АПСУА ЗРЫПШДЗАУА АУЫХВАРА

Совет заман агIан рахIа йхвыцу акытгьи клуб тагылан. Ауат дасугьи рпны акультура уысква джьгарын, авокал-ъамапсыма гвыпква, агIахIвыгIвчва, апсып оркестрква рыман, йадыргалуаз аконцертква абзазагIвчва рыхъазла гвпшыхьтарысгата йалуан. Афильмква ангIадырбуз хвыцгьи дугьи йыгIвнамшвауата йгIайззун. Акъраль алпIлата апсахраква ангIаджвыквыл нхарта щарда хъыргIвахтI. Ауаса джьащахъвапI акультура тыдзква шгIахчахаз, ауат рынхагIвчва баргвыракIгьи йампшуата, йшырчпалакIгьи, тшгIащаквыржьтI. Йдмырпхахуаз аклуб хьшвашваква йрыгIвнанхаргьи, сквшпхьадзарала рынхаша гIарырымтыргьи, йыгьгIамкIьантIатI, акультура тыдзква рбзазара гьгIашIадымрыстI. УахьчIвала кьазула йгIадыршIыцхуа акультура тыдзква ауагIа рыхъазла гIаншара дупI. Асквш 2017 агIан акультура тыдзква руыхварали рырчIаджьрали культурала РФ а-Министерства йылнахыз апрограмма сом миллиардкIи бжакIи азалырхтI. «Развитие спорта, туризма и культуры» федеральна программа йаларцIарныс йрылшаз Апсуа кыт акультура Тыдзгьи шIыц-шIыц псы гIахъалхтI. Ауи уыхвара кIьыда гIашIарчпауата йгIадыршIыцхтI, ахъахьгьи ауацIаквагьи уыжвгIанчIви квпшыра рымата йандыргIалтI, агьагьара аплиткIа пшдзаква тарцIатI. ГвщтIыхра лахIварала хIырчвыта ауи апещква гIамыгIдатI. Квадрат метр 600 гIазцIазкIуа акультура Тдзы йатахъу зымгIвала йадгалапI. Ауи йаланакIитI пшырта зал ду, библиотека, аунашвачпагIвчва йырзалху кабинет, ахореография йгьи акружок нхараква ъакIвдыршауа апещква, ашахмат бзибагIвчва рыхъазла пещ кIьыда, атшыртIлартаква, гIвдушевойкI, санузелта цба. Дута йаущту афойе апны атеннис йгьи абильярд столква гIвнагылапI. Хъвлапныла ауаъа тшгIазызкIкIуа ахIбачви айцIбачви рпчарыхIра ацдырхъвыхитI. Акыт администрация йгьи акультура Тдзы рынхагIвчва ргIаджвыквцIарала афойе абльынкI Апсуа кыт йгIатыцIыз агIвычIвгIвыс бергьыльква рсуратква кIыдырцIатI. Ари акыт хIуагIахъа рыхьыз зыргаз апхьахьа дуква, акыт млыкврхIара, арыпхьара, акультура, аспорт рпны адахIвра хIаракIква йырзынадзаз уагIа гвыбзыгъа щарда гIатыцIтI. ЙрылапI ауат агIвгIвы бергьльы Уаз НыхIв Абрам йпа, арыпхьарала аобласть унашвахъцIарта знапIыцIата йынхаз Агыр Муса Айдамыр йпа, Черкесск педучилища директорта йынхаз Гваджьа Къапльан ЧагIиб йпа, афизика-математика наукаква рдоктор Тльыс МухIамад Идрис йпа, афилософия наукаква рдоктор, асоциология наукаква ркандидат Гваджьа Къахвын МхIамат йпа, аэкономика наукаква ркандидат Махва Къанамат Абдулкъадыр йпа, Россия Федерацияла гIатгара змаз артистква Уаз Льильа Рамазан йпхIи КIьыщмахва (Барокъва) Тамара Мурадин йпхIи, «Ставсельхозинвест» агрокомплекс гIанзыршаз Тльыс Назымби ЙахIйа йпа датшагьи щардагIвы. ЙгIвбахауа абльын дрыпшдзитI йапшым апсабара гIамтаква гIазырбауа асуратква. Ауат зсуратхъыхга алахъвгIахъасра йгIанакIыз Апсуа кыт абзазагIв, аквтанай апхьарта