АЦРИ БЫЗШВА АТШАУАЦIНАРЫХРА ДЖЬАУАПКIРАЛА ДАЗЫНХИТI

Ацри бызшваква тшауацIырхра ахъазла апхьартаква рпны уыс щарда акIвдыршитI. Черкесск йпщбахауа апхьарта апны абаза бызшвали литературали арыпхьагIвта йынхауа ЛАЧВЫШ Элла ХIаджьмусса йпхIа ацри бызшва асабиква азыгIальаматра ду шазрыму гIалылкIгIатI. Элла ХIаджьмусса йпхIа Красна Восток кыт асквш 1960 агIан дйытI. Апхьарта амщтахь Къарча-Черкес къральыгIва педагогика институт арыпхьагIв ъачIвагIа гIацIылгатI. АрыпхьагIв шIа йапхъахауата Черкесск йтагылаз айсра апхьартаинтернат апны урышв бызшвала йалрыпхьауа далагатI. Аинтернат анхъыргIвах амщтахь, Черкесск йагIбахауа апхьарта апны абжьара нхараква драдгалагIвта йгьи урышв бызшвала арыпхьагIвта нхара днарахвтI. СквшквакI ауаъа джьауапкIра ду гIалырбауа лхъвдаквцIараква лырхъйатI. Ауи амщтахь лбзазарта рыцIа йазаргваныз йпщбахауа апхьарта дцахтI. Элла ХIаджьмусса йпхIа сквш 30 аъара цIуаштI ари апхьарта апны дынхауищтара. Ауи абаза бызшвала йгьи литературала йалрыпхьитI. – ХIынхара апны рыцIа баргвырата хIызшIашвауа асабиква абызшва бзита йъарымдыруа акIвпI. Акъалаква йбзазауа атгIачваква рпны ани аби йабызшвакIмызтын, асабиква ащардагIв абызшва рымдыруата йгIайитI. Ауат ауи дырдырра рыцIа заман щарда хIыквнахитI. Апхьара сахIатква акIвхIыршара ахъазла йатахъу зымгIвала хIадгалапI. Апхьагаква хIызхъитI, «Абазашта» газет аредактор хъада Къвыл Фардауыс дашIамсуа ажурналква, агIацIщтра шIыцква хIызгIалглитI. Ауатгьи хIынхара апны шIыцрата йгIалагIжьитI, – лхIвитI ауи. Лачвыш Элла йшгIалылкIгIауала, ахвыцква апхьара сахIатква рагIан ахъвмарща амальква ангIаурысабапуа рыцIа йхънахитI. Ауи сквшигIадза рыбызшва ззырдырра зтахъу апхьагIвчва йшрылахIауа лхIвитI. – Ацри бызшваква йырзынарху амчыбыжь ауацIа апхьагIвчвагьи, ауат ран-рабачвагьи, рандучвагьи джьгарта тшгIадырбитI. СгIаджвыквцIараква зымгIва йрыцыркIитI. Ари асквш коронавирус ашIашIкIгIара хIынхара апны апсахраква гIаланацIатI. Ага ауаса йаъазтынгьи, андучва абаза рызкъква рмацIауан, сурат ахъырхуанта анкъвакъвраква йгIарылалуан, арызкъы шырмацIауа видео ахъырхуан. Ауат зымгIва апхьагIвчва хIкультури хIцIаскви йазаргваначIвитI, – лхIватI арыпхьагIв. Ауи йшгIалылкIгIазла, лапхьагIвчва йапшым анкъвакъвраква щардала йрылалитI, апхьагIвчва гIазпхьауа ауысаква, йырхIвауа ауарадква, йдрыхIазыруа аргылчIвква бзита йдрыхIазыритI, йызнымкIва апхъагылара гIатыргитI. АрыпхьагIвгьи ркъару шымдзуа лылалхIвитI йгьи ауат рдахIвраква ргвышхвагата йылзалитI. Элла ХIаджьмусса йпхIа йшылхIвазла, апхьарта апны абазата йцауа апхьагIвчва зымгIва рцри бызшва ддырдыритI. Ауи арыпхьагIв швабыжта дайгвыргъьитI. – ЗаманкIла утхъахырквын, зыбызшва зчвхIатлу апхьагIвчва ащардагIв ранрабачва швъа ргIвуанта апхьара сахIатква йыгьгIамиуазтI. УахьчIвала апхьагIв абызшва йымдыруазтынгьи апхьара сахIатква дгIайитI. Асабиква абызшва азыгIальаматра ду азрымапI, ауи анабачва ртшдырра шщтIыцIуа йагIарбагапI, абазаква рыжвлара уысква штшауацIырхуа йаквшахIатпI. АхIбачва рцри бызшва амагIны ангIаргвынгIвуа дара ахвыцквагьи абызшва ддырдырра ртахъхитI. Ауаса зымгIвагьи хIкъаруква алахIцIитIта хIцри бызшва шгIащаквыгIжьуаш хIащтапI, – йылрыбагъьитI арыпхьагIв. Лачвыш Элла лынхара азгIашыкърата йазлыму гIалыркIгIауата аразыра сальамшвъаква, аграмотаква гIалквнадыргатI. Ауи йхIаракIу категория зму дарыпхьагIвпI, арыпхьагIвчва рдырраква йрыладырхIауата йакIвдыршауа апхьараква йанакIвызлакIгьи дцитI. Элла ХIаджьмусса йпхIа асабиква абаза бызшва бзи йырбара, йддырдырра ахъазла ан-абачвагьи, андучвагьи лынхара йгIалалжьуамцара, зымгIвагьи абаркIыта магIын ду зму ауыс ацдырхъйитI. АрыпхьагIв ауат йъалыцыркIуала дырзыразпI. Швапха байа зырхIаз арыпхьагIв гвымчIва абаза бызшва ахчари атшауацIыхри джьгарта дацIагылапI.