«АШВХIАКIВА АНЦIРАЛА СХЪМАШТЫЛРА ЙГIАЛАХАТI»

Абашта айсра Ду йашымтата йакIвшун. Акыт йгIатахатI атажв-лыгажвква, апхIвыс шIаква, асабиква. Ахъачва зымгIвагьи айсра йпшцIан. АчIвыуапхьаква гьашIамсуазтI, мшигIадза апхIвыс чвзабаква, асаби йыбаква щардагIвхун. Акыт гвыргъьаракIгьи гьтахмызтI, ауагIа рылахь аквырщщын, зымгIвагьи джьабун. Асквш 1942 август агIан акыт йгIаталыз анамыцаква асквш 1943 январь йантырцах хIтгIачва акъарчаква зтыргаз Къзылпагвын кыт хIхъаржьылтI. Ага счкIвынызтынгьи, сгIвылакI йрыцIаркIвапI ахъылагъь чкIвын уантаххра акытцIыхъвала АйсанргIа Мельхангьи дхIыгвлата хIъабзазуз. Ауи азаман сара агIсквшаквакI сыртахарын. Саба АхIмад акыт йадырбагъьалыз ПрирезкIа адгьылшта даъата уахъгьи тшынгьи дынхун. Сан Сата йшылхIвахуазла, агъны чгIвычалагьи фачIвылагьи йгIапсауа нартыхв ашIырхуан. АпхIвысква йашIырхуаз анартыхв саба чвуандырла ахчарта йгIайгуан. Зны ауи анартыхв ангIайг абригадиргьи йъахIыльчвагьи амца жуа-жуа йадзхъачIвата нартыхв дрыдзуа дгIарынйатI. Ауи азаман арахьарат амла йагауа, йакъвыжвжваз агванчрыкъвква рыщачвква гIаркIылпшуа асыхь йылата нартыхв ашIырхитI. Саба «Йучпауа гьауам» йхIван, йзымчхIауата абригадир дизактI. Ауи амщтахьла дукI йнамихуата «авласть агъа» хьзы зпырщылыз тгIачва къомкI рцри шта йтыргауа йалагатI. Ашвъа змата йныкъвуз «Швара швгьаным, швгвы швыртынч» рхIватI. ДукI ахъымцIуата дара ауат атагIайхын, «Шваргьи шваныпI, тшадыжвгал» рхIвахтI. Йшаъазла, зджьакIы «райгвыгIврала» йтыргушыз атгIачваква рыцIахь къарандашла хIацIаргIвхтI. ХIан рыцхIа дчIвутI-дкъутI, асабиква МутIалиб, Нарыкь, Умар, сара хIадылгалтI. АчIвызйа ауи азаман чгIвычата йхIымаз, рызкъыта йнахIахвуашыз? ХIангьи хIаргьи йгIаншауа гIахIгвнымгIвуа уандыркI хIаквдырчIван, Нарцана тланыкъвала хIджвыквыргатI. Сан амгIва аура шабгаз лыладз дакIвабауа днайтI. Кисловодск айхамгIва станция апны йхIызпшуаз апоезд йара вагонкI йхIыцаквчIватI акытла йнатыргаз ХвытI ХIасамби йтгIачва, ДзыгIва КIаражь, Джьмакъвыл ХIасамби, Къарабаш ЦкIыра датшагьи. Ауи азаман хIащахIба КIарнин Абашта айсра Ду алгъачI далан, агенерал Доватор унашва зхъицIуз акорпус далата дайсуан. ХIанашIашвах йшихIвахызла, хIатлата дхвхан, Тбилиси агоспиталь дыцIашватI, уацIыхъван Кисловодск дгIаргхтI. Ауаъа «УтгIачва тыргитI»-хIва йнйархIв, йхвыртагьи йхъаштылхын, зынла айхамгIва станция йнайырдзатI. Ауаса атгIачва дгьгIахIнымйахтI. «Йара ужвжвы апоезд джвыквылтI, хвдакъикъакIла угIахьшватI» гIайархIвтI. Асквш 1945 акIвшун, гънын. Авагон ауацIа сайщчвагьи саргьи хIан хIлыдырщщылта хIалачIван. АмгIва хIъадзаквыз, хIъаргаз Таджикистан гвакъвпрата хIызшIашваз, гIапсарата йыгIбаз ажвала йгьузыхIвушым. ПрирезкIа йынхуз хIабагьи хIхабар анйархIв дхIыщтанайхтI. Къамыш зквыз нышв тдзы чкIвынкI хIыцIан. Арызкъы къытын, мгвала хIгIапсун. Уатра, рахвы, бзазага гьаъамызтI. ХIаба дынхун, сайщчва ахIбачва абамбихъыхра йапщылан, сангьи сара дсхьпшуан. Агвакъвпри агIапсари хIаба мгIва гьйырымттI. ДанхIызнайх хымызкI рахIа мцIуата адуней йхIваджьтI. ЦымызкI анцIы йхIчвыхъарамкIва йбзазуз Джьмакъвыл ГIвзер йпа КIазбеки йпхIа Льольи «Шваща КIарнин дгIайтI»-хIва