АНХАРА ТЫПКВА ЩАРДАХИТI

ХIреспублика апны ахшгIархарджьра йазынархата абзазара йаларжьуа аинвестиция проект апкъ йтата Хъвыжвду кыт апны уыжвгIанчIви рахвырхIарта асквш 2018 агIан йыруыхватI. Ауи асквш адзын агIан Дания йгIатыргаз «голштин» тлапкъ жвыта 470 ауаъа йандыргIалтI. Асквш 2019, январь а 16 ужвыгьи 445 гIаргхтI. Апроект апны йгIарбу ахачIвква инвестиция ахчата сом мильуан 650 рыквшватI. Ауи йауата асом мильуан 300 кредит ахчапI, арахьари ауыс згIаджвыквцIару «Сатурн» фермер млыкврхIарта йгIаунащттI. АрахвырхIарта пхатша хIреспублика ахъазла социальна магIны зму проектта йъагIалыркIгIаз йгIалцIла ауи абзазара йалазжьуа «Рея» фирма асквш 2018 агIан льгот кредит гIапшцIнагатI. Ауи асквш Дания йгIаргыз арахв злархвгIаз ахча ахъвыкI (сом мильуан 36) рзыгIащаквдыргылхтI. Асквшква 2019–2020 руацIа йара ауаса сом мильуан 36,8 гIарыртхтI. Ауи йахъазымкIва, йцIыхъвахауа агIвысквша руацIа хшы щардата йъапшцIырщтыз ахъазла сом мильуан 35 айхIа субсидията йгIарырттI. УахьчIвала аферма апны ажвква хвынла йрылахIатI, гIвынзыкьи бжакIи йнадзитI. «Голштин» тлапкъ йгIалцIыз хшы щардата йгIазымцIуа жвы рхIара йазалху апроект апкъ йтата хшы, ауи йгIалырхуа пкъыгIвата сквшыкI апны тонн цынзыкьдза рызгIархарджьуата анхараква адыргалра атахъыпI. ХIреспублика арахьарат амлыкврхIартаквагьи зтлапкъ бзийу рахвы дырхIарныс рылшитI. Хъвыжвду аферма шIыц апны йдырхIауа ажвчIвыскви ачвчIваракви хIышта афермерква йддрыхвгIитI. УахьчIвала ауаъа арахвырхIара тшауацIнадрыхуата хшкомплекс ауыхвара йазынарху аинвестиция проект йгIвбахауа ахъвы абзазара йаларжьитI. Ауи апкъ йтата ахIвысква, ажвква ъаркIуаш, рахв фачIвы ъархчуш, дзы гIахъазцылуа астанцияква, адзцагаква руыхвуштI. ЗымгIва шалу апроект сом мильуан 437 аквшвитI. – «Рея» фирма агIвысквша руацIа ахшгIархарджьра гIардахIвта йпхьадза ауаштI. СквшыкI апны хшыта тонн цынзыкь пшцIырщтитI. Ауи хачIвыта йрыквыз ацкIыс процент 30-ла рыцIа йщардапI. Анхарта ужвыгьи тшауацIнахыркIвитI, рахв фачIвы дара йгIадырхарджьхра ахъазла амальква гIадрысабапитI. Апроект нхара тыпта йгIаннаршахьаз швкIы йаъарахуштI. ХIара ареспублика аэкономика атшауацIыхра йацхърагIауа арахвырхIарагьи адгьылрхарджьрагьи йрыцхIкIитI. Апхъахьыла ацхърагIараква шхIрыщардуш хIазхъвыцитI, – йхIватI Темрезов Рашид. АрахвырхIарта комплекс рахвфачIвы ъагIадырхарджьуагьи алачпапI. Аферма апны чва ъащтIарцIауа, силос ъатарцIауа ашIунаква аныргIалпI. Араъа арахв йддрыфуа напIыла йгьатдрыпум, зымгIва атехника йачпитI. Компьютерла йынхауа техника тлапIа рхвгIатI, жвагIвы напIыла йырчпуш ауи йархъйитI. Ацех апны йдрыхIазыруа афачIвы ауи йатнарыпитI, арахв зны йырфуш танапситI. ХIкъраль апны ауи апш техника зму мачIсачIпI. Ахъвыжвква йырхъазымкIва, йхъарам акытква йгIартыцIуа ауагIа арахв ферма шIыц апны йынхитI. Ажвква, ахIвысква ъаркIуа халат шкIвокIва, резина щапIхъацIа рышвамкIва заджвгьи дыгьтаржьуам. ЙгIалкIгIара атахъыпI, аферма ъандыргIалыз ашта апхъалагьи рахвырхIартата йшгIадрысабапуаз, ауи «Сатурн» фирма йахъатачIвыран.