АЦIЛАУАТРАКВА РГIАНЫРШАРА ЙАЦЫРКIИТI

Лагъь КIавкIаз ауысквала РФ аминистр ЧЕБОТАРЕВ Сергей КЧР а-Хъада ТЕМРЕЗОВ Рашид дйыцта «Сады Карачаево-Черкесии» ООО абзазара йаланажьуа ацIлауатраква ргIаныршарала аинвестиция проект шырхъйахауа тшахайыргIвазатI. Ауат АдыгьахIабльа район апны йгIандыршаз ашвыр цIлауатраква йырпшытI. УахьчIвала чIвацIла ъалу гектар 200 йайхIапI. ЦIыпх хIреспублика апны йапхъахауата хIа цIлауатра гIандыршатI, уахьчIвала хIацIла ъалу ашта хгектаркI акIвпI йнадзауа. Анхараква аналдыргара амщтахь ахIа цIлауатра гектар 20 гIацIанакIуаштI. «Сады Карачаево-Черкесии» ООО адиректор Ширинов Айдын асасчва рынхара шадыргалуа йахайыргIвазатI. Ауи йшихIвазла, алацIачIвква зымгIва хIкъраль апны йгIадырйытI, ауыжвгIанчIви технологияква ргIарысабапра йбажву тшыгIвра йгьи «йцкьу» ашвырква ргIархарджьра рылнаршитI. Ари аинвестиция проект абзазара йаларжьырквын, сквшыкI апны швырта тонн 10300 гIадырхарджьуашта йаквдырпшитI. АцIлауатраква ргIаныршарала апроект магIын ду амапI. Ауи хIышта апны ацIлархIара гIащаквыргылхра йазынхитI, ауагIа знадзара хIагIу ашвырква рхвгIарныс рылшуштI, анхара тыпква гIаншитI. УахьчIвала «Сады Карачаево-Черкесии» ООО йынхауа зымгIва хIышта йабзазагIвчвапI, ари ауыс тгIачвала тшадызкIылыз гьмачIгIвым. Ари аинвестиция проектла йащтагIайуа ачIвырхъа ашвырква рхчарта йгьи йъапшцIырщтуаш квта руыхвара йазынархапI. Ауат ангIахъыртIра нхара тып шIыцта 250 гIаншуштI. Асасчви «Сады Карачаево-Черкесии» аунашвачпагIвчви апхъахьыла мурадквагьи йрыквчважватI, ацIлауатраква ракIвымкIвагьи жвумп шгIадриуашла йайкьангьаштI. Ширинов Айдын Лагъь КIавкIаз ауысквала а-Министерства ахъпшылра йацIата СКФО аштаква рагрономква рыхъазла айззара, аъачIвагIагIвчва ршвапха амдара рылзыршуш анйараква адыргалырныс ажванахъа гIайгтI. – ХIкъраль агIархарджьра гIащтIыхра йазынхауа ари апроект абгата йхъйара ахъазла алшараква гIанхIыршарныс хIхIазырпI, швгIаджвыквцIараква йрыцхIкIуаштI, – йхIватI Чеботарев Сергей Виктор йпа.