апхьартаква зынйауа абаргвыраква кIьыда-кIьыда йъарыквчважвуз асекцияква рынхара сабапра алата йакIвшатІ. Абаза бызшви литератури йырзынархаз асекция акІвйыршатІ афилология наукаква ркандидат ХІасарокъва Бильаль. Ауи йалаз афилология наукаква ркандидат ПІаз Сергей, афилология наукаква ркандидат Дзыба Айщат, Къарча-Черкес агуманитар наукаква рырхъвыхрала аинститут аъачІвагІагІвчва Барокъва Лилия, Муратыкъва Фаризат, Цекъва Лейла, Къарча-Черкес ауагІа руысагІв Щыбзыхва Лариса, арыпхьагІв, ажвлара уыснкъвгагІв ПІаз Роза, Абхаз Республика йгIатыцIыз афилология наукаква рдоктор Хагба Лили, апхьахьаква Тания Эва, Анкваб Ахра, Багателия Агнесса, Хеция Наала абаза-абхаз бызшваква рылкІгІараква йауацІыхта йрыквгІашІастІ, ргвгІанаграквала йайкьангьаштІ. Ажва гьалам апрофессор Кълыч Рауф йзынархата йакІвшаз апхьараква сабапра шрылаз. РыцІа йджьащахъваз адокладква йанакІвызлакІгьи апшта «Университетский вестник» журнал йгIанылуаштІ.