АШВАРАГІВАРАДАРА ХАБЗАКВА РМЫГІВХЪГАРА РЫЦХІАГІА АЩТАГІАЙТІ

Россия МЧС КЧР-ла а-Унашвачпарта знапІыцІу ШАРКОВ Сергей йгьи згІвадарахчарала КЧР аминистр ШАМАНОВ Казим Зеленчук район, Дукка апны пхаста йалашваз атуристква цхърагІарата йддрадзаз хІреспублика а-Хъада ТЕМРЕЗОВ Рашид дахадыргІвазатІ. Ауаъа тшпсщара йгІайыз быжьгІвы тларыджала атагІвзра йаквыргІапсым ашІыпІа йаъата йгІабгъалыз асы йцІанакІытІ. Атуристква абыхъв агьабадза вертолетла йгІапссгІатІ, МЧС ашІыпІа хъвшара апны ашвъа тшгьанрымцІатІ, йъагІатагІвзуаш дара ракІвымкІва заджвгьи йыгьйымдыруазтІ. Ауи йапшу аъаща рыцхІагІа йалашваз цхърагІара драдзара танащахІитІ. Агвып йрылаз заджвы дпсытІ, датша заджвы реанимация дыцІашватІ, анахьанат йхІатлам ахвыртаква радзатІ. Темрезов Рашид атуристква медицина цхърагІара шддрадзауа дахъпшылырныс Шаманов Казим йыхъвдаквицІатІ, МЧС аъачІвагІагІвчва ауат апоселокдза йгІабгъагахра датшагьи ршварагІварадара адгалрала ауысква йырхъпшылуаштІ. – ХІышта тшпсщара йгІайуа ашвъа йанцІарала МЧС а-Унашвачпарта анхара рыджьгарра атахъыпІ, атуристква атызрыпауа авертолетквагьи амаль амамкІва ахчагІвчва ршвъа тшанырцІара атахъыпІ, – йхІватІ Темрезов Рашид. ХІреспублика а-Хъада Къарча-Черкес йгІайуа атуристквагьи тшырзынайырхатІ: «Швара швшварагІварадара швазхъвыцуата тшпсщара швангІайра МЧС анхагІвчва ахабар дшвырдыр. Ауи ащхъа тларыджала йгІатагІвзуа йгьырхъазым йыззынарху, абыхъвква рпны йаъу зымгІва рыцхІагІакІ йаламшвара ахъазла МЧС КЧР-ла а-УнашвахъцІарта асайт гІадрысабапуата электронна амальла ашвъа тшанырцІарныс рылшуштІ.»