АСАБИКВА РЫДЫНХАЛРА АГЪЬЫРЧIВИТI

 «Успех каждого ребенка» федеральна проект апкъ йтата хIреспублика апны асквш 2020 йгIашIарышвта асабиква ртшауацIыхра йацхърагIауа амальква лырхитI. Арыпхьара программала асабиква дырра рыртра йахъазымкIва, афизкультури аспорти йхъырхуа, асуратгIвра, агIахIвра, ашвахIвара йырзычпу рыдынхалра адыргалуата апрограммаква абзазара йаларжьитI. – Хвысквша угIалагата жвагIсквшадза йырту асабиква ртшауацIыхра йазалху программата 1439 цнархаракIла йдрыхIазырхьатI. Ужвыгьи 29260 хIрылапшра атахъыпI. Збальыгъ йнамдзас асабиква рпроцент 80 (зыкь 63-гIвы) тшъарбжьуш, йъарыдынхалуаш асквш 2024-дза йгIанхIыршарныс хачIвы хIпырапI, – йгIалылкIгIатI арыпхьарали наукали КЧР аминистр КРАВЧЕНКО Инна. Ауи йшылхIвазла, асабиква кIьыдата рыдынхалра адыргалра ахъазла арыпхьарали наукали, культурала, физкультурали спортли КЧР аминистерстваква рылапш йыцIу анхартакви аорганизациякви аргваныта йацынхитI. – Йапшым анархараквала асабиква рыдынхалра анзыргIалуаш а-Квта ахъвшараква хIреспублика жвыгIв районкI рпны йынхуштI. ХIара сабипхьадза штшауацIихуа гIдырра ахъазла ари ауыс йахъпшылуа аъачIвагIагIвчва йанакIвызлакIгьи архъвыхраква акIвдыршалуштI. Ари ауыс ахча азынахIырхуштI. Ауи шхIчпушгьи хIазхъвыцуаштI, – йгIалылкIгIатI Кравченко Инна. Айззара йалаз «Целевая модель дополнительного образования» абзазара йалазжьуа афедеральна ъачIвагIагIвчва гвып рунашвачпагIв КОСТИН Александр йшихIвазла, асабиква дасу йыззычпу, рылшараква гIарыбергьыльра, талант злу йрыцыркIуаштI. – Афедеральна проект абзазара йалагIжьуата йгIалхIкIгIаз ахачIвква зымгIва хIырхъйара ахъазла Россия асубъектква ршвапха тшахахIыргIвазитI. КЧР апны агородкви арайонкви рхъадаква асабиква рыдынхалрала ашIыцра йацыркIырныс, ауысква шакIвшауа рхъатала йахъпшылырныс тшырзынасырхитI. АхачIвы шмайрам йгьи ауи ласыта йшхIзымырхъйуш гвынгIвырапI, ауаса, уахьчIва хIызлачважваз ауысква ашвъаква рпны йгIарбу апIатла хIтымцIуата йхIырхъйара атахъыпI. АзцIгIара зму швымпхащауата швазцIгIала, хIара хIшвцхърагIарныс акIвпI хIызгIайыз, – йхIватI Костин Александр. ХIреспублика апхьартакви арыпхьара организациякви рпны ашIыцра абзазара йаларжьуата ахвыцква рыхъазла йапшым атшыбжьартакви акружоккви гIахъыртIитI. Ауат рпны зхъа йадынхалырныс, йыргвапхауа ауыс тшазызбжьарныс зтахъу рыхъазла «Навигатор для дополнительного образования» сайт (р09.навигатор.дети) гIандыршатI. Ан-абачва рсабиква ауаъа йгIарбу акружокква йырщти йахвитпI. Айззара йалаз аъачIвагIагIвчва йшгIалыркIгIазла, «Успех каждого ребенка» федеральна проект апкъ йтата арыпхьара, акультура, аспорт нхартаква рпны зъарагIв саби адрыпхьуш, йырбжьуш йгIаквхта акIвпI бюджет ахча шырзалырхуаш. – Йапшым анархараквала йгIахъыртIуа акружокква ахчата йырзынадырхуш асабиква рпхьадзара йгIаквырхуаштI. Апхъала зъара гвып йнадзалакIгьи заманкIла йщаквдыргылуаз акврыдзраква гIадрысабапуан. Ашвъаква йырнуи йадрыпхьауи аквшвара, абюджет ахчаква сабапра гIаргуата йгIарысабапра ахъазла ари ашIыцра гIаджвыквырцIатI. Асабиква кIьыдата рыдынхалра йазалху апрограмма хIкъраль асубъектква рпны йшдырхъйауа хIапшрык