АПХЬАРТАКВА АНХАРА ЙАЗЫХIАЗЫРПI

Черкесскла арыпхьагIвчва райззара й-19-хауа Гимназия апны йакIвшатI. Ауи йалан арыпхьарала йгьи наукала КЧР аминистр КРАВЧЕНКО Инна, Черкесск амэр йзаместитель ЙЕНСЕНДАНИЛЬЧУК Елена, Черкесск город а-Дума адепутат ЧКВТIУ Любовь, Черкесск город арыпхьарала аунашвахъцIарта знапIыцIу йхъвдаквцIараква зырхъйауа КЪАЛМЫХ Сусанна, Черкесск город асабигIзартакви апхьартакви рунашвачпагIвчва, арыпхьагIвчва, абжьагIвчва. Кравченко Инна коронавирус ашIашIкIгIара йгIаннаршаз аквыргъвгъвара агIан арыпхьагIвчва рынхара ашIадымрысуата йащтацауата йъакIвдыршазла аразыра ажваква рзыналырхатI. – ЙагIвсыз апхьара сквшы агIан хIкъральгьи хIреспубликагьи баргвыра щарда йыршIашватI. Ага ауаса йаъазтынгьи, арыпхьагIвчва рынхара апдымрышвтуата рхъвдаквцIараква абгата йдырхъйатI. ЗымгIвагьи йшгIахIгвынгIвуала, йгIайуа апхьара сквш шIыц псахра щарда алата йакIвшуштI, асанитар-эпидемиология аъаща йгIанаргылуа атахъыраква ракIвымкIвагьи апхьагIвчва рарыпхьара-бжьарала шIыцра щардагьи абзазара йалагIжьуаштI. Апхьарта йгIалгауа апхъахьыла адахIвраква дырзынадзара ахъазла дгIакIвзыршауа дрангIалуа тшибжьара, апхъагылара йкIра ахъазла йхъа дадынхалра шатахъу гIайгвынгIвра магIын ду амапI. Здырраква хIаракIу арыпхьагIвчва ауи ауыс джьауапкIрала йакIвдыршитI, агIзара-бжьара уысква абгата йдырхъйитI. Ауаса рыцIа ауыс хъада зыхъвдакву акласс унашвачпагIвчва ракIвпI. Ауат ргIапсара гIалыркIгIауата Путин Владимир йунашвала сентябрь йгIашIарышвта акласс унашвачпагIвчва рынхаша сом 5-н зыкь гIалахIуштI. ХIреспубликала ауат ахчаква класс унашвачпагIвчвата – 2973-гIв, Черкесск городла 621-джв йрыртуаштI, – лхIватI ауи. Аминистр йшгIалылкIгIазла, агIзара-бжьара хачIвква апхьара программа йаланакIуаштI. Асаби йапхъахауата апхьарта дангIайра йгIашIарышвта йарыпхьара акIвымкIвагьи, йбжьарагьи йалкIгIата йадынхалуаштI. Апхьартаква рынхара апны ашIыцраква джьгарта йаларжьитI, рымлыкв щата дрыбагъьитI, арыпхьагIвчва рдырраква йъарыладырхIауа акурсква йцарныс рылшитI. Ауат анархараквала рынхара рыцIагьи тшауацIнадрыхуаштI. Кравченко Инна арыпхьагIвчва йгIарквнадыргаз артшхъвагаква рылттI. Ауат йрыуапI «Россия Федерацияла ЧIахIра зму арыпхьара-бжьара анхагIвы» гвплацIа гIазквнадыргаз ЙУАН Марйат Аскьар йпхIа – йцбахауа квтанай апхьарта апны математикала арыпхьагIв; арыпхьарала Россия Федерация а-Министерства а-ЧIахIра грамота зыртыз, сквшщарда зынхара джьауапкIрала йадгылуа КIЬЫЩМАХВА Римма ЗулькIарней йпхIа – й-15-хауа лицей апны апычIв классква рарыпхьагIв; МАХВА Цара Джьумаль йпхIа – й-7-хауа квтанай апхьарта апычIв классква рарыпхьагIв; арыпхьарали наукали КЧР а-Министерства а-ЧIахIра грамотала йгIалыркIгIаз ШОГЬАН Анжела МухIамад йпхIа – й-7-хауа квтанай апхьарта информатикала арыпхьагIв. Йенсен-Данильчук Елена йшылхIвазла, «Арыпхьара» уагIахъа проект