«АРХЫЗ XXI» ЦIАСХАТI

КЧР а-Хъада Темрезов Рашид йацикIуата сынчIва «Архыз» туристрекреация комплекс апны «Архыз XXI» ЛагъьКIавкIаз къральгIв форум йхвынхауата йакIвшитI. Ауи йалан СКФО-ла РФ а-Президент йгIащтийыгIв МАТОВНИКОВ Александр, КЧР а-Хъада ТЕМРЕЗОВ Рашид, Лагъь-КIавкIаз ауысквала РФ аминистр йзаместитель БАЙСУЛТАНОВ Одес, Ставрополь край агубернатор ВЛАДИМИРОВ Владимир, авласть органква, ажвлара организацияква, архъвыхыгIвчва рыжвлара агIащтийыгIвчва. ХымшкIы йакIвшаз афорум апны ауатыкв йгIатаргатI «Власть и НКО: объединение усилий для успешного развития России» нархарала ауысква. Афорум гIахъитIуата дгIачважватI СКФО-ла РФ а-Президент йгIащтийыгIв Матовников Александр. – «Архыз XXI» ЛагъьКIавкIаз къральгIв форум йхвысквшахауата йакIвшитI, – йхIватI ауи. – Ауаса йанаъазара – йатахъыпI, магIны амапI. ЙъакIвшауа йхIвапсагIву ашIыпIаквала йбайу Къарча-Черкес апны йашIашвауа ажвлара уыснкъвгагIвчва йгьырхъазым. Араъа ажвлари авластьи рацынхарала алшараква гIаншитI, авластьи акъральгIв жвлари агвынгIвитI. АкъральыгIва власть органква рыхъазла ауи сабапра шалу йазхъасцIитI. Авласть органкви акъральгIв жвлари райчважвара акъраль шабгу рыхъазла магIын ду амапI. Матовников Александр афорум апны ацынхарала ашвапхаква амырдарныс дшгвыгъауа гIаликIгIатI. Россия а-Президент Путин Владимир йлихыз ахачIвква рырхъйара апны авласть органкви акъральгIв жвлара институткви рацынхара амагIны йалахIитI. Йапхъахауата уыжвгIанчIви Россия апны акъраль атшауацIыхрала зынла чIвырхъа бзи атнапра ахъазла ауат ахачIвква лырхитI. – Лагъь КIавкIаз апны акъральгIв институтква тшауацIырхитI, – йхIватI СКФО-ла РФ а-Президент йгIащтийыгIв. – Ауат йдырхъйауа ауысквагьи рыцIа йнахвахитI. Ажва аламкIва, акоммерция йалам аорганизацияква йлырхуа апроектква агрантква ъарзалырхуа ауи йацхърагIитI. Лагъь КIавкIаз ауысквала РФ аминистр Чеботарев Сергей й-V-хауа афорум йгIадгылыз йрызцауа йтшазынархара дгIапхьатI ауи йзаместитель Байсултанов Одес. – Афорум ъадзадыргалуа ахвысквшала ауи хвы зму айчважвара площадкIахатI, – йхIватI ауи. – Афорум акъральгIв жвлара тшауацIнарыхрала архъвыхыгIв жвлара, акоммерция йалам аорганизацияква йгьи акъральыгIва власть органква аднакIылитI. Айззара йгIадгылыз т ш ы р з ы н а й ы рх ау а т а КЧР а-Хъада Темрезов Рашид апхъапхъа «Архыз XXI» форум гIанзыршаз йрыуу Псков область агубернатор йхъвдаквцIараква зырхъйауа Ведерников Михаил йюбилейла дйайхIвахIвтI. – Ахвысквшала ажванахъа щарда гIажвгуа йахъазымкIва, ауат йрыуу зырхъйауа аорганизацияква шврыуахатI, – йхIватI Темрезов Рашид. – Ари айззара апынгьи йгIажвгуа ажванахъаквала уыста йгIащтIышвхуа ЛагъьКIавкIаз Федеральна округ аштаква рвласть органква рынхара апны йалкIгIу гватра шазалырхуаш ажва гьалам. Ставрополь край агубернатор Владимиров Владимир йгIачважвара апны йшгIаликIгIазла, уахьчIва акъральгIв жвлари авластьи разаъаща датшахатI. – Ажвлара йахIвауа авласть органква йрагIара атахъыпI, ажвларагьи авласть йахIвауа амгIауата йгьауашым, – йгIаликIгIатI ауи. АлачIвараква рагIан акоммерция йалам аорганизацияква рынхара шагъьырчIвуаш, магIны зму асоциальна проектква шдырхъйуш йрыквчважвитI.