АПХЬАХЬА ШIАКВА ГIАДЗЫНЛЫРГЫЛИТI

БАТАЛ ФатІима Къасей йпхІа анаука адынхалра ахъазыкІ йыгьгІаллымхтІ. Ауи лаба Батал Къасей Ажумар йпа дбызшвадыргІвын, дуысагІвын, анаука данхагІвын. Абаза бызшва ахчари атшауацІнарыхри айрышта йазгылаз дыршІыйагІвын, дарыпхьагІвын, дапхьахьан. Лан Шхай Катйа йара ауаса абаза уысара, ажварква ралацІара, астудентква рарыпхьара къару ду алазцІауа хІыгІвычІвгІвыс гвыбзыгъаква дрыуапІ. Абаза литература апхьара ъацІасыз аунагІва йгІадзынгылыз ФатІимагьи ауи лща йалата дгІамгІвайситІ, ларгьи абызшва дадынхалуа далагищтара йыгьсквшыкІым йцІуа. ФатІима Къарча город йпщбахауа квтанай апхьарта дапхьазтынгьи, дъайыз лцри Красна Восток йлыцгІатылгаз абаза бызшва гьылхълымраштылтІ. Ауи Къарча-Черкес къральыгІва университет (КЧГУ) апедагогика йгьи пычІв арыпхьарала аметодика рфакультет дангІалга амщтахь ауниверситет ачеркес йгьи абаза филология акафедра апны лаборант ахІбата дынхауа далагатІ. Ауаса дынхауата хІцри бызшва гІарысабапра рыцІагьи тшахалыргІвазатІ йгьи асквш 2002 агІан КЧГУ литературала акафедра даспирантхатІ. Асквш 2003 агІан «Генезис и эволюция сюжетно-повествовательной поэмы в абазинской литературе» темала Адыгея къральыгІва университет апны кандидат диссертация лхчатІ. Афилология наукаква йыркандидатхаз Батал ФатІима асквш 2004 йгІашІарышвта Алиев Умар йыхьыз зхъу Къарча-Черкес къральыгІва университет урышв бызшва йгьи литература, черкес йгьи абаза филология кафедраква арыпхьагІв ахІбата дынхатІ. Асквш 2005 агІан урышв бызшвала, литературала йгьи методика арыпхьарала акафедра даунашвачпагІвта ддыргылтІ. Ауи литературала йгьи литературадыррала ллекцияква швабыжта йшджьащахъву гІалыркІгІитІ йалрыпхьауа астудентква. ФатІима Къасей йпхІа арыпхьара нхара йацлырцитІ анаука-рхъвыхра йгьи аметодика нхара. ЙшгІалылкІгІазла, анаука уадынхалуа зны уаналагара угьызгІакъвыцIхуам, удырраква йрылазырхІауа шІыцра щарда уахагІвазитІ, ауи рыцІа тшауацІнаурыхра утахъхитІ. – Ага апхьахьа дуква йгІартынхаз анхараква заъара йбайазлакІгьи, абызшва уадынхалпхьадзагьи йгІахъутІуаш шаъаркІву бзита йуылаухІвитІ. ЙалкІгІата, хІыбызшва зджьара йгІанымхауата йбайапІ, йалачпапІ, адуней апхьахьа-бызшвадырыгІвчва азыгІальаматрата йазрыму йалахІара акІвымкІва йгьалдзгІум. ХІара хІапхьахьаквагьи хІыбызшва алапшрала рырхъвыхраква гьашІадрысуам, ауипхьадзагьи шІыцракІ рзыгІахънатІитІ, алитература, афольклор, ауысара ауасамцара уыздынхалуаш щардапІ, – лхІвитІ апхьахьа. Батал ФатІима наука нхарата 75 лымапІ, ауат рыуа гІвба ЙхІаракІу аттестация комиссия (ВАК) йгІацІнащтуа ажурналква йгІарыншвалтІ. Ауи йахъазымкІва, афольклор йгьи алитература йырзынарху агІвыраква йгьи апхьага цхърагІагаква гІанлыршатІ. Ауат йрыуапІ «Из истории абазинской литературы. Поэмы Т.З. Табулова: фольклорная основа и поэтика» апхьага. Апхьахьа датшагьи алекцияквала апхьага-методика адкІылараква гІацІылщтІ: «Теория литературы и практика читательской деятельности», «Детская литература», «Принципы и приемы анализа литературного произведения». ФатIима Къасей йпхIа хІкъраль ауацІала, хІреспубликала йгьи йхІаракІу апхьартаква рпны йадыргаллауа анаука конференцияква дрыламылуата йыгьгІанылжьуам. Ауи «Школа-вуз: современный диалог» анаука нхараква разкІкІра аредколлегия далапІ, акафедра анаука-методика семинарква, йапшым аконференцияква драдгалагІвпІ, астудентква анкъвакъвраква йызларылалуа йгьи йангІалгауа йдрыхІазыруа рдиплом нхараква унашва рхъылцІитІ. – Абаза йгьи черкес филология ркафедра апны ацри бызшваква ргІахчарала ахачІвква лыхІхын, ауатла хІынхитІ, – лхІвитІ апхьахьа. – Ауат ахачІвква рыпкъ йтата хІуниверситети арахьарат аштаква йхІаракІу рапхьартакви хІшвапха амыгІдауата йадкІылу анаука нхараква разкІкІраква ацгІацІхІщтитІ, ацри бызшваква рдыррала йгьи тшауацІдрыхрала апроектква ацлыхІхитІ, ацри бызшваква рарыпхьара апны ахабарргага технологияква йрылархІара ахъазла астудентква, арыпхьагІвчва, аспирантква ацифра шгІадрысабапуала анкъвакъвраква акІвхІыршитІ. Сара йшазызбауала, йахІрыпхьауа астудентква дасу йгІайдахІвуа аршІыйара йара-йара тшауацІнайрыхырныс йылзыршуш цри бызшвали литературали ауыжвгІанчІви апхьагаква хІырзыбжапІ. Ауат агвацчпа гІвыракви атексткви йырхъазымкІва, акомментарийква, азцІгІаракви ахачІвкви, йапшым ауыжвгІанчІви ажварква рыланакІра атахъыпІ. ЙшыгІбауа апшта, Батал ФатІима Къасей йпхІа ацри бызшви алитератури наука пкъы йтагылата рыдынхалрала ужвыгьи мурад щарда лымапІ. Ауат зымгІва апхьахьа шІаква ргІадзныргылра йшацхърагІуш кьангьаш гьалам. ФатІима гІвыпхІчва гІадзынлыргылтІ. Сквш 27 йырту Алина лъачІвагІала дклиника психологпІ, дунагІвапІ, пхІа хвыцкІ длымапІ, ауи лхъапщыла Шай МухІамад Черкесск апны МВД акадрквала ахъвшара йнапІыцІапІ. АйцІба Аргуянова Диана сынчІва аквтанай апхьарта дгІалган, Черкесск город йтагылу «Полиглот» колледж «Туризм» хъвшара дыцІалтІ. Ан йшылхІвауала, лыхІвсса агІвыджьгьи дара рдунейпшыща рымахпІ, йрыквыргІапста йырпхьадзаз, азыгІальаматра ззырбауа аъачІвагІаква гІалырхтІ. Йхъаду – тшыздыркІылыз ауыс йнардзата, рхъа ахъазлагьи, ауагІа рыхъазлагьи файда алата йдырхъйарныс акІвпІ. Лара ФатІима Къасей йпхІа йбергьльу лаби лани руыс – абызшви алитератури ртшауацІыхра – лхатІ алалцІитІ