АСАБИКВА РГВТАРАКВА ДЫРХЪЙАТI

Россия а-Президент Путин Владимир йгIаджвыквцIарала акъраль зымгIва гIацIанакIуата йагIвсыз асквш декабрь а 21 йакIвшаз агвчIагIвра акция хIреспублика а-Хъада Темрезов Рашид йхынхауата далалтI. КЧР а-Правительства Тдзы ауацIа йдыргылыз «Ёлка желаний» амзагIв цIла апны йбаргву бзазара аъаща йташваз асабиква ргвтараква зныз аоткрыткаква кIнырхIатI. «Надежда» республика социальна-реабилитация Квта, «Забота» республика саби тдзы-интернат йаныргIалу 200-гIв ртахъыраква дырхъйарныс хъвдаквцIарата йнарахвтI КЧР а-Хъада ТЕМРЕЗОВ Рашид, РФ а-Федерация а-Совет йалу САЛПАГАРОВ Ахмат, КЧР АуагIа Айззара (а-Парламент) а-Председатель ИВАНОВ Александр, КЧР а-Правительства а-Председатель АРГВЫН Мурат. Ауат йырхъазымкIва КЧР АуагIа Айззара адепутатква, а-Правительства йалу, хIреспублика а-Хъада й-Администрация анхагIвчва ари агвчIагIвра акция йацыркIтI. Асабиква ргвалаква йрылапI йапшым ахъвмаргаква, агаджетква, аспорт чгIвычаква, зылаква бзита йрымбауа йырзалху апланшетква, музыка микрофон датшагьи. ХIреспублика а-Хъада амзагIв цIла йгIакIнихыз аоткрытка йаныз йырхъйатI, асаби йсогIа йара ауи амш йнапIыцIашватI. Ахьта Дада асабиква Темрезов Рашид йсогIаква рзигахтI. АгвчIагIвра акция йалалыз зымгIва Асквш шIыц гIатамылскIва асабиква ргвтараква дырхъйатI.