АТУРЫХ АЖВЫРА ГЬАХЬУАМ

Асквш 2018 агIан «Россия апшгIара мгIвайсра» жвлара организация йылнахыз «Без срока давности» проект «АйгIайра» Россия адгалра комитет алачIвара апны йдрыбагъьатI. Ахъмаштылри ачIахIри ры-Сквш ауацIа апроект Россия а-Президент Путин Владимир йцхърагIарала абзазара йаларжьтI. Абашта айсра Ду атурых йазынарху «Без срока давности» проект апкъ йтата архив швъаквала йдрыхIазырыз астендква хIкъраль асубъектква зымгIва рпны йгIадырбушитI. Асквш 2021, февраль а 8 хIреспубликагьи рылата субъект 63 рпны Абашта айсра Ду агIан хIкъраль абзазагIвчва джьабагIата йырбаз, анамыца-фашистква йгIаркIыз аштаква рпны мамырта йбзазуз ауагIа йшырзычвгьаз, йрымаз шгIарыквырхуаз, йшырщуаз узырдыруа астендква ргIарбараква гIахъыртIытI. Ауи атшын Черкесск город чкIвыныргIа райсра-патриот бжьарала а-Квта апны йадыргалыз агIарбара агIахътIра йалан КЧР айсра комиссариат ахъвшара аунашвачпагIв КОБЫЛКО Алексей, РФ ащтанкъвцара комитет КЧР-ла а-УнашвахъцIарта акадрквала аинспектор ахIба ШУЛАКОВА Инна, КЧР АуагIа Айззара (а-Парламент) адепутат КЪАРДАН ФатIима, Россия УагIахъа фронт (ОНФ) КЧР-ла ашIыпIа хъвшара а-Исполком аунашвачпагIв КАППУШЕВА Людмила, «Историческая память» проект аунашвачпагIв ДЗУГАЕВ Альберт, Черкесск город аветеранква рсовет апредседатель БАЙРАМУКОВ Рашид, «Россия апшгIара мгIвайсра» жвлара организация КЧР-ла ахъвшара анхагIвы ТЛЬЫС Юлия, Черкесск город администрация агIащтийыгIвчва. Айззара ангIахъыртIы чкIвыныргIа райсра-патриот бжьарала а-Квта ахьызла йгIачважваз агIарбара шгIаджвыквырцIаз, асабиква р-Псадгьыл йазцIабыргта, айсра атурых, АйгIайра гIатызгаз афырква рыхьызква рхъмаштылуата ргIадзныргылра апны ауи магIныта йаму гIархIватI. Къардан ФатIима йгIайззаз ашIаква тшырзыналырхауата йшылхIвазла, Абашта айсра Ду атурых хчарала анхараква зынгьи йгьгIашIасуашым, АйгIайра гIатызгаз рыхьызква анцIрала ахъмаштылра йалазлуштI. – Швари хIари Абашта айсра Ду йазынарху йыгьпроекткIым абзазара йалагIжьхьу. Ауи хIымчпарыквын хIтурых гьхIзыхчушым, АйгIайра гIатызгаз рыхьызква абанпараква йдхIырдырырныс гьхIылшушым. УахьчIва араъа йгIадырбауа астендква айсра агIан хIыштаква гIазкIыз анамыцаква чвгьарата йырхаз, ауагIа джьабагIата йырхътырхыз гIахъыртIитI. Ари ауыс гIаджвыквызцIаз, Черкесск апны агIарбара акIвыршара йадгIапсалыз хIшвзыразпI, – лхIватI Къардан ФатIима. Каппушева Людмила амамыр хIазхчаз афырква, з-Псадгьыл ахъахвитра йазгылата зхъа щтIазцIаз, щтадъа йыдзыз чкIвыныргIа рхъмаштлырныс ахъазла хIкъраль атурых йазынарху ауысква шадыргалуа даквгIашIастI. – Абашта айсра Ду лдзгIарата йгIанагыз, анамыцаква йыркIыз агородкви акыткви рпны ауагIа джьабагIата йддырбаз, чвгьахарата йындыршаз арат астендква йырныпI. Архив швъаквала ацIабырг гIащаквзыргылхыз, ари агIарбара згIаджвыквцIару зымгIвагьи сшвзыразпI. ХIара хIадкIылата хIкъраль атурых хIхчуштI, хIветеранква ргвы йасырныс заджвгьи йгьизыгIуашым, ауат рхъа ду йдхIырбуштI, агвыргъьахъвква рзадыгIгаллуштI. ХIабадучва гIазлысыз арыцхIагIа, ауат хI-Псадгьыл шгIархчаз, хъацIара шгIадырбаз зынгьи йыгьхIхъхIраштылуашым, – лхIватI Каппушева Людмила. Ауи йшгIалылкIгIазла, Абашта айсра Ду йазынархата сквшщарда йцIаркIуаз ашвъаква гIащтIырххын, ацIабырг гIащаквдыргылхитI. ЙгIараухыз архив швъаква йырну ауагIа йрыларгара рмурадта астендква дрыхIазыртI. Ауат асквшква рцIабырг ауагIа йырдырра атахъыпI. Байрамуков Рашид чкIвыныргIа райсра-патриот бжьарала а-Квта апны йгIахъыртIыз агIарбара хIреспублика апхьартаква рпынгьи йадыргалырныс ажванахъа гIайгтI. – Айсра атурых зну астендква асабиквагьи йрымаджьащахъвахуштI. ХIкъраль атурых ззырдыруа асабиквагьи арыпхьагIвчвагьи ауи швабыжта йрыхъвуштI, – йгIаликIгIатI ауи. АгIарбара злалу астендква гIважви пщба йнадзитI. Ставрополь край, Ростов, Волгоград, Ростов областьква, Кърым Республика датшагьи айсра агIан айбащра чвгьаква ъакIвшаз аштаква рпны ауагIа джьабагIата йырбаз йгIарыквчважвауа агIвыраква ауат астендква йырныпI. Айззара йалаз чкIвыныргIа астендква рыдзхъа айсра атурых йгIаквчважватI, айсра афырква рыхьызква гIархIватI