«АЦIАРСЫГЬЫГIВЧВА ТШГIАДУМЫРЖЬАРНЫС УАХВИТПI»

Уызрыгвжвайуа, ухъвыцща ацазкIуа ахабарква рпроцент 80–90 йшымцу хIымдыруата йрызхъахIцIитI. АмцхIвагIвчва хIхъа йгIатарцIауа ацIабыргыра щаквхIыргылырныс щардагIвы йыгьхIхIальым. ЙгIахIадзаз ахабар анджьахIщара ауи хIыгIвзачвагьи йдхIырдырырныс хIгвжважвитI. Йаргьи абауасамца акIвпI мцыла йалу ахабарква ауагIа йшрылалуа. Ауи апшта, коронавирус йарыхIаз амц йазхъахIцIарныс майрата йхIылшитI. Авласть нымхауата, амедицина амуата ауагIа йрылазгауа дара йшыртахъу апшта акIвпI ахабарква шдыргауа. АцIарсыгьыгIвчва хIгIарымжьара ахъазла, хIтелефон йгIатарцIауа, Интернет апны хIызпхьауа ртамамра щаквхIмыргылуата датша зджьакIы йырзыхIщтира гьатахъым. Авласть органква рынхара йгIаквчважвауа агIвыраква аминистерствакви аведомствакви рсайтква рпны майрата йуауитI. Ахабзахчара уысква шаъу зымаджьащахъву КЧР-ла МВД, «Росгвардия» КЧР-ла а-УнашвахъцIарта, КЧР апрокуратура ауасамца анхартаква рсайтква гIашврысабап, Инстаграм апны рхъатачIв напаква гIашвшвырцхърагIа. КЧР а-Хъада й-Инстаграм напа йану ахабарква йрызхъахIымцIауата зынгьи йхIымбас, йхIымдыруа уагIа кIьыдаквакI тшгIадхIыржьара затахъыйа? Авласть йырджьауата ацIабырг зхIвауа баргвыра ъану, ауи шалуыргуш ачыннкъвгагIвчва йдйырдырырныс дгвжважвитI, ймагIну гьцIайкIуам. Хабар мцы ауагIа йрылазгауа йхъата заджвгьи йыгьдйырдыруам. Афедеральна хабарргага пхатшаква ари амыгIвхъгара йапшIагылата нхара ду акIвдыршитI, ажурналистква ръачIвагIадырра йъаладырхIауа айззараква адыргалитI. Октябрь а 6 Минводы ЭКСПО дуней гIарбара Квта йгIахъыртIыз СКФО ажурналистква райззара апны ажурналист, РФ Ажвлара палата йалу МАЛЬКЕВИЧ Александр мцыла йалу ахабарква шдыргауа йауацIыхта дгIаквчважватI. Ауи йшихIвазла, мцы гIазхъвыцуа ауагIа дрыгвжвайра, рхъвыцща ацаркIра рмурадта акIвпI ари ауыс пIай здырхъйауа. – АуагIа мцы рылазгауа ахчала йшынхауа гвынгIвырапI. Ауат нзырхауа, ахча гIарызтуа хIкъраль йаъазарквын, ласыта йгIаркIуашын. Амц ахьъагIайуаш, ауи йгIахъшахъыцIуаш ъахIымдыруа амыгIвхъгара хIапшIагылырныс хIчвыбаргвпI. Коронавирус згIва ангIацIсы амцква шщардахаз зымгIвагьи йыгIдыритI. Араъа швапхакI гIазгырныс стахъыпI. Москва дбзазауата пхIвыспакI апхьадзараква агалагьи йайхIата, азгIва йагауа щардагIвдзата, ачымазагIвква мчыта йрылахIауата Интернет апны йгIахъылтIыз анапа йанылцIун. Ахабарква лара йгIалхъвыцуан, лхъатала ауагIа йырзылщтиуан. Ауат йрыпхьуз гвжвайрамкIва гвтынчра гьгIарыланамцIузтI. АхабзахчагIвчва апхIвыспа ласыта дгIараутI. Ауи даныркIы йылчпаз дадгылхтI. ЙшылхIвазла, ауагIа тшдлырдырра, щардагIвы лгIвыраква йрыпхьара ахъазла акIвпI ауи апш хабар мцы злыргуз. ХIара мцы згIвуа хIырпшIагылуата