АСКВШКВА АГIВСИТI, АУАСА РЫЦIА ЙАЗАРГВАНХИТI

Асквш 2014 агIан архъвыхраква йшырхъысыз, апхьарта йызлагIалгаз ашвъаква шгIарыртыз, йрычIарачIаз актова зал апны арыпхьагIвчва рбжьагажваква йшрыздзыргIвуаз, йапшым агIаншараква шгIаргвалашвахуаз, дасу мурадта йыму, ъачIвагIата дызпхьарныс йгвалу ашвъабгъьы йанырцIата абашырба йштарцIаз, ауи хвысквша анахъыцIра йгIахъыртIыхта йшдырх ъвых уашызла йангIалыз акласс ранйара акIвшатI. Зажва йамайжьауата йашIашвахыз абашырба гIахъыртIытI, дасу ймурадква зныз ашвъабгъьы чкIвынква гIатырххын, джьащахъвара ду азрымата йрыпхьахтI. Ауи асквш Красна Восток аквтанай апхьарта йгIалгаз рщардагIв ргвалаква гIардахIвтI, дасу йтахъыз ъачIвагIа дапхьан, абзазара мгIва дыквылтI. АгIвазаква ШаургIа АхIмади МухIамади бзита йапхьара йахъазымкIва, апхьарта уысква зымгIва джьгарта йрылалуан, йапшым аспорт квпшыраквала анкъвакъвраква рпны агыларта бзиква гIатыргун. Айщчва йшчкIвыныз айсра йапщылу ахабарква рымаджьащахъван, ауат йырзынарху акнигаква, агазет гIвыраква йрыпхьун, телебарала йырпшуан. Акыт аквтанай апхьарта йангIалга ранду лаща, офицер чын зму Шау ХIаджьмуса Къасей йпа йыргвышхварала амаршал Прошляков Алексей Иван йпа йыхьыз нкъвызгауа Тюмень йаныргIалу йхIаракIу айсра-инженер апхьарта йыцIалтI, хвысквша йапхьатI. АгIвыджьгьи лейтенант чын гIарквнадыргатI, гIвба-гIвба диплом гIацIыргатI (офицерсапер йгьи инженер). Йъадзапхьуз асквшква руацIала йгIадзынзыргылыз ранду, ран, раба, дырра гIарызтыз арыпхьагIвчва, йызцапхьаз рынбжьагIвчва, йъагIатадрийыз акыт гьырхъмаштылтI, йгIазлыцIыз аткъвым, ауагIахъа рыхв гьнадмыркъвытI. Рапхьара амщтахь бачIвбара йъагIайыз, йгIархътасыз рцри кыт апсабара ргвы аздырчIватI, апхьарта йцатI, рынбжьагIвчва йрынйатI. Айщчва – агIвазаква ангIалрала къвырльыкъв рхуштI, йызпхьаз аъачIвагIа айсыгIв шIаква азырбжьуштI. АхIмад – Хабаровск, МухIамадгьи Мурманск къвырльыкъв рхуштI. Абашырба ашвъабгъьы гIатызххыз йрыуу Эгьзакь Алина Айуб йпхIа апхьарта йгIаныршу ауарадхIвагIвчва гвып дрылан. Дшхвыцыз ланщчви лаби ашахматасра дазырбжьан, арайон анкъвакъвраква рпны йызнымкIва апхъагылара гIатылгатI, медаль, чвахъабага, чIахIра швъа гIалквнадыргатI. Йазалху акъральыгIва рхъвыхраква рпны апхьарта ауацIала зымгIва рацкIыс лбаллква рыцIа йщтIыхын. Ауи апхьарта амщтахь дъацIалыз Санкт-Петербург къральыгIва академия экономика факультет бзидздзата дгIалгатI, ауаъа лъачIвагIала дынхитI. Акласс йауу Быда Беслан йгьи Пщуна Равиль апхьарта йъадзапхьуз афутболасыгIвчва гвып йрылан, анкъвакъвраква рпны гыларта бзи йызнымкIва йгIатыргатI. ЙангIалга апхьара йцуз йгьырмайхIвапсатI, дара ртахъырала къвырльыкъвхара йцатI. Йщаласыз, йгврыхваз ачкIвынчва ркъвырльыкъвхара борч нардзата йъадырхъйуз ахъазла йызнапIыцIаз акомандирква йызнымкIва йдыртшхъватI, «Отличник