АРЫПХЬАГIВЧВА АСОГIАКВА РЫРТТI

«Асквш арыпхьагIв 2020» йгьи «Асквш абжьагIвы 2020» Россия арыпхьара анхагIвчва ранкъвакъвраква йрапхъагылагIвхаз хIреспубликала йагъьу арыпхьара анхагIвчва КЧР а-Правительства Тдзы апны артшхъвагаква рырттI. Айззара йалан КЧР а-Правительства а-Председатель йапхъахауа йзаместитель ТАМБИ Руслан, арыпхьарали наукали КЧР аминистр КРАВЧЕНКО Инна, ауи лзаместитель БЕКИЖЕВА Фатима, арыпхьагIвчва рпрофсоюз организация аунашвачпагIв БЕСЛЕНЕЕВ Мурадин, арыпхьагIвчва, абжьагIвчва. Тамби Руслан анкъвакъвраквала йагъьта йгIалыркIгIаз арыпхьагIвчва йхъатала драйхIвахIвырныс ъайылшаз шигвапу гIаликIгIатI. – Коронавирус згIва йгIалцIла айззараква рыкIвыршарала онлайн амаль гIадрысабапитI. ХIсабиква зыгIзауа, йазрыпхьауа аъачIвагIагIвчва схъатала съашвынйаз швабыжта йсгвапапI. Агвы йгIатыцIуата швгIатгараквала сшвайхIвахIвитI, апхъахьылагьи згIвадара багъьа швымата ймайрам, ауаса абзазара йатахъдзу ауыс дахIврала йшвырхъйарныс швзыстахъпI, – тшырзынайырхатI арыпхьагIвчва Тамби Руслан. Кравченко Инна йшгIалылкIгIазла, арыпхьара анхагIвы хвы шйыму, йырхъйауа ауыс абзазара йшатахъдзу гIазырбауа «Асквш арыпхьагIв» анкъвакъвра талант злу, асабиква рарыпхьара гвыхътIыла йазынхауа рыхьыз хъарата йаргитI. – «Асквш арыпхьагIв 2020» йгьи «Асквш абжьагIвы» анкъваъквраква асабиква йрыдынхалуа аъачIвагIагIвчва рылшараква гIахънатIитI, ръачIвагIа-дырра йаланархIитI. Анкъвакъвраква рыпкъ йтата бзита тшгIазырбаз арыпхьагIвчва, абжьагIвчва апхъахьылагьи агIатгараква рымата йшынхуш йазхъахIцIитI, – йгIалылкIгIатI Кравченко Инна. Бесленеев Мурадингьи згIвадара багъьа, агIатгара шIыцква рзитахта арыпхьагIвчва драйхIвахIвтI. «Асквш арыпхьагIв 2020» анкъвакъвра йгъьта йгIалыркIгIаз йрыуу «Мамонтенок» сабигIзарта (Черкесск) знапIыцIу Быджь Светлана йшылхIвазла, асабиква йрыдынхалуа аъачIвагIагIвчва шIаква ртшауацIыхра ахъазла анкъвакъвраква ракIвыршара мгIан ду амапI. – Апхъахьыла хIсабиква азрыпхьуш, йызбжьуш аъачIвагIагIвчва ррыхIазырра апны «Асквш арыпхьагIв», «Асквш агIзагIвы» анкъвакъвраква рцхърагIара гIарысабапра атахъыпI. АшIаква сквшщарда йынхахьу аъачIвагIагIвчва рынхара швапха гIадрысабапуа ртшауацIыхра йазынхарквын агIатгараква йырзынадзуштI, – йгIалылкIгIатI Быджь Светлана. «Асквш арыпхьагIв 2020» йгьи «Асквш абжьагIвы 2020» анкъвакъвраква рсогIаква гIазыртыз йрыуапI Къарапагва кытла Ардзинба Владислав Григорий йпа йыхьыз зхъу арыпхьара Квта апны математикали физикали арыпхьагIв КIЬЫЩМАХВА Дина Дольат йпхIа, ауи апхьарта апны йгIаныршу асабигIзарта абжьагIвы БУЛКАЕВА Виолетта Мырзабакь йпхIа.