АРШІЫЙАРА АЙАЧІВАКВА

Россия асуд приставква р-Федеральна къвырльыкъвхарта йгІадзынгылуа абанпара рыдынхалра гватра ду азалнахитІ. Асквш 2008 угІалагата ауи йаднагаллауа «Хрустальные звездочки» россия фестиваль-анкъвакъвра ахабзахчара йгьи акъральыгІва власть органква рынхагІвчва рсабиква йрыуата ршІыйара злу ргІарыбергьыльра йазынархапІ. Анкъвакъвра йапдымрышвтуата йгІалалитІ ФСБ, МВД, акъральгІвынахчара къвырльыкъвхарта КЧР-ла рунашвахъцІартаква. СынчІва йапхъахауата ауи йацыркІтІ АуагІахъа гвардия, ахІаквымква рхъйарала акъвырльыкъвхарта, амонополия йапшIагылуа къвырльыкъвхарта, а-Пенсия Фонд КЧР-ла ахъвшара. Ауат рынхагІвчва йырсабита ари асквш анкъвакъвра 160-гІв раъара азнаддатІ. Ауат йгІарылырхыз а 60-гІв Черкесск акультура Тдзы асцена апны ргІахъвмарра апшыгІвчва ргвы пшыхь танарыстІ. Ажюри ауат йгІарылырхуаш дрымдыруата хачІв баргвы рпахь йгылан. Ауаса анкъвакъвра ацІыхъвагІарбараква ангІарпхьадзах апхъагылагІвчва бергьыльхатІ. «Исполнительское мастерство» номинацияла 7–12 сквша йырту руацІала йапхъахауа гыларта – «Созвездие» ансамбль, йгІвбахауа – МЕРЕМШВАУА Малик, йхпахауа – ШЕВЧЕНКО Алёна йырквнадыргатІ; 13–18 сквша йырту рыуа апхъагылара ргатІ абаян асыгІвчва КОБЫЛКИНА Анна йгьи ХАРИБОВ Роман, йгІвбахауа – МЕРКУЛОВА Юлия, йхпахауа аккордеон асыгІвчва СОЛОМАХИНА Виктория йгьи КУКОЛОВА Мария. «Вокал» номинация йалаз 7–12 сквша йырту ашІаква рпны «Радуга» ансамбль агъьхатІ, ауат дрыщтагІайтІ ДЖАУБАЕВ Руслан, йхпахауа агыларта лчІвхатІ РАСПРУГИНА Полина; 13–18 сквша йырту руацІала АПАЧЕВА София дгІалыркІгІатІ, ауи мачІкІла йгІалхьшваз КАРАСОВА Алина – йгІвбахауа, МИХАЙЛОВА Виктория – йхпахауа агылартаква ргатІ. «Хореография» ршІыйарала 7–12 сквша зхъыцІуа ашІаква йрайгІайтІ «Юлдуз» гвып агІахІвыгІвчва, йгІвбахауа агыларта ркІытІ ахыгІвхІвсыса ЭРКЕНОВА Диана, ЛАМХЪВА София йгьи ТЕБУЕВА Арина, йхпахауа «Акварельки» ансамбль йырквнадыргатІ; ахІбачва ргвып йалаз «Ридада» ансамбль шагъьула заджвгьи гвыгІвбара гьгІайыламшватІ, йгІвбахауа агыларта – «Конфетти» ансамбль йыргатІ, йхпахауа – МЫЛЬНИКОВА Дарья йгьи ГУРИНА Мария рдуэт. ХІреспубликала йакІвшаз «Хрустальные звездочки» фестиваль апны йапхъагылагІвхаз йащтагІайуаш акьазу апны йатанкъвакъвхуаштІ.