АПХЪАХЬЫЛА АХАЧIВКВА АЛАЧПАПI

Июль а 22 Абаза район, Псыжв кыт акультура Тдзы апны сынчIва сентябрь а 8 йакIвшуш КЧР АуагIа Айззара (а-Парламент) й-VI-хауа азддара адепутатра йазабакIуаш «Единая Россия» политика партия ахьызла акандидатква ауагIа йрынйатI. Абаза муниципальна район администрация ахъада, апартия ашIыпIа хъвшара асекретарь НЫР МухIаджьыр ЧагIбан йпа айззара гIахъитIуата йцIыхъвахауа ахвысквша арайонла псахрата йыншаз гIайхIватI, «Единая Россия» партия агIаджвыквцIарала абзазара йаларжьыз апроектква сабапрата йгIаргыз йгIайззаз ахайыргIвазатI. Ауи йшгIаликIгIазла, ареспублика Парламент адепутатква рцхърагIарала арайон йаланакIуа акытква рпны арыпхьара, асоциальна нхартаква раъаща агъьхитI, ауагIа зрыразуа апсахра бзиква ншитI. Ныр МухIаджьыр унашва зхъицIауа арайон йаланакIуа акытква рпны апхьарта йыцIамылс асабиква рыхъазла арыпхьара нхарта, культура тдзы, аспорт йадкIылу рыхъазла атшыбжьартаква шыруыхвауа, «Единая Россия» партия апроект апкъ йтата акыт штаква шандыргIалуа гIайхIватI. «Единая Россия» партия КЧР-ла ахъвшара ашIыпIа Исполком аунашвачпагIв ДЖАМБАЕВ Руслан йшихIвазла, Абаза район йаланакIуа акытква рпны ауагIа зрашшуа абаргвыраква ррыдзра алхраква рагIан адепутатра йазабакIуаш акандидатква рхачIв хъадаква йрыуапI. – ХIреспублика апны ауагIа знадзара хIагIу дзыла, псабара газла йадгалра, амгIваква раъаща агъьчIвра, акытква раныргIалра, ртшауацIыхра йацкIра датшагьи анархараквала партия проектта жваба айхIа абзазара йалагIжьитI. Апхъахьыла депутатта йынхуши хIари ауат апроектква рпны йгIарбу ахачIвква хIырхъйауата аргваныта хIацынхуштI, хIацацхърагIуштI. ХIара баргвырата йъау зымгIва хIырхъйушта швгьхIыргвыгъум. Ауаса, швари хIари тшадхIкIылта акъыльаквшвара хIызбжьата хIынхарыквын, щарда хIзычпуштI. УахьчIва хIайззара йалу адепутатква, ахIаракьатчпагIвчва акытква ртшауацIыхра йацхърагIауата уыста йдырхъйауа бзита йыжвдыритI. Ауат апхъахьылагьи ауагIа рбзазара агъьчIвра йазынхауата ркъаруква йшырмайгьдзуш кьангьаш гьалам. Швари хIари хIацIагылта хIабагвынгIвуа апхъала хIчIвырхъарыквын, хIгвтараква гIахIдахIвуаштI, – йгIаликIгIатI Джамбаев Руслан. «Соломон» АО агенеральна директор, «Алашара» абаза-абхаз уагIахъа ртшауацIыхра йацкIрала а-Дуней адкIылара апрезидент ЭГЬЗАКЬ Мусса йшихIвазла, акытква ртшауацIыхра азынхара апны абаргвыраква бзита йыздыруа ауагIа рцхърагIарагьи гIарысабапра магIын ду амапI. – Асоциальна баргвыраква йрылзырдзгIуш ахачIвква, апрограммаква анлыхIхуа хIацынхарквын, ажвлара ргвгIанаграква хIрыздзыргIврыквын шIыцра щарда хIзыгIаныршуштI, ацхърагIараква йрылахIуштI. КЧР а-Хъада й-Администрация, а-Правительства, акытква, арайнква рхъадаква абзазагIвчва рцхърагIарала «Алашара» дуней адкIылара апны йлырхуа апроектква, апрограммаква дахIврала абзазара йалагIжьитI. Арат асквшква руацIа швари хIари йхIырхIаз ашвапха апхъахьыла апартия апроектква абзазара йалажьра апны йшгIахIцхърагIуш йазхъауцIа ауаштI. Сара йшспхьадзауала, ахабзалыхыгIвчва акытква, арайонква рпны нхарата йакIвдыршауа алхыгIвчва йырдырра ахъазла, адепутаткви акытква рбзазагIвчви аргваныта йацынхара атахъыпI. Зкыт бзиракI азызхарныс йгвжважвауа, зкытлагIвчва ауыс йыззаквыргвышхвауа хIайщчви хIахщчви хIызрыцынхарквын, бзира щарда гIахIдахIвуаштI, – йхIватI Эгьзакь Мусса. КЧР АуагIа Айззара (а-Парламент) йцIыхъвахауа агIвазддаракI адепутат МЕРЕМКЪВЫЛЬ ГIабидин сквшыкI апны ареспублика бюджет йгIаунащтуа ахчаква сабапра гIаргуата йшгIайрысабапуа хъаузырцIауа ашвапхаква щардапI. – Абаза районла арыпхьара нхартаква раъаща агъьхIчIвуата йхIылшаз йгIайззаз бзита йыжвдыритI. Апхъахьылагьи депутатта хIынхарныс йхIызхъашвцIузтын, швызлагIахIыргвыгъауа ауысква ацхIырхъйуштI, – йгIаликIгIатI Меремкъвыль ГIабидин. КЧР АуагIа Айззара (а-Парламент) адепутат ДЗЫУА Зауыр акытква рпны ауагIа зынйауа абаргвыраква бзита йыздыруа, ауат йрылзырдзгIарныс йащту, алхыгIвчва йыззхъарцIауа ахабзалыхыгIвчва дрыуапI. Ауи йцхърагIара йазыбжу акъральгIвчва ртшазынархараква гватрадъа йыгьгIанижьуам. КЧР а-Парламент йцIыхъвахауа агIваззддаракI дырдепутатта йхъвдаквцIараква йырхъйитI. – Акытква рпны йучпуш щардапI. ХIара абаргвыраква йрылхIырдзгIауата, ауагIа рбзазара щтIыхIхуата йхIтлакIьуа хIчпуштI, – йгIаликIгIатI адепутат Дзыуа Зауыр. Адепутатква САВЕНКО Александр йгьи ТЕКЕЕВ Ильяс ауагIа йырцхърагIауата йакIвдыршауа агвчIагIвра уысква сабапрата йгIаргуа гьмачIым. Ауатгьи зышта, зуагIахъа гвхътIыла йырзынхауа аполитикква, ахIаракьатчпагIвчва йрыуапI. Асквш 2019, сентябрь а 8 йакIвшуш КЧР АуагIа Айззара (а-Парламент) й-VI-хауа азддара адепутатра йазабакIуаш акандидатква йгIайззаз ахIбачвагьи чкIвыныргIагьи йапшым ауысквала ргвгIанагракви ражванахъакви йрыздзыргIвытI, разцIгIараква джьауап рырттI.