АПОЛИЦИЯ АНБЖЬАГIВЧВА ШIАКВА

Абаза район арыпхьара нхартаква рпны асабиква рпатриот бжьара, мгIва тамам йхвныргылра гватра азалырхуата шIыцра щарда абзазара йаларжьитI, ахабзахчара органква, ажвлара йгьи аветеран организацияква аргваныта йрыцынхитI. Къвбина кыт аквтанай апхьарта апны полиция класс гIахътIрагьи апхьагIвчва ауыс гвымхаква йырчвыхчата ахабзахчара йазызрыхIазыруаш амальта йырпхьадзитI. Апхьарта й-7-хауа акласс апны полиция класс гIахъыртIуата «Аполиция анбжьагIвчва шIаква» зхьзу айззара акIвдыршатI. Ауи йалан Россия МВД «Хабезский» межмуниципальна хъвшара аунашвачпагIв йцхърагIагIв, ауацIа къвырльыкъвхара аподполковник ПАВЛОВ Александр, ахъвшара аъачIвагIагIв ахIба, ауацIа къвырльыкъвхара амайор ОРДОКОВА Лилия, Россия МВД «Хабезский» межмуниципальна хъвшара апны йгIаныршу Ажвлара совет аунашвачпагIв, къвырльыкъв зымхахуа аполиция амайор ПЩМАХВА Али, асовет йалу КЪЛЫЧ Руслан, Абаза районла айсра йгьи анхара рветеранква р-Совет апредседатель ПIАЗ Борис, Абаза район администрация арыпхьарали культурали а-УнашвахъцIарта знапIыцIу лзаместитель МЫХЦ Ирина, Къвбина кыт администрация анхагIвы АЛЬБОТ Мурат, апхьагIвчва, арыпхьагIвчва, анабачва. Айззара Россия йгьи Къарча-Черкес ргимнквала йгIахъыртIытI. ХIкъраль йгьи хIреспублика рбаракъква ауатыкв йангIатарга йбыжьбахауа акласс апхьагIвчва полиция фаша ршвыта асасчва рпахь йгIалагылтI. Ажва зыртыз Къвбина кыт аквтанай апхьарта адиректор КIВРАЩЫН Умар унашва зхъицIауа арыпхьара нхарта апны полиция класс гIахъыртIырныс ъарылшаз магIын ду шазибауа йхIвауата дгIачважватI. –ХIапхьарта апны полиция класс гIахъхIтIырныс шхIмураду Россия МВД «Хабезский» межмуниципальна хъвшара аунашвачпагIвчва йдхIырдыртI. Ауат хIахIвара гватрадъа йыгьгIанырымжьтI, ауыс абзазара йалажьра йацыркIтI йгьи рынбжьагIвчва шIаква полиция фашала швадызгалызгьи дара ракIвпI. Полиция фаша нкъвыжвгарныс ангIашвызхъарцIара, йызгIваду абзазара швалата бзита швапхьара, ъадаб-намыс швыквта тшгIашвырбара атахъыпI. Швыуа аджвырагIв апхьарта амщтахь ахабзахчара органква шврылалырныс швтахъхарыквын, аполиция тшагвыншвыргIвырныс рыцIа ймайрахуштI. Апхъапхъа апхьара акIвпIта йхъаду, араъа дырра цIола шшвауаш, швкъару, швчхIара йшрылашвырхIуш швазхъвыц. Аполиция класс агIахътIра апны йгIахIцхърагIаз зымгIвагьи АлахI дырзыразхатI, – йхIватI КIвращын Умар, йалкIгIата апхьагIвчва тшырзынайырхауата. Россия МВД «Хабезский» межмуниципальна хъвшара аунашвачпагIв йцхърагIагIв Павлов Александр Къвбина кыт апхьарта апны полиция класс шгIахъыртIуала аунашва дгIапхьатI, ахабзахчагIвчва рынбжьагIвчва шIаква рпатриот бжьара, рызгIвадара рыбагъьара йшазынхуш гIайхIватI. Ари атшын йапхъахауата полиция фаша зшвызцIаз й-7-хауа акласс апхьагIвчва р-Псадгьыл, руагIахъа бзи йырбауата, ацIабырг йазгылата штшгIадырбушла квра гIаргтI. УадыргIвана Павлов Александр йгьи Пщмахва Али аполиция анбжьагIвчва шIаква ачвахъабага гвплацIаква рырттI. Пщмахва Алигьи йнапIыцIу Ажвлара совет йалу рыхьызла аполиция класс апхьагIвчва драйхIвахIвтI. – УахьчIва хIзайгвыгъауа асабиква йшатахъу апшта йахIрыпхьарквын, хIрыдынхалырквын, р-Псадгьыл бзи йырбауата, хъацIара, чхIара рылата ргIадзныргылра хIазынхарквын, апхъахьыла хIбзазара рыцIагьи йагъьхуштI, йтынчызлуштI. Ахабзахчара органква рынхагIвчва ачвгьахараква ргIахътIра йазынхара йахъазымкIва, асабиква рпатриот бжьара къару ъаларцIауа сабапра ду алапI. Къвбина кыт апхьарта апны полиция класс агIахътIра йадынхалыз швмурадква гIашвдахIвыргIатI, хIсабиква гвыбзыгъата, йызгIвадата, р-Абашта, руагIахъа хабзаква йрызцIабыргта йгIадзынгылыргIатI, – йхIватI Пщмахва Али. Мыхц Ирина Абаза район администрация анхагIвчва рыхьызла асабиква тшырзыналырхатI. – УахьчIва ахIбачва бзирала йшвайгвгъауата йгIашвайхIвахIвтI. Ауат злагIашвайгвгъауа гIашвырцIабыргра ахъазла бзита швапхьара, ахIбаайцIбара жвдыруата, швызгIвадара шврыбагъьауата тшгIашвырбара атахъыпI. Ауи шшвылшуш, апхьаралагьи спортлагьи дахIвра швымата штшауацIышвхуаш, Абаза район йагъьу апхьагIвчва швшрыуазлуш йазхъахIцIитI, – йгIалылкIгIатI Мыхц Ирина. ПIаз Борис полиция фаша нкъвызгуш й-7-хауа акласс апхьагIвчва тшырзынайырхауата ажвлара ртынчра хчара, ахабзаква шдырхъйауа хъпшылра ахъцIара джьауапкIра ду шырпщылу, ауат ахачIвква зыхъвдакву р-Абашта йазцIабыргта йшынхауа гIаликIгIатI. Й-7-хауа акласс апхьагIвчва ран-рабачва рыхьызла йгIачважваз Быджь Ирма Алексей йпхIа апхьарта апны полиция класс агIахътIра йацхърагIаз, асабиква фашала йадызгалыз Россия МВД «Хабезский» межмуниципальна хъвшара аунашвачпагIвчва йгьи ауыс гIаджвыквызцIаз ахIабльа полиция участкIа знапIыцIу йцхърагIагIв Дагвжей Аслан Рауф йпа аразыра ажваква рзыналырхатI. Аполиция класс асабиква арыпхьара программа апкъ йтата дырра раура йахъазымкIва, ахабзахчара органква ззыбжу аъачIвагIагIвчва ъадрыхIазыруа, йхIаракIу аюридическа институтква рыцIалра йаквдыргвышхвуштI, къару гIарызтуаш, рызгIвадара зрыбагъьуш аспорт тшыбжьараква рзадыргалуаштI. Аполиция класс апхьагIвчва ахIбачва ргвыгъараква гIадырцIабыргуа рыхьыз шдыргуш йазхъахIцIитI.