АРХЪВЫХРАКВА РГІАРБАРАКВА ГІАРПХЬАДЗАХТІ

КЧР а Правительства Тдзы апны архъвыхраквала акъральыгІва комиссия алачІвара акІвшатІ. Ауи даунашвачпагІвпІ Къарча Черкес Республика а Правительства а Председатель йзаместитель УАЗ Мурат НыхІв йпа. АлачІвара апны йжвизхауа акласс йгІалгаз ЙазакІу архъвыхраквала йгьи йжвбахауа акласс йгІалгаз Йхъаду акъральыгІва рхъвыхраквала ргІарбараква йрылапштІ. Къарча Черкес апны ЙазакІу акъральыгІва рхъвыхра (ЕГЭ) 12 пред меткІла йадыргалтІ, ауат 1616 гІв рылан. Ари апхьадзара цІыпх агІарбара ац кІыс 12 проценткІла ймачІпІ. ЙгІачважваз зымгІва арыпхьарали наукали КЧР а Министерства, ауацІа уыс квала а Министерства, згІвадарахчарала КЧР а Министерства, Йазалху асвязьла а Унашвачпарта, «Ростелеком» ашІыпІа хъвшара рацынхара абзи рала архъвыхраква йадгалата йшакІвшаз гІалыркІгІатІ. ХІыштала йгІаныршаз а 17 пункткІгьи видео ргІапсгала, датшагьи йатахъу зымгІвала йадгалан. Архъвыхраква йшгІадырбазла, ангьльыз бызшвала, историяла, информати кала, физикала, химияла, урышв бызшвала апхьарта йгІалгуз рдырраква гьгвым хам. Уаз Мурат архъвыхраква мыгІвхъгарадъа йшакІвшаз гІаликІгІатІ, ЕГЭ йгІа лалыз ашІыцраква зымгІва хIышта апынгьи йдырхъйарныс шрылшаз йхІватІ.