АУАГІА ЙРАРГВАНУ АЪАЧIВАГIАГIВ

ЧЕХОВА Зинаида Александр йпхIа сквшы 20 даныртазгьи Къарча город апны йлыцынхуз ахІбачвагьи ашІаквагьи зъачІвагІа йазъазу, зхъахв здыруа гІвычІвгІвыста дырпхьадзун. Зинаида Коста-Хетагурова кыт апны дйытІ. Лани лаби ТотиевргІа Дора Гаврила йпхІа йгьи Александр Георгий йпа акыт апны хвы зквырцІуз уагІан, апхьарта йынхун, агIвыджьгьи акыт ажвлара бзазара ацІыхъвадза джьгарта йалан, хгIвысабичва – Амирам, Зина йгьи ХІасан гІадзындыргылтІ. Амирам амедицина гІалихын, дайсра айъазагІвхатІ. ХІасан динженерхатІ. Зина асквш 1973 агІан Владикавказ медицина училища фармацевтта дгІалган, Къарча город й-146- хауа аптека апны лынхара джвыквылцІатІ. Йгвапаз йгьи закъыль цІараз Зина лхъа ахъазла йщаквлыргылтІ зымгІва рапхъа лгватра ззыналырхуш аныкъвадыкъваква, йнаскІьахьу ауагІаква йгьи саби зму апхІвысква шракIву. – Атажв-лыгажвква руасаражвра, ркъару, рынхара амайчра хІаргьи йгІахІыларжьитІ. Сара сшхъвыцуала, ахІбачва хІайгвыгІври хІгватри рыгхІырхара хIгьахвитым, – лгвгІанаграква хІыцагІвылшитІ Зинаида Александр йпхІа. – АзгІва агІвычІвгІвыс йтара дтнацитІ. ЙагІвсыз асквшышв асквш 70–90-ква рагІан ахъвшвква зымгІва гьумауазтІ. Ауи апшта, паркинсон згІва йахъвауа «Наком» хъвшвы гІапшцІыргара ахъазла ачымазагІвква 7–8 мзы кьазу йгылан. Сангьи ауи азгІва лыман, бзита йыздырхитІ ауаса йшаъаз. Ахъвшв хІзабадыруаз ауагІаква хІрыхІвумца Москва, Турция, Швейцария йгIартыргумца йгIахIнапIыцIадыршвун. Ауи агIан йгIаншатI йбергьыльхаз алакъырдрагьи: «Арецепт йъауыхьуа йаквцIа». Ага ауаса йаъазтынгьи, й-146-хуз аптека арецепт хъвшара йыдгылуаз гвыжвкIра рыламкIва йгIадцIхуан, йауа ухIварыквын, Зинаида Александр йпхIа ауат рхьыгIа йгьи ргвакъвпра шгIалгвынгIвуа рбун. Ауи зынла дыззымцхърагIаз ауагIаква лгвнылкIылуан, лгIвыра книжка йанылцIун – ари йтахъыз ахъвшв шхIызгIаргыз ахабар йырдырра; ачымазагIв ныкъвадыкъва йа айсра аветеран – йпны йзыгара. Зинаида аптека апны уыста йлырхъйалакIгьи джьауапкIра ду гIалырбун. – Ауи сара йыгьсгIатгарам, – лхIвитI Зинаида. – Сапхьара амщтахь сызлашваз анхагIвчва гвып унашва рхъицIун Борлаков Руслан. Ауат швабыжта йгIасайгвыгIвуаз, анхара сазызбжьуз уагIа бзийын. ГIвысквшала Зина «Лучший по профессии» анкъвакъвра дапхъагылагIвхатI, апрофсоюз комитет даларцIатI, акадрква рхъвшара даунашвачпагIвхатI. Ауаса йджьгарыз апхIвыспа ужвыгьи апхьара дцарныс лмурадхатI. – Пермь фармацевт институт заочната саныцIал, гIвысабичва сымахьан: Виктор йгьи Ляна. ЗаманкI анцIы айцIба Янагьи дсаухтI, – лхIвитI Зина. – Абаргвыраква хабар йыгьзымбузтI, йауа ухIварыквын, апхьара санцарыз ауаъа айсра айъазагIвта йынхуз сащахIба Амирам йпны саъазлун. Аучилищагьи йхIаракIу аъачIвагIа гIацIгартагьи сгIарылгатI, нхара швапха дугьи сымапI, ауаса уыжвгIандзарагьи сашIамсуа амедицина журналква срыпхьитI. ЙуызгIайыз