АСПОРТ ЙАКВГIАЗШIИТИТI

АгIвычIвгIвара гIаншангьи аспорт ауагIа рынцIра апны гыларта ду амапI. Ауи тшадызкIылуа йызгIвадарагьи рыцIа йбагъьахитI къаругьи гIайыланацIитI, рыцIа дласхитI. ХIабачвагьи, хIабадучвагьи, ауат йатарабахугьи ужвы йхIыму апш амальква гьрымамызтI, айха чIврыкI ацIла йхъарцIунта йанкъвакъвуа тшщтIырхуан. УахьчIвала акытква рпны аспорт комплексква дыргылитI, хвыцгьи дугьи хъвлапынхъа аныла-арыла йыцIамчIвауа, йакIвым уыс тшадрымкIылуа тшазыркIкIитIта аспортзалква йрыгIвнапI. Ауаъа йапшым атренажерква гылапI, волейбол, футбол, баскетбол уас ъауаш, абакIра йъазырбжьауа алачпапI. Йапшым аспорт квпшыраквала зъачIвагIа йазъазу абжьагIвчва асабиквагьи адуквагьи рыцIа йгIалыркIгIауа анархараквала йрыдынхалитI. АунагIва уысква ъамачIым акытква рахIа йщардата ауагIа дуква, зыхьыз хъара йзыргауа апхьахьа, аспортсменква, айъазагIвчва, атынчра ахчагIвчва, датшагьи йапшым ъачIвагIаква йрызъазу гIатыцIитI. Зыхьыз пшдзата йзыргауа чкIвыныргIа дрыуапI Псыжв кыт ййыз ОхвтаргIа Джьумальадини Лиди рпа Азаматгьи. Азамат Псыжв йапхъахауа апхьарта йжвбахауа акласс дангIалга Черкесск йтагылу Лагъь-КIавказ къральыгIва академия йаланакIуа аколледж дыцIалын менеджер ъачIвагIа гIацIигатI. Ар къвырльыкъвхара амщтахь Къарча-Черкес къральыгIва университет аспорт факультет йгIарбараква хIагIата дгIалгатI. Азамат йапхъахауа бжьагIвыта йыдынхалуаз Пчелкин Вячеслав Иван йпа йакIвпI. Ауи самбола аспорт дамастерпI. Асквш 2005 йгIашIарышвта спортла инструкторта дынхун. Асквш 2006 агIан Россияла йакIвшуз анкъвакъвраква рпны йхпахауа агыларта гIайгтI, йащтагIайуата, асквш 2008 агIан Россия анкъвакъвраква рпны дапхъагылагIвхатI. Йапхъахауа агыларта ангIатига йара ауи асквш Адуней анкъвакъвраква дырщтийын, йгIвбахауа агыларта гIатигатI. УахьчIвала, Азамат Псыжв кыт йтагылу «Спартак» спорт клуб апны самбола асабиква дрыдынхалитI, уахьчIвала 32-гIв йбжьитI. Анхарта данцауа сквшыкIи бжакIи ахIа йыртам йпагьи дйыцйырцитI, дшхвыцу угIалагата аспорт дадикIылитI. ЙшихIвауала, хIапхъахьыла йпа гвыгъара ду йызйымапI. Йара йхъа ахъаз самбо акIвымкIва, боксгьи тшазибжьитI, заман хвит анйыму ачкIвынчва дрыцта футбол дасырнын бзи йбитI. «Аспорт факультет саныцIалуаз, сгIалгата тренерта сынхарныс акIвын сгвы йтаз. Сдырраква асабиква йрыласцIара стахъыпI, ауи акIвпI ансимшы нхара санцауа мурадта йсыму. Щарда цIуата тренерта салагата хIсабиква бзиракI йазызбжьарныс сгвыгъан, ауаса ауи рахIагьи саквзыргвышхваз, йгIасцхърагIаз асабиква рани раби ракIвпI», – йхIвитI Азамат. Ауи йгIалихыз аъачIвагIа швабыжта йгвапхитI, йара йзаргванта йпхьадзитI, асабиквагьи швапха гIайхъырхуамца рахIагьи рпсы йатахъыта аспорт йадгылитI. Ансисквша адуней ауацIала ауагIа зыкьпхьадзарала атутын, аркъа датшагьи азгIвадара йазарару агвымхараква тшхънадырчIвитI. Ауат йрыуата щардагIвы саби зынгьи йыгьраухуашым. Ансимшы агвымхараква йырпшIагылуата йалкIгIу акъвырльыкъвхартаква йапшым анхараква акIвдыршитI, ауаса агIвычIвгIвыс йара йхъа азымцакIва зынгьи дгьашIасуашым. ЧкIвыныргIа зджьара йыцIагыла тутынкI рчвауа ацкIыс аспортзал йцата рща нкъвырцарыквын рахIа йагъьхуштI. Къару ануыму ухъа ахъазлагьи бзипI, хIзаман апны ухъа уазгылхра атахъыпI, ауи йацта аспорт тшадызкIылуа агIвычIвгIвыс йызгIвадара йанакIвызлакIгьи рыцIа йбагъьахитI. «ДзачIвызлакIгьи йапхъахауата намыс-ъадаб йымазлара атахъыпI, йащтагIайуата йызгIваду бзазари, аспорти зынгьи йныжвымжьын», – йхIвитI Азамат.