АПОЛИЦИЯ АНХАГIВЧВА РТЫДЗТАЛХЬА

КIавкIазскIа поселок апны шIыцта йыруыхваз Россия МВД Прикубань муниципальна районла ахъвшара атдзы гIахъыртIытI. Ауи йазынархаз ачIахIра айззара йалан КЧР а-Хъада ТЕМРЕЗОВ Рашид, ауацIа уысквала КЧР аминистр ТРИФОНОВ Игорь, Прикубань район администрация ахъада ЧОМАЕВ Мухамат, КЧР-ла МВД аунашвачпагIвчва, Прикубань район аполиция акъвырльыкъвхагIвчва. Темрезов Рашид Прикубань район аполиция анхагIвчва «атыдзталхьала» драйхIвахIвуата йшгIаликIгIазла, йгIахъыртIуа атыдз шIыц ауыжвгIанчIви тахъыраква йрыквыргIапспI. – Анхара йазалху акабинетква ракIвымкIвагьи, ауыхвара ашта апны спорт комплекс, уыжвгIанчIви хысырта, автомобильква ргылырта, гараж аныргIалпI, – йхIватI ауи ачIахIра айззара апны дгIачважвауата. – Аминистр Трифонов Игори сари хIшангIалызла, аспорт объектква аполиция анхагIвчва йырхъазымкIва, Прикубань район абзазагIвчва зымгIвагьи йгIадрысабап ауаштI. ХIреспублика а-Хъада йшихIвазла, КЧР-ла МВД хIкъраль ахабзахчара органква рыргIапсща апны йалкIгIу агыларта амапI. АуацIа уысквала аорганква ракIвпI зымгIва йрапхъата ачвгьахараква йырпшIагылуа, хIреспублика апны атынчра айхIара збзиру ауат ракIвпI. – Прикубань муниципальна район аполиция, йара ауаса хIреспублика ауацIа уысквала а-Министерства ахъвшараква зымгIвагьи рынхара ахъазла йатахъу аъаща рзыгIаныршара шырквнагу кьангьашра гьазгIазгуам, – йхIватI Темрезов Рашид. – Ажва аламкIва, йгIахъхIтIуа атыдз шIыц ахабзанкъвгара рыбагъьарала, акъральгIвчва ргIальаматраква хчарала ахачIвква рырхъйара йацхърагIуштI. Къарча-Черкес Республика а-Хъада Прикубань район аполиция рыхъазла тыдз шIыц руыхварныс щаквыргылра назахвыз Россия ауацIа уысквала аминистр Колокольцев Владимир дшизыразу гIаликIгIатI, хIреспублика авласть органквагьи аполиция зымгIвала йшрыцыркIуаш йрыбагъьатI. АуацIа уысквала КЧР аминистр, аполиция агенерал-майор Трифонов Игорь йгIачважвара апны ауацIа уысквала аорганква ркъвырльыкъвхара ахъазла йатахъу абзазага-техника щата РФ а-МВД гватра ду шазалнахуа йгьи аполиция анхагIвчва рхачIвы нардзата йдырхъйара шатахъу даквгIашIастI. Аминистр Прикубань район аполиция хъвшара йагъьу акъвырльыкъвхагIвчва, атыдз шIыц ауыхвара зкъару алу аразыра сальамшвъаква рквнайыргатI. Россия МВД Прикубань районла ахъвшара знапIыцIу Козуб Александр атыдз шIыц ауыхвара йацызкIыз, йацхърагIаз зымгIвагьи дшырзыразу йхIватI йгьи арайон ауацIала ажвлара ртынчра ахъазла ркъару йшамайгьдзуш йрыбагъьатI. Прикубань район аполиция анхагIвчва атыдз шIыцла драйхIвахIвтI КЧР-ла МВД апны йгIаныршу Ажвлара Совет апредседатель Байрамуков Ахмат. Темрезов Рашид, Трифонов Игорь йгьи асасчва Прикубань район аполиция атыдз шIыц йгIахъыкIвшумцара йапшытI. Ауи пщэтажкI йнадзитI, йшалу квадрат метр 4500 гIацIанакIитI, нхагIвчвата 107-гIвы йрыквыргIапспI. Атдзы тыпта 34 зму чарта, уыжвгIанчIви видеосвязьла йадгалу 90-гIвы райхIа йырзалху актова зал алачпапI. Аспортзал гIвтренажер залкI аланакIитI, ашIуна этаж апны ахысырта аныргIалпI.