йаннагварахх хIгвыргъьара гIвына гьамамызтI. Ауат рцIыхъвала дхIагIата, дпшдзата, йшвыз айсра фаша йынгIалуата, йгвпы артшхъвагаквала йхърыста КIарнин днагваралтI. СгIвылакI йрыцIаркIвапI ауи акытла йнатигата йхIызнайгхыз ачгIвычаква. ХIара ауат ачгIвычаква гIахIгвыцIахIхIвхIван, ба рахIхIвуа йахъахIцIатI. КIарнин хIаба рыцхIа дъайымбахыз хьыгIа дута йзалтI, гвжважвагIвала дъацIаз анышвынтара дцатI. Ауи хъацIара ду йылан. МутIалибгьи Нарыкьгьи бамбихъыхра йыгьйымщтихтI. ДгвыжвкIта ауат йрыщтанайыз абригадир швара йымдыруата къалата дипшIагылтI. Ауи мчыбжьыкI ауацIа чарагьи жврагьи йымамкIва хIшвъаква рцIыхъва дтагылан. Амара хъвжвыкIьуата «Абар швызлакъванчам ашвъа, хIцахитI, тшадыжвгал», – йхIватI. ХIан рыцхIа «ЙхъвлитI, КIарнин, хIабацуш, йамуазтынгьи щымта щажьыта хIджвыквылхпI» лхIвазтIхIва, «АмгIва хIпхьузтынгьи, уахъа араъа хIгьгIатахушым», – йхIван йыгьйымуытI. Абарауаса КIарнин Умар йнапIы йымата, сара йыхъвда схъачIвата, арахьарат сайщчвагьи сан йлыцта ахъвлапын хIгIагварцIын мгIва хIгIаквылхтI. МшквакI апоезд хIаквчIвата хIгIамгIвайстI. Кисловодск апоезд хIангIакIныцI йнахIпыралыз заманкIла хIъабзазуз Къзылпагвын хIгIаргхын, мачIкI тшабахIыркIындзыкIьара Кълыч МахIмуд йунагIва хIаъата хIбзазатI. УацIыхъван акъарчаква гIайхуа йаналага хIкыт хIгIаталхтI. ХIбзазарта ужвы хIащахIба КIарнин йычкIвын айцIба Зауыр дъабзазауа акIвын. Атыдз чIвры чкIвын хIзыгIвназ сгIвылакI йрыцIаркIвапI. АтгIачва зымгIва абацынхъвыта йхIхъарпаз, хIацIазыгIзаз, хIадызкIылуаз КIарнин йакIвпI, йыкву анышв бамбита АлахI йзичпаргIатI, зджьара йгIанымхауата сизыразпI. Ауаъа зымгIвагьи хIунагIвахатI, дасу хIбзазара джвыквхIцIатI. Сайщчва ахIбачва КIарнини МутIалиби (ауат ран данырхъыдзгIа хIаба сан хIгIайгхын, Нарыкь, Умар, сара хIлаухтI) йара кIьадыгвкI ртыдзква кIьыда-кIьыдата йыруыхван, рхъапщылаквагьи даргьи уара-сарата йацбзазатI. АгIвыджьгьи рынцIра шабгаз арахвырхIара йапщылан, гвыцкьала йынхатI, рхъацIара, ргIвычIвгIвысагIара, рынбжьагIвыгIара шдууыз йыздыруаз йырхIвахитI. Ауат йрыщтагIайуа Нарыкь асовхоз шоферта дынхун, ауи «Сбзазарта хъарапI, аныкъвара счвыбаргвпI» – йхIван, асовхоз агараж йаргванта адгьыл гIарыквихын, тдзы тайчпахтI. Ауи йхъахьла, гвлата дгIайыдзхъачIвахтI хIащайцIба Умаргьи. Саргьи асквш 1964 агIан сайщчва йырчвыхъарамкIва йбзазуз Байкъвыл ЗамахIщари сылахь данылтI. ТгIачва ду срыланагатI, ауаса санхъвагьи, сабхъвагьи, ауат ргIариквагьи уагIа тынчын, заджвы йычвгьара йгьаламызтI, йызцбзазуз йрангIалуан, рхабза пшдзан. Сабхъва МутIалиб дхъацIа нхагIвын, йыхыгIвпачвагьи йара йапшхатI, ПIатIагьи, Усыфгьи, схъапщыла ЗамахIщаригьи рынцIра айхIара арахвырхIари ауасархIари йырпщылан, гвыцкьала йынхатI, йбзазатI. Санхъва Гващсахв дкъабардын, ПервомайскI дауан. АгIвыджьгьи «атаца» - хIва снысла адзы йахвун, йсзыразын. Схъапщыла ЗамахIщари асквш 2016 агIан адуней йхIваджьтI. Акъыльаквшвара, абагвынгIвыра, ацацхърагIара хIызбжьата сквш 52 хIацбзазатI. СизыразпI, АлахI йдуу джьанатла дйыргвыргъьаргIатI. Сара сынхара, асабиква анхвыцыз акIвмызтын мшкIгьи йгьашIасымрыстI. Ар Роза унашва зхъылцIуз адгьылрхарджьыгIвчва гвып срылата