АЦХЪРАГIАРАКВА АГЪЬЫРЧIВИТI

«Единая Россия» партия а-УагIахъа программа, «ЗгIвадарахчара» уагIахъа проект анархара хъадаква йрыуу амедицина – санитар цхърагIара тшауацIнарыхра ауысла йакIвшаз алачIвара йалан Черкесск город ачымазагIвтара айъазагIв хъада, «Здоровое будущее» проект акоординатор АСЛАНЫКЪВА Альбина, социальна политикали згIвадарахчарали КЧР АуагIа Айззара (а-Парламент) акомитет апредседатель, «ЗгIвадарахчара» уагIахъа проект КЧР-ла акоординатор ХВБИ ХIасан, згIвадарахчарала КЧР аминистр йзаместитель КАМУРЗАЕВА Динара, ХIабаз район ачымазагIвтара айъазагIв хъада МАКЪВАУА Амин. «Йапхъу амедицина цхърагIара гIаршIыцхра» республика программа ацхърагIарала азгIвадарахчара нхартаква раъаща шагъьырчIвуа, техника шIыцла йшадыргалуа гIалхIватI Камурзаева Динара. Ауи йшгIалылкIгIазла, йагIвсыз асквш ауацIа йапхъу амедицина цхърагIараква агъьырчIвуата УЗИ, ИВЛ датшагьи агIвычIвгIвыс йызгIвадара зладырхъвыхуа ъамапсымата акытква рпны азгIвадарахчара нхартаква йырзалырхыз гьмачIым. – Акытква рбзазагIвчва хъара йымцауата медицина цхърагIара шрауаш хIазхъвыцуата ауат йрайъазауа аъачIвагIагIвчва гвыпгьи адхIкIылитI. ЙгIалскIгIара стахъыпI, азгIвадарахчара нхартаква цIыпх йырзалырхыз амедицина ъамапсымаква ахъазыкI йшгылам, ауат йрыланхауа руыс рдыруата рхачIвква дахIврала йдырхъйитI. Амедицина нхартаква ансисквша йырзалырхуа атранспортгьи йапхъу ацхърагIараква рагIан йгIадрысабапитI, – лхIватI Камурзаева Динара. «Йапхъу амедицина цхърагIара гIаршIыцхра» республика программала йагIвсыз асквш Жаква кыт апны а-ФАП терапевти педиатри ъанхауа амбулаторията йдыргIапстI. Ужвы ауагIа йгIартахъхауа амедицина цхърагIараква акыт йтымцIуата йгIадрысабапитI. – Жаква амбулатория апны амедицина цхърагIара квпшыраква йгIарылахIырхIарныс, ачымазагIвква тшынла йъарайъазуш стационар йгьи стоматология гIахъхIтIырныс хIмурадпI. Датшагьи йгIалскIгIара стахъыпI «Цифровая трансформация» программа ацхърагIарала ХIабаз район а-ФАП-ква зымгIва Интернет ласы йшашIадрышвыз, ауаъа ашвъаква рагвныргIвра апны йгIартахъхауа техникала йадгалапI, – йхIватI Макъвауа Амин. Асланыкъва Альбина йшгIалылкIгIазла, акытква рпны йгIадрайгвауа аъачIвагIагIвчва бзиква анхара йшакIуашла амальква гIарысабапрагьи магIын ду амапI. Хвби ХIасан ауи йылхIваз йацикIуата акытква рпны азгIвадарахчара нхартаква ауагIа йшырзынхауа рылапш йшыцIымцIуа йрыбагъьатI. Адепутат йшгIаликIгIазла, йцIыхъвахауа азаман амедицина анхагIвчва йрыцыркIуата йнарахвыз ахабзаква ауагIа йрыхъвитI. Амедицина цхърагIараква агъьызчIвуа ашIыцраква апхъахьылагьи абзазара йаларжьуаштI.