АПХЬАГІВЧВА ШПАДЫРЧАУА?

Къарча-Черкес Республика Ажвлара палата апны аквтанай апхьартаква рапхьагІвчва рырчара йазынархаз стол гьагьа акІвшатІ. Ауи йалан Ажвлара палата апредседатель МОЛДОВАНОВА Вера, КЧР апрокурор йзаместитель ГЕРБЕКОВ Али, арыпхьарали наукали КЧР аминистр лзаместитель БЕКИЖЕВА ФатIима, агІарысабапыгІвчва рхвитнагІаква рхчара ахъпшылрала а-Федеральна Унашвачпарта аъачІвагІагІв хъада ДАНИЛИНА Ирина, СКГГТА экономика институт адиректор КАНЦЕРОВ Рашид, арайон администрацияква арыпхьарала ахъвшараква рунашвачпагІвчва, ажвлара уыснкъвгагІвчва. АлачІвара гІахъитІуата Канцеров Рашид апхьартаква рпны асабиква рщыбжьанчара адгалра магІын ду шаму даквгІашІастІ. – ЗымгІвагьи йырдыритІ аэкология аъаща, йгІахІрысабапуа адзы, афачІвква рнадзара ъанакъвыз йгІалцІла йгІадзынгылуа асабиква рызгІвадара штІахсахаз. Ауат апхьарта апны йыргауа азаман ауацІала пхаракІ рымфарыквын, аъаща рыцІагьи йгврыдзгахитІ. ЦІакІыракІгьи гьалам атгІачваква зымгІвагьи апхьартаква рпны рсаби йщыбжьанчара йаквшвауа ршварныс лшара шрымам. Дара апхьартаквагьи хвыдъа, льготла зылшараква ахъарысу зымгІвагьи гьырзырчум. Асабиква рырчара йаквшвауа азбжа – ан-абачва, йгІанхауагьи апхьартаква йаларцІата ауыс пкъыкІ йыззытаргылуагьи гьмачІгІвым, – йгІаликІгІатІ Канцеров Рашид. Арыпхьарали наукали КЧР аминистр лзаместитель Бекижева ФатIима йшылхІвазла, а-Федеральна йгьи Къарча-Черкес Республикала йщаквгылу ахабзаква рыпкъ йтата йгьи абюджет лшараква йгІарыквхта хвыдъа апхьартаква рпны йдырчауа асабиква 17,5 процент ракІвпІ йнадзауа. Ауат зхъахІара мачІу атгІачваква йгІарылцІыз йрыуапІ йгьи мшкІы сабикІ йырчара сом 45 аквшвитІ. АпычІв классква рапхьагІвчва мшигІадза заджвипхьадза хшстаканкІ рзалырхитІ. Къарча-Черкес Республика Ажвлара палата апны асабиква рырчара йазынарху ауысква зырхъвыхуаш гвып гІандыршатІ. Ауат йшгІадрыбергьльызла, ареспублика апхьартаква йрыуата 145 рпны ачартаква нхитІ, а 30 рпны – йаныргІалу буфетпІ, цапхьартакІ асабиква ъадырчуш шІыпІа рзалырхырныс лшара гьрымам. АпхьагІвчва рызгІвадара аъаща рыбагъьарала амальква рыпкъ йтата рырчара адгалра асквш 2018 ауацІала ареспублика бюджет йауата сом мильуан 47 аквдрыдзтІ. Ауи апхьадзара асквш 2017 агІарбараква рацкІыс хпроценткІла рыцІа йайхІапІ. Амуниципальна районква рбюджет йауата асабиква рырчара йазгІауырщтуа 5,3 процент йгІашІарышвта 19 проценткІдза ракІвпІ йнадзауа. Хвырзыгв, Къартджьурт, Верхний Учкъвлан, ЧапаевскI кытква, Мелогорек поселок квтанай апхьартаква рапхьагІвчва зымгІва (процент 100) рщыбжьанчара хвыдъа йырзадыргалитІ. Анахьанат ареспублика апхьартаква рпны асабиква рырчара йаквшвауа ахча ан-абачва йыршвитІ. СабикІ йырчара мызкІы ауацІала сом 1350–1680 аквшвитІ. ГІарита 2-джь–3-гІвы зму рыхъазла ауи апхьадзара щардачвапІ, зымгІвагьи рымч гьаквхъум. Къарча-Черкес Республика апрокурор йзаместитель Гербеков Али йгІачважвара апны асабиква рырчара шакІвшауала архъвыхраква ргІарбараква дрыквгІашІастІ. – Апрокуратура анхагІвчва асквш 2018 ауацІала йакІвдыршаз архъвыхраква рагІан апхьартаква рпны ахабза шдырхъйауа хІырхъвыхтІ. Арыпхьара уысква йгьи щыбжьанчара шадыргалуа апхьарта кІьыдаквакІ рпны уарыразуашта йгьаъам, ауи йгІалцІла заман айшыс ауацІала абжараква шдрыдзуашла швъата 19 рзыгIгIвтІ. ХIапхъахьылагьи ауат йрапшу ауысква хIылапш гьырхъыхIхуашым, – йхІватІ апрокурор. АгІарысабапыгІвчва рхвитнагІаква рхчара ахъпшылрала а-Федеральна УнашвахъцІарта аъачІвагІагІв хъада Данилина Ирина йшгІалылкІгІазла, архъйагІв власть органква апхьартаква рпны асабиква рщыбжьанчара адгалра гватрадъа йгІаныржьта амаль гьамам. Астол гьагьа йалаз йшырхІвазла, апхьагІвчва рызгІвадара аъаща рырчара тамамта йадгалра йапщылапІ. Амуниципальна районква ауи ауыс йаквнагу гватра азылырхра шатахъугьи гІалыркІгІатІ.