АРШIЫЙАГIВЧВА РТЫДЗТАЛХЬА

Къарча-Черкес Республика а-Хъада ТЕМРЕЗОВ Рашид Устьджьгваты район йаланакIуа Важна кыт апны акультура Тдзы гIахъитIытI. Агвыргъьахъв йалан КЧР а-Правительства анхагIвчва, КЧР АуагIа Айззара (а-Парламент) адепутатква, Устьджьгваты район абзазагIвчва. Темрезов Рашид хIкъраль а-Президент Путин Владимир йгьи Россия Федерация а-Правительства йалу акытква ртшауацIыхра йшацIыркIуа гIаликIгIатI. – Акытква рпны амгIваква, адзцагаква, агазцагаква ргIаршIыцхра, афельдшер-акушер пунктква, апхьартаква, асабигIзартаква, абари йапшу акультура тыдзква ргIахътIра магIын ду амапI, – йхIвитI Темрезов Рашид. – Къарча-Черкес Республикала йцIыхъвахауа агIвысквша руацIа аршIыйагIвчва ъагIвнанхуш, абзазагIвчва рыхъазла йапшым агвыргъьахъвква ъакIвшуш культура тдзыта 20 айхIа абзазара йалагIжьтI. Жвасквшапхьадзара йызхьымпшуата йгылаз акультура нхартаква раъаща гврыдзган, ужвы ауат ркапитальна рчIаджьрала анхараква гьашIасуам. Ауат зымгIва ззыхIчпауа йгIахIыцIагылуа ракIвпI. ХIсабиква йырбауа акIвпI ртшауацIыхра зпщылазлуш. Кытипхьадза акультура тдзы апны акIвпI агвбайара, ажвлара уысква ъакIвшауа. ЙгIахъхIтIуа акультура нхарта ахIбачвагьи чкIвыныргIагьи ргвы йнадзушта хIгвыгъьитI. УахьчIва Важна кыт абзазагIвчва йыргвыргъьахъвпI, ари акультура Тдзы асабиква рбжьыла, ашваквала, амакъымквала йанакIвызлакIгьи йырчвызтI. ХIреспублика а-Хъада й-Унашвала ари акультура Тдзы йалачпу абиблиотека акнига шIыцква азалырхитI. Акыт абзазагIвчва рыхьызла Джазаева Надежда Къарча-Черкес аунашвачпагIвчва, ауыхвагIвчва аразыра ажваква рзыналырхатI, акультура Тыдз шIыц апны зныбыжьла йапшым аршIыйагIвчва йрымагIальамату нархаракI штшадыркIылуаш, акытлагIвчва ртшпсщара гвлахIарата йшакIвшуш йшазхъалцIауа лхIватI. Важна кыт акультура Тдзы ауыжвгIанчIви тахъыраква йрыквыргIапспI, зызгIвадарала зылшараква ахъарысу шзынашылуаш апшта йаныргIалпI, асвет йгьи абжьы злащаквдыргылуа ъамапсымаквала йадгалапI. Аконцертква йырзалху азал чIвартата 250 амапI. Абиблиотека уыжвгIанчIви компьютер техникала йадгалапI, Интернет йашIарышвпI. Ари акультура нхарта апны агIахIвра, ашашкаква, ашахматква, асуратгIвра, йапшым анапIлачпараква тшрыдызкIылра зтахъу рыхъазла акружокква нхуштI. Темрезов Рашид акультура Тдзы аныргIалща дапшытI, ауагIахъа напIлачпараква ргIарбара тшахайыргIвазатI. Йхпахауа акласс апхьагIв Дотдаева Аминат ацIгIвыпа йгIалху, ащхъаква гIазырбауа асурат КЧР а-Хъада согIата йылттI.