«АУАГIАХЪАКВА РАЙГВАРА ХIАЗЫНХИТI»

Асквш 2018 ауацIала ауагIахъаква йгьи йапшым адинква разазаъаща йгIарыквчважвауа агIвыраквали агIатраквали хIреспублика ахабарргагаква ржурналистква ранкъвакъвра акIвшатI. Ауи йапхъагылагIвхаз июль а 25 а-Печать а-Тдзы апны артшхъвагаква рыртуата чIахIра мшы рзадыргалтI. Анйара йалан анкъвакъвра згIаджвыквцIару ауагIахъа уысквала, ажвлара коммуникацияквала йгьи печатьла КЧР а-Министерства аунашвачпагIвчва, ажвлара адкIылараква ргIащтийыгIвчва, хIышта апечать йгьи аэлектронна хабарргагаква рынхагIвчва. АуагIахъа уысквала, ажвлара коммуникацияквала йгьи печатьла КЧР аминистр йзаместитель ХВБИ Ислам анкъвакъвра йапхъагылагIвхаз ажурналистква пхата драйхIвахIвтI, ауи йшгIаликIгIазла, ауагIахъа азазаъащаква гIахъызтIуа ажурналистква ргIвыраква, ателебара йгьи арадиуагIатраква рмагIны дупI, айгвара, ащтаныкъвара, акультури ацIаскви ршвапха амдараква хIышта амамыр зрыбагъьауа къарупI, ари анархарала бзирата йыншауа ажвлара йрыларгитI. «Черкес хэку» газет аредактор хъада ТхIагъапса Уывжыкъва йгIачважвара апны Россия йбзазауа ауагIахъа щарда атынчри агвынгIвыри ъапшвыму атгIачва ду йашIйырпшытI. ЙалкIгIата, хIышта апны йгIадзынгылуа абанпараква хIапхъанчIвиква йхIызгIаныржьыз абзазара хабзакви цIаскви рдыруазтын, ажурналистква рхатIгьи алапI. Байрамыкъва Халимат лыхьыз зхъу ареспублика УагIахъа библиотека адиректор, КЧР АуагIа Айззара (а-Парламент) адепутат Хапчаев СальыхI ахабарргагаква рынхагIвчва йырхауа ауыс ахъазла дшырзыразу йхIвауата дгIачважватI. – ЙагIвсыз асквшышв й-30- хауа асквшквала угIалагата Къарча-Черкес ажурналистква ркъальам йгIахъыцIыз агIвыраква зымгIва йазкIкIыта ареспублика УагIахъа библиотека йщтIапI. Ауат хIышта абзазара йамшгIвырахатI, хIреспублика йахъыцIуаш асквшы 100 тшазадыгIгалуата ашваква, атурыхква, агIвгIвчва, асуратгIвгIвчва ауасамцара уагIа бергьльыта йхIыму зымгIва йгIарыквчважвауа агIвыраква адхIкIылырныс хIылдыршитI. Апхъахьылагьи швынхарала адахIвраква швзыстахъпI, – йхIватI Хапчаев СальыхI. «Къарачай Алан Халкъ» акъарчаква руагIахъа организация аунашвачпагIв йзаместитель Боташев Сулейман йгьи «Адыгэ-Хасэ – Черкесский парламент КЧР» жвлара мгIвайсра апредседатель Асланов Али йшгIалыркIгIазла, хIреспублика ажурналистква ауагIахъа азазаъащаква сакъта йъарыдгылуа, амакIыра гIазлыцIуаш ашвхIаусыгIваква ъагIарымхъвыцуа рбзирала Къарча-Черкес рахIа йтынчу аштаква йрыуапI. АгIачважвараква рымщтахь анкъвакъвра йапхъагылагIвхаз адипломкви ахча сертификаткви рырттI. «Йагъьу телебара репортаж» номинацияла апхъагылара агIвыршатI «Къарча-Черкес» ГТРК ажурналистква Дауыр ФатIима йгьи Матакаева Аминат; «Йагъьу телебара публицистика гIатра» гIайдахIвта йырпхьадзатI Бостанов Рустам. «Йагъьу радиуагIатра» номинацияла «Братство республики» гIатра зрыхIазырыз Адзын Азамат дапхъагылагIвхатI. «Йагъьу интернет-гIвыра» РИА КЧР ажурналист Кипкеева Аминат йылгатI. Ареспублика газетква рынхагIвчва «Къвнакъра» хъата йызму агIвыраквала ракIвпI йызлагIалыркIгIаз. Хысквша цIитI «День республики» газет аредактор хъада Кратов Евгений йгIаджвыквцIарала ауи апроект нхауищтара. АуагIахъа бызшваквала йгьи урышв бызшвала агазетква ржурналистква ргIвыраква хIышта ауагIахъаква рыгIвычIвгIвыс бергьыльква зымгIвагьи йрабадырырныс рылдыршитI. Ауи аноминацияла апхъагылара гIатыргатI «День республики» аредактор хъада йзаместитель Иванова Татьяна; «Къарачай» газет ажурналист Мамчуева Дина; «Черкес хэку» газет ажурналист Дабагъва ХIатыза; «Ногай давысы» газет аредактор лзаместитель Дабагъва Кърымхан. «Абазашта» газет анхагIвчва йрыуата акъвнакъвра йазынарху агIвыраква адызгалуа Джьардис Асйат, Къвмыкъв Хаджьат, Дзыуа Аминат, Кълыч Руслан йшгвыпу асертификат рчIвхатI. Ари атшын ауагIахъа уысквала, ажвлара коммуникацияквала йгьи печатьла КЧР а-Министерства анкъвакъвра йапхъагылагIвхаз ахабарргагаква рынхагIвчва гвыргъьахъв айшвагьи рзадыргалтI. Ауи апынгьи йхIвахIвуата йшдрыбагъьазла, хIреспублика ауагIахъаква йрызбжьу айгвара пшдза йацзакIыта хIапхъахьылагьи йазынхуштI.