«РусГидро» КъарчаЧеркесла ахъвшара йгьи асабиква рдырраква йрылархIарала ареспублика Квта йцIасхаз «оБЕРЕГАЙ» экология акция акIвдыршатI. ГIважваны йайхIата йакIвшаз акция Архыз, София дзыгIв атшпы адзхъа йадыргалтI. Апхынла араъа йапшым аштаква йгIартыцIыз, хIреспублика йауу атшпсщагIвчва гьмачIым. Ауат адзыгIв атшпы анышвкъвара йцIанадыркIыта йанамцIыцIхуагьи гIаншитI. «Юный турист» чатыр лагерь апны тшпсызщауа хIреспублика апхьартаква рапхьагIвчва София дзыгIв атшпы дрыцкьатI, гIвсахIаткIла нышвкъварата машакв 40 раъара азыркIкIытI. Анышвкъвара азкIкIра аэковолонтерква анкъвакъвра квпшыра амата йадыргалтI. Ауат йджьащахъву закI гIауралагьи литературалагьи йанкъвакъвтI. ЙайгIайыз «РусГидро» адамыгъа зму ачвахъабагакви адипломкви рквнадыргатI. Асабиква рдырраква йрылархIарала ареспублика Квта апедагог Пшихачева Мадина йшылхIвазла, апхьагIвчва «оБЕРЕГАЙ» акция йрымаджьащахъвадзата йгIалалитI, ауат апсабара бзи йырбитI, сабапракI азгIаргырныс ртахъыпI. «оБЕРЕГАЙ» акция апкъ йтата йагъьу асуратлагьи йанкъвакъвуаштI (акция анакIвшуз йахъырхыз). Ауи хноминациякIла йахъцапI: «Йагъьу агвып» – агвып гIазырбауа сурат; «Апсабара апны рыцIа йпшдзу агъыцIара» – йдрыцкьаз ашта гIазырбауа сурат; «Selfie – оБЕРЕГАЙ» акция агIан йхъатала йхъиххыз асурат. Анкъвакъвра йгIалалра зтахъу асурат хештег #oberegai рыцта асоциальна сетьква рпны йгIатайцIара атахъыпI (Инстаграм, Фейсбук, Контакты). Асуратква ари электронна адреслагьи йщти ауитI:
oberegai@roshidro.ru
Комментарии