йхIтлакIьуа хIчпитI. АпхьагIв йуырдырырныс утахъу ахабар шымцым щаквумыргылуата йгIарысабап шамуа журналистта йапхьауа астудентква хIашIамсуата йрахIхIвитI, – йхIватI Малькевич Александр. АкъральыгIва азазаъащаква хIанрыквчважвауа аполитикква йрымхIваз, йрымчпаз рыквырцIата мцыла йалу ахабарква ауагIа йанрыларгауа агIаншараквагьи щардапI. КъралькI закIыла йдыркъванчарныс аныртахъхара ахабарргагаква руыс апхъа йдыргылитI. Ауаса йыззырчпауагьи гвынгIвырапI. Ажурналистква ауатыкв йгIатаргауа акъральыгIва, ауи аунашвачпагIвчва рполитика бзазара арахьарат акъральква йрызарархауата йангIаквчважвара ауагIа рхъвыцща датшахитI. АмцхIвара ауагIа шапшIанаргылуа, ауи айсра шгIахъшахъыцIуа гIарып къральквакI йызнымкIва йрылархIвахьатI. Ауи апш хIаль гвымха злу Мараташварта, Атлантическа океан уахъыста къральквакI ржурналистква, рполитикква ршIа мцы адмырхIварыквын, ауагIа тынчта йбзазуштI. США рполитик, Джордж Буш данпрезидентыз къральыгIва секретарьта йынхуз Колин Пауэлл йадкIылу ауагIахъаква рорганизация (ООН) шварагIварадарала а-Совет алачIвара апны Ирак аунашвачпагIвчва ядерна абджьар йадынхалуата адуней акъральква ргIащтийыгIвчва йангIарылайхIва, ауи ахабар шымцызгьи, ауаъа айсра гIаларгатI. Колин Пауэлл ядерна абджьар зларчпауа апкъыгIва Ирак йгIараута гIайхIватI, ауи гIадйырбатI. Ауаса ауи ахабар шымцызгьи США рполитикква ауагIа мамырта йъабзазуз агIарып къраль апны айсра гIаларымгауата йгьымтынчтI. Ауаъа йгIашIарышвта «Хабарргара айсра» ажваква щардала йгIадрысабапуа йалагатI. Ари ауыс пIай йадкIылу ажурналистква, ахабарргага пхатшаква рцхърагIарала льажьа змам акъральква ртшауацIыхра йапыраситI, ауагIахъаква апшIадыргылитI. Лондон апны СкрипальргIа зщуаш уау ддрыфта анырхIвагьи, мцыта йгIацIцIхтI. Абагьи апхIагьи абгапI, йызгIвадапI. СкрипальргIа руыс анаквымшва Новальный дгIадрысабаптI, ауыгьи уау йдрыфта йацIайырхан, Берлин тшдйыргатI. Химия абджьар кIара алыздыргIауа аъачIвагIагIвчва йшырпхьадзауала, «Новичок»-хIва йызпхьауа ауау СкрипальргIагьи Новальныйгьи йрыдыргалзарквын, зынла йащуашын, ауау ъанкъвыргаз йаъаз ауагIагьи йрызарархушын. Россия акъару йъалахIауа, къраль щарда йъарыцынхауа зымгвапхауа апсабара газ, анефть рпшцIыщтра ахъадрысырныс йгвжважвитI. Ауат мцы рхIварыгьи, ауагIа апшIадыргылыргьи йрызгIвитI. РахIа йгвасрахугьи, ауыс пIайква абзазара йаналаржьуа Россия акъральгIвчва гIадрысабапитI. Ауаса йбзазауа акъральква Россия гвауата тшгIазырчпузтынгьи хI-Президент, ауи йыцынхауа агвып ацIабырг йазгылата, ауагIа рбзазара агъьчIвра, ауагIахъаква райгвара рыбагъьара йазынхитI. ХIкъраль апны ажвлара рхъвыцща ацазкIуа «рыла кIылхта кIапIикIа кIыларчIва» ззухIвушта знапа зтйыз