боевой и политической подготовки» гвплацIа гIарквнадыргатI, разыра сальамшвъа ранчви рабачви йырзыгIарщтитI. ЙызнапIыцIаз рыргвышхварала айсыгIв фаша гьахъырымхтI, ангIалра мачвы ацIарцIан, къвырльыкъв рхитI, рхабарква пшдзата йгIагитI. Асквш 2014 агIан апхьарта «хвбала» йгIалгатI Эгьзакь Алина Муъайад йпхIа, Эгьзакь Алина Айуб йпхIа, Пщуна Арина, Напщ Темерлан йгьи КIьыча Радмила апхьарта йъагIалгуз йазынархаз агвыргъьахъв айззара апны Россия Федерация а-Баракъ щтIырхырныс гIарызхъарцIатI. Эгьзакь Алина Муъайад йпхIа апхьарта «хвбала» дангIалга Ставрополь йтагылу ЛагъьКIавкIаз финанс университет дыцIалтI. Асквш 2015, февраль а 28 «Абазаква ъабзазауа» проект дырхъйауата Ставрополь крайла йгIаныршу «Абаза» уагIахъа-культура автономия аунашвачпагIв Чагва Армида студент гвыпкI лыцта апхьарта йжвабахауа йгьи йжвизхауа аклассква рапхьагIвчва йрынйарныс, хIыбызшва, хIуагIахъа ркультура, хIцIасква рхчарала йрачважварныс йгIайтI. Ауат дрылан Эгьзакь Алинагьи. Чагва Армида Ставрополь йапхьуз, джьгарта тшгIазырбауа астудентква Эгьзакь Мурат, ДзыгIва Ислам йгьи Эгьзакь Алина ран-рабачва ахьызхIвага ртшхъвагаква рылтуата дшырзыразу лхIватI. ЙалкIгIата, Эгьзакь Алина апхьарала йгIалырбуз адырра цIола йахъазымкIва, лхIаль пшдза, лщаквкIыра, лгвапара, лпшкара гIалылкIгIатI. АхIвсса йрыуата Сурхай Алина йгьи Байрамыкъва Алина унагIва йнашылхьатI, тгIачва пшдзата йбзазитI, рсабиква гIарыцIагылитI. Асквш 2014 агIан апхьарта йгIалгаз 18-гIв йнадзитI. Абар ауат: Напщ Темерлан, Эгьзакь Алина Муъайад йпхIа, Пщуна Арина, Эгьзакь Алина Айуб йпхIа, Байрамыкъва Алина, Сурхай Алина, КIьыча Радмила, Быда Беслан, Гьабан Ренат, ШаургIа АхIмад йгьи МухIамад, Шармат Юрий, Пщуна Равиль, Тамби Аслан датшагьи. Ауат рщардагIв йапшым аъачIвагIа гIацIгартаква йапхьатI, ар къвырльыкъв рхатI, унагIва йнашылтI. РызджьакI йапшым ашвхIаусыгIваквала анйара йгIайырныс гьрылымшатI. ЙгIайыз йгIаргвалашвахыз щардапI, дырра гIарызтыз, апшдзара йазызбжьаз, ръадаб зсайыз, р-Абашта бзи йдзырбаз йапхъахауа рарыпхьагIв ДзыгIва Алла МухIамад йпхIа, ркласс унашвачпагIв Къамби ФатIима Георгий йпхIа, апхьарта адиректор ДжьмакIвыл Басира Лиуан йпхIа, арыпхьагIвчва Чква Ирина Къральби йпхIа (ужвы асабигIзарта даунашвачпагIвпI), Къардан Фася ХIазрат йпхIа, Бежан Борис Сольман йпа, Аджьбакь Инга ХIамидби йпхIа, Эгьзакь Стелла Самсон йпхIа йшырзыразу рхIватI. Асквшква агIаншара джьащахъваквала йырчвыта апхъала йчIвырхъитI, абзазара тшапсахитI. Йхъаду азгIвадара рымазтI, рылахь пшдзазтI, рмурадква гIардахIвыргIатI, ргIатгараквала руагIахъа дыргвыргъьаргIатI. Анйара йалаз хвысквша анцIра йатанйахырныс йангIалтI. «Гвала пшдза зму йгIайдахIвитI» шырхIвауа апшта, ауи анйарагьи шакIвшуш йазхъасцIитI. Хайырла, ахабар джьащахъваквала йырчвыта йазынадзаргIатI.