ацхърагIарала апхьартаква атехнология шIыцквала йадыргалуаштI, ауыжвгIанчIви арыпхьащаква рынхара йаларжьуаштI. «Демография» уагIахъа проект гIадрысабапуамцара асабигIзартаква рпны хысквша йнамдзас рыхъазла йгIахъыртIуаштI. УахьчIвала агIсабигIзартакI рпны ахвыцдзаква рыхъазла агвыпква рынхара джвыквырцIарныс тшдрыхIазыритI. Черкесск город йаныргIалу апхьартаква зымгIва апхьагIвчва драйгварныс йхIазырпI. Путин Владимир йунашва дырхъйауата апычIв классква рапхьагIвчва хвыдъа фачIв пхала йадыргалуаштI. Апхьара сквш шIыц апны зымгIвагьи адахIвра хIагIаква йшырзынадзушла йшазхъалцIауа лрыбагъьатI. ЧквтIу Любовь Черкесск город ахъада Беланов Евгений йтшазынархара дгIапхьатI: «Апхьара сквш шIыц йапылуата, йшцIасхаз апшта, уахьчIва Черкесск город арыпхьарала апхъагылара зму арыпхьагIвчва тшазыркIкIытI, йыззынадзаз агIатгараква гIалыркIгIитI, апхьагIвчва адырра цIолаква шрауашла ахачIвква лырхитI. ЕГЭ агIарбараквала хIапхьартаква рапхьагIвчва йапшым апредметквала адырра хIаракIква шрыму гIадырбатI. Ауат рыуа хышвыгIв хьапщ йгьи рызна медальла апхьарта йгIалгатI. УахьчIва хIызташваз аъаща баргвы хIкъаруква адхIкIылырквын, дахIврала хIгIалсуаштI. ЗгIвадара багъьа, чхIара, уасаражвра, апхьагIвчва рбзибара, ауат ргIатгараква шврайгвыргъьара швзыстахъпI» – йаныпI ауи йтшазынархара. Асквш 2020, январь а 15 агIан Россия Федерация а-Президент Путин Владимир а-Федеральна Айззара йрызцауата йчпаз атшазынархара апны йгIаликIгIаз ахачIвква хIреспубликала йшырхъйахауа Къалмых Сусанна даквгIашIастI. Ауат йрыуапI ан-абачва ахча рзалхра, апхьагIвчва хвыдъа фачIв пхала йадгалра, акласс унашвачпагIвчва рынхаша йалархIара. – Сентябрь а 1 йгIашIарышвта Черкесскла апычIв классква йрапхьагIвчвата 7700-гIвы раъара хвыдъа йдырчуштI, Ахвыцдзаква ргвыпква ъагIахъыртIуаш асабигIзартаква рынхара уыжвласыла йджвыквырцIуштI. «Государственные услуги» портал йаныргIалу «Электронный детский сад» апны ан-абачва Интернетла асабигIзарта йцуш ахвыцква ркьазу дырхъвыхырныс рылшитI. Асаби дшхвыцыркIву уалагата агвып дрылата дынхауа, йыршIыйара тшауацIнахырныс лшара йымата дгIадзынгылра атахъыпI, – йгIалылкIгIатI ауи. Къалмых Сусанна Черкесск город апхьартаква злалуа ауагIахъа программаква, апхьагIвчва Россияла йакIвшауа йапшым анкъвакъвраква рпны бзита штшгIадырбаз, дахIврата йыззынадзаз йауацIыхта дрыквгIашIастI. Черкесск йаныргIалу «Золушка» сабигIзарта аунашвачпагIв Пшеунова Анжела лгIачважвара апны рынхара шIыцрата йаларжьуа дгIаквчважватI. Ауи йшылхIвазла, ауыжвгIанчIви технологияква апхъала йчIвырхъитI, йгIадзынгылуа ахвыцква рыцIа щарда рдырра атахъыпI. Ауат йрыквыргIапста йызланхауа апрограммаква псахра рыларцIитI. ЙгIачважваз зымгIва ауагIахъа проектква гIадрысабапра, ауыжвгIанчIви арыпхьагIвчва азаман йацчIвырхъара, апатриот бжьара гватра азалырхра шатахъу, датшагьи щарда йрыквчважватI.