АПХЬАРА СКВШ ШIЫЦ ДЖВЫКВЫРЦIАХТI

Сентябрь апычIв мшы гвыргъьахъв дута йапылитI асабиква, арыпхьагIвчва, ан-абачва. Сентябрь а 1 ашвква тыбгIата йатIытI Кълыч Рауф йыхьыз нкъвызгауа Красна Восток кыт аквтанай апхьарта. ЦIабыргыта, апхьара сквшы шджвыквлыз анахьанат асквшква йыгьрапшмызтI, асасчва, ан-абачва гьщардагIвымызтI. Ауи йашвхIаусыгIвахаз коронавирус згIва ауагIа, йалкIгIата, асабиква ачвыхчара акIвпI. ЦIыпх апшта, сынчIвагьи апхьарта апшцIа йакIвшаз агвыргъьахъв йгIазшIыртыз йапхъахауа акласс йгIацIалыз а 20-гIв, ауат ран-рабачва йгьи й-11-хауа акласс йцуш 8-гIвы, арыпхьагIвчва ракIвпI. Апхьарта адиректор абжьара уысквала лзаместитель БЕЖАН Борис Сольман йпа йгьи КIЬЫЧА Карина йгIайззаз апхьара сквш шIыцла пхата йрайхIвахIвтI йгьи напIасрала йгIадрайгватI йапхъахауа ачIвырхъаква атызпуа апхьагIвчва хвыцква. Ауат йапхъахауа рарыпхьагIв ШАУ Фардауыс МухIадин йпхIа дрыцта йгIамгIвайстI. Россия Федерация а-Баракъ щтIырхырныс рквнадыргатI йжвизхауа акласс апхьагIв НАГАЙ Расул йгьи йжвбахауа акласс апхьагIв ШАРМАТ Наиля. Сквшщарда цIуата йщаквгылу ацIас дырхъйауата хI-Псадгьыл ахъазла зхъа щтIазцIаз афырква хъмаштылра дакъикъа йрызгылтI. Йжвизхауа акласс апхьагIвчва Аджьбакь Артур, Ахмат Карина йгьи йжвбахауа акласс апхьагIвчва Шармат Наиля, Аджьбакь Рауль апхьарта йаныргIалу Абашта айсра Ду йаладзыз рыхьызква зну абльын, Абашта айсра Ду йаладзыз арыпхьагIвчва рчвахъабага син рпны ахIврапшдзаква щтIарцIатI. Амакъым гауата ауатыкв йгIаталыз апхьагIвчва чкIвынква Байкъвыл Самира йгьи Огвыз Камила быжь пшдзала ашва рхIватI. Россия Федерацияла ЧIахIра зму арыпхьара анхагIвы, йхIаракIу категория зму арыпхьагIв, апхьарта адиректор ДЖЬМАКЪВЫЛ Басира Лиуан йпхIа агвыргъьахъв йалаз тшырзыналырхатI. – УахьчIва гвыргъьара мшы ъакIвшауа хIапхьарта йгьахъазым, Россия асабиква зымгIвагьи сентябрь а 1 лахIвара пшдзала, нашх лашарала, амурад дуквала йапылитI, – лхIватI ауи. – Сара сгвыргъьитI швара швапш саби пшдза, саби гвыбзыгъа ъахIыму. «АрыпхьагIв швлыздзыргIвуаштI, бзита швапхьуштI, ауи гьакIвымма?» – йащтагIайуата тшырзыналырхатI йапхъахауата апарта йадзхъачIвуш ахвыцква адиректор. «Щта!» – дута джьауап гIартхтI ауатгьи йацшIакIта. Йапхъахауа акласс йгIацIалыз ахвыцква ауыса чкIвынква йгIарыпхьатI. Йжвизхауа акласс ачкIвынчви ахIвсси ауат ажва пха щарда рзынадырхатI, асогIаквала йдыргвыргъьатI. Дара ахвыцквагьи апхьагIвчва ахIбаква ахIврапшдзаква рырттI. АпхьагIвчва йрайхIвахIвтI агвыргъьахъв йалаз акыт гIаныршара ахъада ХвытI Игорь, йапхъахауа акласс арыпхьагIв Шау Фардауыс, ан-абачва рыхьызла Быда Стелла. Йжвизхауа акласс апхьагIв Нагай Расул йапхъахауа акласс йгIацIалыз Огвыз МухIамад «адырра ашв гIазтIуа» ацIапха йыйттI. «Живая классика» Россия анкъвакъвра афиналист, йжвизхауа акласс апхьагIв Огвыз Ансар йыжвгIвахъа дыквчIвата ауадгьына гIалрыхIвачватI апхьагIв хвыц ГIвкIьатI Милана. Ауадгьына абжьы рхъадзгылата йжвизхауа акласс ачкIвынчви ахIвсси пычIвта апхьарта йгIацIалыз ахвыцква рнапIква рыма акласс йнардылтI. Асабиква рарыпхьагIв Шау Фардауыс МухIадин йпхIа арыпхьагIв бзиква рсатыр далапI. Ауи СогIвым къральыгIва институт апедагогика факультет дгIалгатI, асквш 2001 йгIашIарышвта ари апхьарта апычIв классква алрыпхьитI, сынчIва йхвынхауата йапхъахауа акласс гIалахвтI. Асабиква 20-гIвы йнадзитI, ауат йрыуата 11-гIв асабигIзартала йгIайтI. Ауи атшын слачважватI хвыгIвпачва зму, апхьарта хIисапла йазрыпхьауа БжьаныкIьа Заира Мурат йпхIа. «Апрезидент ахчаква гIашвцхърагIама, йшвзалахвгIайа?»-хIва сылцIгIатI ауи. – Ссабиква хвгIвы йнадзитI: Айнар – йагIбахауа, Самир – йцбахауа, Салим – йпщбахауа, Исльам йапхъахауа аклассква йапхьуштI. АйцIбадза Ильас ужвыгьи дхвыцыркIвапI, асабигIзарта дгIайитI. Сом жванзыкь йнадзауа ацхърагIара зысквшла йаланакIыз апщыгIв йаназаманыз йгIарыртын, чгIвыча, апхьара апны йыртахъхушыз атшытмытква рзыхIхвгIатI. Ауи апш айгвыгIвра хIзыгIанзыршаз Россия а-Президент Путин Владимир аразыра ажваква йзынасырхитI, ауи цхърагIага дута йхIзалтI, – лхIватI Заира. Абараса рнашх лашарата, рыгвква тынчта апхьара сквш шIыц джвыквырцIатI Красна Восток кыт апхьарта арыпхьагIвчвагьи, апхьагIвчвагьи, ан-абачвагьи .