АПХЬАРТА ТШАЗАДЫРГАЛЫРНЫС ЙЫРЦХЪРАГIАТI

Асабиква рхвитнагIаква хчарала Къарча-Черкес Республика ауполномоченна лгIаджвыквцIарала «Поможем собраться в школу» гвчIагIвра акция йхвынхауата йакIвшатI. Ауи йацыркIтI КЧР-ла МВД ажвлара Совет, асуд приставква, «Газпром газораспределение Черкесск» АО, ареспубликала йынхауа асаби фондква. АуацIа уысквала КЧР аминистр йзаместитель ШАЙ Ануар йшихIвазла, зхъахIара мачIу атгIачваква рпхьадзара рыцIа паса йгIадрыбергьыльтI. – «Поможем собраться в школу» акция МВД анхагIвчва зымгIвагьи дара ртахъырала йацхърагIитI. Ауи йгIаланахIыркIыз ареспубликала йапшым ашIыпIаква йгIартыцIыз асабиква 150-гIвы йнадзитI. Асабиква апхьарта йызлацуш афашаква, апхьага ъамапсымаква дасу йгвапхуз дарадара йгIалырхтI, ахв хIара йхIтйытI, – йгIаликIгIатI ахабзахчагIв. Россия асаби Фонд КЧР-ла ахъвшара анхагIвчва асабиква рапхьагаква зтарцIуш апортфельква рзырхвгIатI. Асквш 2018, август а 28 йджвыквлыз агвчIагIвра акция Уарп, Зеленчук йгьи ареспублика арайонква рпны август а 29 йнадырдзахтI.

Сквшщарда руацIа «РусГидро» КЧР-ла ахъвшара аъачIвагIагIвчва «Чистая энергия» гвчIагIвра программа апкъ йтата асаби-ныкъвадыкъваква рыхъазла фачIвы рхвгIатI. Ауи згIвадарахчарала КЧР а-Министерства рацкIрала йакIвдыршатI. ХIызту асквш ауацIала «РусГидро» КЧР-ла ахъвшара аъачIвагIагIвчва агвчIагIвра уысква ахчата сом мильуан 2,5 рзалырхтI. ЙызцхърагIаз йрыуапI: Къарча город йаныргIалу гIвквтанай апхьартакI, ПравокубанскIа посёлок апхьарта, «Надежда» социальна-реабилитация Квта, дзюдола КЧР а-Федерация. «РусГидро» ахъвшараква ъаныргIалу ашIыпIаква зымгIва рпынгьи зылшараква ахъарысу асабиква рцхърагIарала уыс бзита йакIвдыршауа гьмачIым. Ауат ргвы йалазырхIуш ахъвмаргаква рзырхвгIитI, рбзазара зрымайруш аргIапсгаквала йадыргалитI. ХIапхъахьылагьи «Чистая энергия» программа дырхъйауата социальна гватра йазыбжу асабиква рылапш гьырхъырхуашым. Ауи йахъазымкIва, апхьарта йгIалгауа чкIвыныргIа ъачIвагIа гIалырхырнысла айкьангьашраква рзадыргалитI, аштаква раныргIалрагьи, рсанитар аъаща агъьчIврагьи ймачIымкIва йацхърагIитI. «РусГидро» аъачIвагІагIвчва зылшараква ахъарысу асабиква цхърагІара драдзарала амальква гьашІадрысуашым.