АЦIАБЫРГ АКЪАРУ ДУПI

Апечать а-Тдзы апны ареспублика хабарргагаква рынхагIвчва ръачIвагIа гвыргъьахъвла йъарайхIвахIвыз айззара йалан ауагIахъа уысквала, ажвлара коммуникацияквала йгьи печатьла КЧР аминистр КУМУКОВ Альберт, ауи йзаместитель ГУЗКО Сергей, «Росгвардия» КЧР-ла а-УнашвахъцIарта знапIыцIу, аполиция аполковник ПАРХОМЕНКО Андрей, Россия ажурналистква р-Союз КЧР-ла ахъвшара апредседатель йзаместитель ТЕКЕЕВ Умар, «РусГидро» ПАО КЧР-ла ахъвшара апресссекретарь ЖДАНОВА Эльвира, «Россети Северный Кавказ»–«Карачаево-Черкесскэнерго» ахабарргагаква рыцынхарала адепартамент аъачIвагIагIв хъада АЛАКАЕВА Надежда, акъральыгIва уагIахъа газетква рредакторква, ажурналистква. – АуагIахъа газетква рынхагIвчва хIреспублика ауагIахъаква райгвари ращтаныкъвари рыбагъьара, ркультура хчара, чкIвыныргIа рпатриот бжьара швырзынхауата нхара ду акIвшвыршитI. Агвы йгIатыцIуата швъачIвагIа гвыргъьахъвла сшвайхIвахIвитI, швхачIвква гвхътIыла йъашвырхъйауа ахъазла сшвзыразпI, – йхIватI аминистр. Кумуков Альберт ауагIахъа газетква рынхагIвчва ауагIахъа уысквала, ажвлара коммуникацияквала йгьи печатьла КЧР а-Министерства ачIахIра грамотаква «Абазашта» газет аредакция аоператор ХВЫНА Милина, «День республики» газет аредакция анхагIвы БЕЛЯЕВ Дмитрий, «Къарачай» газет ажурналист ЛЕПШОКОВ Хвсеин, «Ногай давысы» газет акорректор КУРАТУКОВА Зоя, «Черкес хэку» газет аоператор ЭМЗАГОВА Дарина йриттI. Аминистр йагIвсыз асквш РФ а-КъральыгIва Дума адепутатква ралхрала анапIщтIыхраква ракIвыршара къару алазцIаз ажурналистква йгIарквнадыргаз КЧР а-Правительства ачIахIра грамотаква ритхтI. Ауи апш ртшхъвагала дгIалыркIгIатI «Абазашта» газет аредактор лзаместитель КЪЛЫЧ Руслан. «Росгвардия» КЧР-ла а-УнашвахъцIарта знапIыцIу, аполиция аполковник Пархоменко Андрей унашва зхъицIауа акъвырльыкъвхарта ангIанша угIалагата ажурналисткви ахабзахчагIвчви аргваныта йшацынхауа гIаликIгIатI, Россия апечать а-Мшла йгIайззаз драйхIвахIвтI. – «Росгвардия» акъвырльыкъвхагIвчва ажвлара ртынчра рхчауата рборч шдырхъйауа, асабиква рпатриот бжьара йшацхърагIауа ауагIа йдзырдыруа ажурналистква швгвы хътIыта швъахIыцынхауа ахъазла сшвзыразпI. Швара хIынхагIвчва хвбызшвакIла швгIарыквчважвитI, хI-УнашвахъцIарта анхара ауагIа йрылажвгитI. «Росгвардия» акъвырльыкъвхагIвчва ауагIа тынчта йбзазара ахъазла ркъаругьи рызгIвадарагьи йыгьрайгьдзум, – йхIватI Пархоменко Андрей. Ауи «Росгвардия» КЧРла а-УнашвахъцIарта аразыра швъаква «День республики», «Абазашта», «Къарачай», «Черкес хэку», «Ногай давысы» газетква рредактор хъадаква йриттI. Апечать а-Тдзы ажурналистква хIреспублика апны электроэнергия шгIадырхарджьуа, ауагIа ауи йапымшвтуата йгIадрысабапра ахъазла нхарата йакIвшауа ажвлара йрыларгауищтара сквшщарда цIитI. Аредакцияква аэнергетикква йъарыцынхауа йазыразта йгIачважваз «РусГидро» ПАО КЧР-ла ахъвшара, «Россети Северный Кавказ»-«КарачаевоЧеркесскэнерго» ргIащтийыгIвчва Жданова Эльвира йгьи Алакаева Надежда аажурналистква ръачIвагIа гвыргъьахъвла йрайхIвахIвтI, аразыра швъаква рквнадыргатI. Ари атшын «Энергия воды» анкъвакъвра йапхъагылагIвхазгьи йрайхIвахIвтI. Асквш 2021 агIарбараквала «Энергетика будущего» номинация апны анкъвакъвра дапхъагылагIвхатI «Архыз 24» телеканал акорреспондент ГЕДИЕВА Алина. «Лучший корреспондент информационного агентства» номинация апны йгIвбахауа агыларта лкIытI «РИА КЧР» ажурналист ШЕВЧУК Ирина. «Черкес хэку» газет ажурналист ТУАРШЕВА Ирина йхпахауа агыларта гIалквнадыргатI. Ауат артшхъвагакви ачвахъабага согIакви гIарырттI. Текеев Умар Россия ажурналистква р-Союз КЧР-ла ахъвшара аунашвачпагIвчва рыхьызла хIреспублика ахабарргагаква рынхагIвчва драйхIвахIвтI, ачIахIра грамотаква риттI. Ауи артшхъвагала йгIалыркIгIаз йрыуапI «Абазашта» газет акъральыгIва йгьи амуниципальна власть органква рыцынхарала ахъвшара аредактор КЪВМЫКЪВ Хаджьат, «День республики» газет ажурналист НИКОЛАЕВА Лариса, «Къарачай» газет аответственна секретарь ДЖАЗАЕВА Лидия, «Черкес хэку» газет асуратхъыхыгIв ТУАРШЕВ Беслан, «Ногай давысы» газет ажурналист НАЙМАНОВА Раиса. Ари атшын апечать а-Мшла ажурналистква йгIарайхIвахIвтI ауацIа уысквала КЧР а-Министерства аунашвачпагIвчва, Россия ФССП КЧР-ла а-УнашвахъцIарта знапIыцIу, «Единая Россия» партия КЧР-ла ашIыпIа хъвшара а-Исполком, «Почта России» КЧР-ла ахъвшара рынхагIвчва.