«АУАГIАХЪАКВА РАЦЗАКIЫРА ЙАНАКIВЫЗЛАКIГЬИ ЙБАГЪЬАЗТI»

Ноябрь а 4 ауагIахъаква рацзакIыра а-Мш Черкесск город апны гвыргъьахъв пшдзата йдыртлапIатI. Россия, ацзакIыра, амамыр йырзынархата йгуз ашваква ареспублика драмтеатр апахь йгIайззаз ауагIа гвщтIыхра гIарыларцIун. Амитинг аламгаскIва дута йауацIыхыз Россия а-Баракъ рымата апатриот шIаква Ленин йыхьыз зхъу аурамла йгIамгIвайстI. Амитинг йалаз йапшым аполитика партиякви ажвлара адкIыларакви рбаракъквагьи апша йарыббуан. АчIахIра мшы йазынархаз айззара ангIахъыртIы Россия Федерация а-Президент ПУТИН Владимир Къарча-Черкес а-Хъада ТЕМРЕЗОВ Рашид йгьи ареспублика абзазагIвчва йырзыгIанайырхаз ахIвахIвра йгIапхьатI. ХIреспублика абзазагIвчва ахIвахIвра сальамшвъаква рзыгIазгIвыз йрыуапI РФ а-Правительства а-Председатель МЕДВЕДЕВ Дмитрий, РФ а-Федеральна Айззара а-Федерация а-Совет а-Председатель МАТВИЕНКО Валентина, СКФО апны РФ а-Президент йгIащтийыгIв МАТОВНИКОВ Александр. ХIреспублика а-Хъада Темрезов Рашид йгIайззаз агвыргъьахъвла драйхIвахIвтI. – ХIапхъа Абашта айсра Ду апны АйгIайра асквш 75 хIыртлапIуштI. РФ а-Президент Путин Владимир ауи йазынархата асквш 2020 ахъмаштылри ачIахIри йры-Сквшта йщаквйыргылтI. Россия а-Президент йгIачважвара апны йшгIаликIгIаз апшта, хIкъраль, Европа йгьи адуней шабгу афашизм йачвызхчаз хIабадучва рфырра хIхъхIраштылра гьатахъым, – йхIватI Темрезов Рашид. Ауи йшгIаликIгIазла, уахьчIва атурых йгIалахаз агIаншараква рхчауата хIреспублика апны щарда рчпитI. Абашта айсра Ду афырква йырзынарху амузей гIарбараква ансисквшагьи йакIвшитI. Аветеранкви чкIвыныргIи райззараква адыргаллитI, айсра йаладзыз рхъвадиква гIаухрала анхараква гьашIасуам, айсра ду йгIаквчважвауа акнигаква гIацIырщтитI. – ХIкъраль ауагIахъаква рхъа йамайгьдзауата р-Псадгьыл шгIархчаз, айсра амщтахьгьи абзазара гIащаквдыргылхуата гвхътIыла йшынхаз йгIадзынгылуа абанпара йдхIырдырырныс дасузлакIгьи йхIборчпI, – йгIаликIгIатI Темрезов Рашид. КЧР АуагIа Айззара (а-Парламент) а-Председатель йапхъахауа йзаместитель Смакуев Дагир адепутатква рыхьызла йгIайззаз тшырзынайырхатI. – Швари хIари зкъару дуу акъраль пшдза апны хIбзазитI. Бызшвала, динла йапшым ауагIахъаква хIабабари хIащтаныкъвари амамыр гIархчитI. ХIацзакIыра хIкъраль акъару арымчитI. Россия абзазагIвчва зымгIва йазакIу турых йгьи йазакIу уачIвымш зму уагIахъакIта хIаларпапI. Къарча-Черкес абзазагIвчва нхарала, апхьарала, спортла хIреспубликагьи хIкъральгьи рыхьыз дыргауа тшауацIырхитI. Апхъахьылагьи акъыльаквшвари айгвари хIызбжьата хI-Псадгьыл хIыркъагIуштI, атурых хIхчуштI, – йхIватI Смакуев Дагир. АуагIахъаква рацзакIыра а-Мш йазынархаз амитинг апны йгIачважватI КЧР Ажвлара палата йалу, «Кали – Архи» КЧР агрекква рыжвлара организация знапIыцIу Кузнецов Владимир, Черкесск город аполиклиника айъазагIв хъада ШенкIауа Гваща, Никулин С.П.йыхьыз зхъу асаби библиотека аунашвачпагIв Демишонкова Наталья. ЧкIвыныргIа рыхьызла йгIачважваз Черкесск город атехнология колледж астудент, чкIвыныргIа райсра-патриот бжьарала а-Квта «Пост №1» аштаб йпщбахауа ахъвшара аунашвачпагIв Ажьи Ирина йшылрыбагъьазла, йгIадзынгылуа ашIаква хIкъраль атурых, АйгIайра гIатызгаз афырква рхъа рыладута, р-Псадгьыл бзи йырбауата рхъа щтIыхта апхъала йчIвырхъитI. – «Псадгьыл» – хIреспублика йгьи хIкъраль хIхъа рыладута хIызчпауа, хIадызкIылуа ажвапI. Россия ауагIахъаква зымгIва ракъыль аквшвауа мамырта йбзазарныс ртахъыпI. ХIара йанакIвызлакIгьи ауи хIаднакIылыргIатI, – йгIалылкIгIатI Ажьи Ирина. АчIахIра митинг апны хIреспублика аршIыйагIвчва гIачважварипхьадза амщтахь ауатыкв йгIаталуа Россия, Къарча-Черкес ркъагIара йгьи ауагIахъаква рацзакIыра, апатриотра йырзынарху ашваква рхIватI. А йз з ар а амщт а х ь «АдзыгIвбжьа ЙачIва» культура-тшпсщара парк апны йадыргалыз агвыргъьахъв хъвмарраква уагIа щарда рылан. АхIбачвагьи асабиквагьи ауаъа йбыжьгуз ашва пшдзаква ргвы пшыхь тадрыстI, рыла пшытI.