нартыхв срашватI, кIартIоф гIацIазгатI. Сквш къомкI руацIа Кисловодск щапIхъацIачпарта адкIылара йачIвыта акыт йтагылаз ацех сынхатI. «Ветеран труда» ЧIахIра гвплацIа, йапшым артшхъвага швъаква, асогIаква гIасквнадыргатI. Схъапщыла ЗамахIщарии сари пщгIвысабичва гIадзынхIыргылтI, йахIрыпхьатI, тгIачва пшдзата йхIчпатI. АхIба ХIауа акыт ГIапргIа дыртацапI, гIвпачва лымапI. Ауи йлыщтагIайуа Хасен Кисловодск дбзазитI, хгIвыпхIчва йымапI. Сара йсыцбзазауа Хвсей гIвпачви пхIакIи йымапI. АйцIбадза Джульетагьи Кисловодск дбзазитI, хгIвысабичва лымапI. Ссабиква рсабиква рызджьакI унагIва йнашылхьатI, таца дгIаргхьатI. Абазагьи, даргингьи, къарчагьи айгвачвата йхIымапI, зымгIвагьи ащтаныкъвара пшдза хIызбжьапI. «Па дуымазтын, тацагьи дуымапI» рхIвитI абазаква. Сара йсыцбзазауа спа Хвсей йапш адуней дыквта йыгьхъасцIарым. Стаца ФатIима лакIвпIта, дзыгIзаз, акъыль пшдза гIалылазцIаз, хIцIаскви хIхабзакви лзырдырыз лаба Зальымхани (йахрат пшдзахарагIатI) лан Фаини сырзыразпI, АлахI дгIарзыразхатI. АтгIачва акъыльаквшвара хIызбжьапI, хIбжьы щтIыхта заджвгьи йгьимагIастI. Атаца лакIвпI хIбзазара злащаквгылу. ГIапсара гьылдырам, ажвква лхьитI, ауатра дазынадзитI, амацIаура дазычпапI, асабиква йыртахъу налырхъитI. РахIа дангIапсарагьи лылахь аквыта дгьубушым. Сара кIважвата счIвапI, сгвы зызгIайуа арызкъы йанакIвызлакIгьи сайшва йхвынгылапI, счварта цкьапI. Хвсей йпахIба Мурат Санкт-Петербург йтагылу Айсра-Тенгьыз политехника институт й-5- хауа акурс дапхьитI. Ауи йагIвсыз апхын Севастополь адзыцIахь хъвыхIква рпны атшыбжьараква данырхъыс амщтахь бачIвбара дхIызгIайтI. «Ммаду бгIасгвалашватI»-хIва йыли йпси сырзигауа мшквакI дхIылан дцахтI. Ауахь дъанугьи сгьихъаштылуам, телефонла запыт дгIасызцIгIитI. Мурат йыщтагIайуа, сгвы ззыбжу, хьапщырчIвачIвата йыгIбауа Бэлла щарда мцIуата жвагI сквша лхъыцIтI, аныкъвадыкъвара йапхъахауа агвып гIалырттI. Ауи дгьныкъвум, лнапIква гьлыхъвум, бзита дгьызчважвум акIвымзарквын, швабыжта дгвыбзыгъапI, лшIахъа йанакIвызлакIгьи агвыргъьара тапI. Лажваква нархъамызтынгьи, лгвы йту зынла йгIаугвынлыргIвитI, дыззыбжу улырдыритI, уызлалцIгIауа закIгьи джьауапдъа йыгьгIанхум. Ауи абаза телебарала йгIартуа закIгьи ахълымрыпауата дапшитI, хIуагIахъа рмакъымква лтелефонла йбыжьгитI, бзи йылбауа лцриква рсуратква ауи йтапIта, йанылтахъу дырпшитI, телефонла драчважвитI. АйцIбадза Адамгьи й-8-хауа акласс дапхьитI, атгIачва цIагылагIв багъьата дхIымапI. Сайщчва рыуа заджвгьи адуней йыквхмызтынгьи, рсабиква сгьырхъаштылуам, «Щаща, бызгIвадара шпаъу, бгIахIгвалашватI»-хIва телефонла йгIасызцIгIитI, заман шрауа йсызгIайитI, сунагIва йгIаншауа агвыргъьахъвква дрыпшдзитI, цIагылагIв багъьата йсзалитI. Заманта йагIвслакIгьи йапшым ауагIахъаква рылахь пызтшыз, йщаквызрысыз, лдзгIара ду рызгIазгыз аполитика репрессияква ухъызраштылуаш гьгIаншушым. Сара схъатала агIсквша рахIа сыртамкIва гIвыма шта сыршыштI, саба ауаъа йчIвылахъвхатI, сан рыцхIа гвакъвпрата йылбаз, швхIакIвата дызшIашваз, ладзыта йыцIылщтыз анцIрала схъмаштылра йгIалахатI. УахьчIва бзазаща пшдза зму хIсабиква ауи апш рыцхIагIа пхызта АлахI йдимырбатI.