АРЫПХЬАГIВЧВА РШВАПХА АМЫРДАТI

Апрель а 26 Черкесск й-19-хауа Гимназия апны «Созвездие талантов» ашIыпIаква рарыпхьагIвчва йапхъахауа рфорум акIвшатI. Ауи йалан арыпхьарали культурали Абаза район а-УнашвахъцIарта знапIыцIу Мартаза Зимфира дзунашвачпагIвыз агвыпгьи. Айззара йгIадгылтI КЧР а-Правительства а-Председатель УАЗ Аслан, арыпхьарали наукали КЧР аминистр КРАВЧЕНКО Инна, ареспублика апхьартаква рарыпхьагIвчва, Дагъстан Республикала йгьи Краснодар крайла «Учитель года – 2019» шIыпIа анкъвакъвра йапхъагылагIвхаз арыпхьагIвчва. Афорум апны «Асквш арыпхьагIв – 2019» йгьи «Цри бызшвала асквш арыпхьагIв – 2019» КЧР-ла анкъвакъвра ацIыхъвагIарбараква гIархIвахтI. ЙынджьыгьчкIвын квтанай апхьарта арыпхьагIв ДЖЬАНЫМБЕЙ Светлана Зауаль йпхIа йхпахауа агыларта ъагIатылгаз арайон ахъазла дахIвра духатI. Светлана Зауаль йпхIа йакIвлыршаз йхътIу апхьара сахIат йгьи финанс гIальмала амастеркласс хвду аквырцIатI, «Развитие логического мышления у детей на уроках математики» проект йахаргIвазара бзидздзата йгIалдахIвтI. Арат йрапшу айззараква арыпхьагIвчва рынхара апIатIу йгьи ръачIвагIадырра щтIыхра йацхърагIитI, ршIыйара гIазырбауа йынхауа арыпхьагIвчва рдахIвраква асогIаквала йгIалыркIгIитI, апедагогика ашIыцраква йагъьу анхара швапхаква ацагIвыршарныс рылдыршитI.