агIвычIвгIвыс ахъвшвквала йазцIгIараква джьауап йаура атахъыпI. Датшата йсхIвапIта, уахьчIва йыздыруа ацкIыс уачIвы йыздыруаш айхIазлара атахъыта йспхьадзитI. Зинаида Александр йпхIа съадзалачважвуз сазхъвыцтI: лара дфармацевтпI, лаща дайсра айъазагIвын (щарда гьцIуам адуней йхIваджьищтара), Вязники город аполиклиникагьи даунашвачпагIвта дынхатI. АгIариква рыуа заджвы амедицина гIалихмищтI? Ауаса, Владикавказ йбзазауа Виктор дхIаракьатчпагIвхатI, Ляна Санкт-Петербург апны турист фирмакI лнапIыцIапI, Янагьи ауаъа дтапI, дэкономистпI, Алиса Герцен Александр йыхьыз зхъу Санкт-Петербург университет йпщбахауа курс дапхьитI. Араъа закI срытаразра стахъыпI. Зина лхъапщыла Чехов КIазбек йахщазаджвыкI данпсы ауи лпхIа Эльда Алиса дхвыцта длымата дгIанхатI. Эльдагьи аптека дынхун. Лынхара далгата хъвлапныкI амгIва дшхъысхуаз амашина гIалысын, дащытI. Ауи амщтахь Алиса хвыц Зина дгIалыдылкIылхтI… АпхIвыспа чкIвын аквтанай апхьарта хьапщ медальла дгIалган, СанктПетербург университет дыцIалтI. – Ляна йгьи Яна ауи агород пшдза апны рщапIы дрыбагъьатI, Алиса рыцIа дхIыларпапI, ауаса ауыгьи Санкт-Петербург дгIатахарныс йаквылкIуазтын, хIгьылпырасуашым. ХIгьылхъгвыргIвум, йауа ухIварыквын, лцриква лыцпI, – лхIвитI ауи. Зинаида Александр йпхIа пщгIвысабичва дранпI, цгIвы драндупI. Ауи уыжвгIандзарагьи дынхитI. Лфатар лтйын, лцри кыт дгIайхтI. Пшдзата йаныргIалу лтыдз ду уаннашылра алыргаща ухънахитI, ршIыйара злу апхIвыс лнапIы ъанамдзауа шаъам гIаугвынгIвитI. РахIа йкнига бзибагIвчвугьи ауи лбиблиотека дамайхIвапсарныс гьйылшушым. Зина агIайыра зигIваквала йбайу уатра лымапI. Ауаъа ауатралыцIквала угIалагата ахIвра ъазагIваквала йалгахуата йумауаш гьаъам. ЙанакIвызлакIгьи гвщтIыхрала йырчву апхIвыс лхъапщыла КIазбек уыжвгIандзарагьи цIагылагIв бзита дылзалуан. ЙцIыхъвахауа азаман дчмазагIвхищтара ауи апшта уыс гьизычпахуам, ауаса йхъапщыла анхара нылжьырныс дгьадицалуам. Афармацевт лынхара саквхъынхIвхуата хIбзазара йгIалалыз ашIашIкIгIара шIыц саквымчважвакIва тшгьсзымчхIатI. – Швабыжта гвыргIвара гIасыларцIитI азгIва тшачвыхчарала амальква назмахвуа ауагIаква, – лхIвитI ауи. – ЙгIадрысабапыз амаскIаква ахъазыкI йкIаурышв шамуа, пакет кIьыдакI йтацIара шатахъу гьгIаргвынгIвуам. Щардала йынкъвга ауа амаскIагьи йануджвджвара айту ыквуцIахра шатахъу расхIвитI. – Аптекаква рпны ахъвшвква анумауа айхIарапI. Ауыла йчпачIвыйа? – Аптекаква тшырзыназырхауа йшрылахIауала йыгIбитI азгIва гIазахвуагьи рыцIа-рыцIа йшщардагIвхауа. Схъатала ахъвшвква йсынбжьагIву, йсзыъу рыхъазлахIва йыгьпхьаскIуам. Йкъыту ахъвшв рыцIа апхъа тшсзыгIаназырхаз йакIвпI йызстуа. – Афармацевт Чехова лымш дшпапылуа? – йцIыхъвахауа сазцIгIара лысттI ауи. – Щажьы сгIагылитI, «Йацы ахъазла Анчва сузыразпI» – сымхIвауата йгьагIвсщтуам, – йылджьауапхатI сайчважвалагIв.