арыпхьагIв Тльыс Любовь Владимир йпхIа ршIыйарата йлылу, апсабара ашвыга зигIваква закIгьи йузашIмырпшуаш лахIварата йгIалыларцIауа лкытлагIвчва йырхъазымкIва Апсуа сасыта йрызгIайуа йрыцагIвылшарныс лтахъыта лмурад лырхъйатI. – Тльыс Люба йджьгару хIкыт абзазагIвчва дрыуапI. Акультура Тыдз шIыц ашвква шгIартIуаз ауи согIата йазылрыхIазырыз суратта 65 арамкаквагьи йыртата йгIадылгалтI. Абар ужвы араъа йгIашыллакIгьи ауи лыршIыйара нхараква рылапш хънамкъьалуата, азыгIальаматра рзырымбауата йыгьцум, – гIахIалхIвтI акультура Тдзы апны художества унашвачпагIвта йынхауа Гваджьа Муминат. Апсуа кыт гIаныршара ахъада Тльыс Арзадин хIшахайыргIвазазла, культурала КЧР аминистр Барокъва Рамазангьи дъагIатадрийыз йцри кыт ахъазла тширыгIапсатI: апшырта зал асцена апрапсаквала угIалагата йатахъу зымгIвала йшадгалазлушла амальква найахвтI. Ауи йцхърагIарала проектор, музыка аппаратура, светомузыка ргIапсга, пщмикрофонкI, гIвдинамиккI рзалырхтI. Азал квчIварта тIатIата 100 гIвнагылапI. Акультура Тдзы апещква зымгIва йрыгIвнагылугьи шIыцпI. АнхагIвчва рыршIыйара гIадырбауата пещипхьадзагьи ахIврапшдзаквала, йапшым анапIлачпара пкъыгIваквала, асуратквала йдрыпшдзатI. Акультура Тыдз шIыц апны йапхъахауа агвыргъьахъв ноябрь а 27 йакIвшатI. Ауи атшын АдыгьахIабльа районла аклуб нхагIвчва зымгIва злаз аконцерт апны апсуаквагьи йдрыхIазырыз апрограмма гIадырбатI. Гваджьа Аминат унашва зхъылцIауа ашвахIвагIвчва гвып, АгIвдза Эдуард йбжьауа «Марамыз» ансамбль йалу агIахIвыгIвчва шIаква йгвыргъьауа акIвпI асцена шIыц йшгIаквлыз. Декабрь а 31 Асквш шIыц йадахIвуата йакIвдыршаз агвыргъьахъвгьи акыт абзазагIвчва гIазнаддатI. Ауи ахъвлапын жвасквша цIуата акыт апны йцIасхаз алотереяквала ачIврышвра рахIагьи гвлахIарата йакIвшатI. СквшигIадзагьи ауи гIатызгауа согIата машина шIыц йыртитI. Лотереята йыртйыз (300) йгIатнырхыз ахча асогIаква алархвгIан, анкъвакъвраквала йайгIайыз хвыцгьи дугьи аладыргвыргъьатI. ЙцIыхъвахауата йызкьазухаз адискотека абжьы агьагьара гIатнарыхIвачвгIатI, акыт ахIвсси ачкIвынчви абанарбатI. АхIбачва йшырхIвауала, зымгIва рапшта, Апсуа кыт апынгьи загIа йахъыста унагIвара гIанзмыршас гьмачIгIвым. ЧкIвыныргIа адызкIылуаш ажвлара уысква атахъдзапI. Ари апшта, Апсуа кыт акультура Тдзы абзазара джвыквнацIахтI. Араъа мшигIадза йакIвшауа йапшым акружокква унашва рхъицIитI Тльыс МухIаб, ауи ахъвдаквцIара йахъазымкIва аршIыйагIв амузыка пультгьи нйырхитI, гвыргъьахъвта йадыргалуа зымгIва рпынгьи адгалра уысквала дырцхърагIитI. Ари агIвыра апны зыхьыз хIхIваз акультура анхагIвчва апхъалагьи зынгьи рнапIква акврышвта йгьымчIватI, акыт акультура бзазара гьашIадымрыстI. УахьчIвала ауат хIкъраль аунашвачпагIвчва акультура тшъазынадырхаз, йлырхуа афедеральна программаква рбзирала акультура тыдз шIыцква ъаруыхвауа гвщтIыхра дута йшырзалуа рхIвитI.