ажурналистквагьи аблогерквагьи гьмачIым. Ажурналистика йадкIылата гвхътIыла йынхауа мцыла йалу ахабарква ауагIа йрылазгауа хIырпшIамгылырквын, уахьчIва хIызквчважвауа амыгIвхъгараква гIазхъшахъыцIуа абаргвыраква йыгьрылдзгIушым. УагIахъа щарда ъабзазауа Лагъь КIавкIаз апынгьи ауи апш нхара акIвыршара магIын ду амапI. Минводы ЭКСПО йакIвшаз ажурналистква райззара апны Малькевич Александр ацIабырг ацазкIуа ахабарква шымцу щаквуыргылра ахъазла йчпачIву гIайхIватI. Ауи йшгIаликIгIазла, ажурналистква йапшым агIаншараква рхабар ласыта ажвлара йрыларгара рмурадта йангвжважвара ацIабырг аныргIвуа ацкIыс йангIващауа рыцIа йщардапI. Ажурналист мцы злу хабар йнапIыцIцI шамуаш йхъираштылра гьатахъым. – ДзачIвызлакIгьи хIгIазквчважвауа шцIабыргу щаквхIыргылуата йыгIгIвуа гIван, хын йхIырхъвыхра атахъыпI. Зхабар гIгIвуа агIаншара згIвылакIла йызбаз дгIахIырчважварквын, пхаста йа гвжважвагIва уыс шгIаншаз ахабзахчагIвчва йгIадхIырхIварыквын, рыцIа йтамамызлуштI. АкъральыгIва власть органква, ашIыпIа хъаунашвахъцIара органква шынхауа хIгIаквчважвузтын, администрацияква, аунашвахъцIартаква рсайтква шгIахIрысабапуаш хIхъхIраштылра гьатахъым. АкъральыгIва нхартаква зымгIва Инстаграм апны напа згIахъддыртIуагьи гвынгIвырапI. Архъйара йгьи ахабзалыхра власть органква йрылу ауагIа рбзазара агъьчIвра йазынхауата уыста йырчпауа, йнарахвуа ахабзаква абзазагIвчва йшрыхъвауа акъральгIвчва йырдырра, йгIаргвынгIвра ахъазла Интернет ацхърагIара гIадрысабапитI, – йгIаликIгIатI Малькевич Александр. Ауи ажурналистква разцIгIараква джьауап риттI, Интернет бзита йъанымхауа акытква рбзазагIвчва СКФО аштаква рпны апсахраква рхабар рымдыруата йшалачIвам, ауат агазетква йшрыпхьауа гIаликIгIатI. Ари айззара апны датшагьи йгIачважватI Москва йгIатыцIыз ажурналистква ВОЙЦЕХОВСКИЙ Антон, ЛОСЕВА Наталья, ПОЛЯКОВ Максим, Mail.ru амедиапроектква рредактор хъада ЧЕРНУХА Ирина. Ауат «Цифровая журналистика: инструменты и мультимедийный контент», «Компьютерная графика в новостях и документалке», «Читатель всегда прав. Какие статьи и заголовки можно не писать» темаквала амастер-классква акIвдыршатI. Апхьадзараква йшгIадырбауала, йцIыхъвахауа асквшква, йалкIгIата, коронавирус тшанауацIнахуа азаман Интернет апны апкъыгIваква рхвгIара, ртира швабыжта йщардахатI. АуагIа йшыртахъу апшта йапшIашварныс, йабабарныс гьрылшумта Whatsappла йайчважвитI, кIара ргIвитI. Ажва ахъазла, ари агIвыра швъадзапхьауа адунейла Whatsapp гIазрысабапуа гIвыра мильуан 41,7 аджв-аджв йырзырщтитI. Доллар мильуан жвабапхьадзара ахв пкъыгIва Интернет-ткванква рпны йырхвгIатI. СахIат 500 йцауа видео Youtube йгIатарцIитI. Ауасамца Интернет ацхърагIараква тшауацIырхитI.