АНХАРА ТЫПКВА ГIАНШУШТI

Черкесск город йаныргIалу «Кавказ мясо» нхарта гIаршIыцхрала анхараква джвыквылтI. Ауаъа зтлапкъ бзийу уаса дырхIара йахъазымкIва, ажьы йъадынхалуаш уыжвгIанчIви цех рчпуштI. «Кавказ мясо» гIаршIыцхрала аинвестиция проект пхатша апкъ йтата йгIадрысабапуаш асом 2,7 миллиард «Дамате» кытмлыкврхIара холдинг йгIаунащтуаштI. Уаса ъадырхIуш, ажьы йъадынхалуаш ацех хIапхъа майдза йдрыхIазыруаштI йгьи ауаъа нхара тыпта 450 гIаншуштI. «Дамате» холдинг ацхърагIарала йгIадыршIыцхуа «Кавказ мясо» нхарта апны ахъатачIв пкъыгIва йадынхалхра йахъазымкIва, хIреспублика афермерква руасаквагьи ахвгIалуштI. Ажьы йъадынхалуаш ацех анхара джвыквлырквын, мшкIы апны пкъыгIвата тонн 42 гIадырхарджьуаштI, сквшыкI апны – тонн 12,6 зыкь. «Кавказ мясо» гIаршIыцхра йазынархаз айззара йалан экономика тшауацIыхрала РФ аминистр йапхъахауа йзаместитель БАБИЧ Михаил, КЧР а-Хъада ТЕМРЕЗОВ Рашид, «Дамате» холдинг гIанзыршаз БАБАЕВ Наум, «Россельхозбанк» АО аунашвачпагIв йзаместитель КОНСТАНТИНОВ Денис, Россияла ауасархIагIвчва радкIылара йалу афермерква. Айззара апны Темрезов Рашид ауасажьы адынхалра йазынарху апроект хIреспублика аэкономика ахъазла магIныта йаму гIаликIгIатI. Ауи йшихIвазла, «Дамате» компания Черкесск город апны ажьгIархарджьра джвыквнажьуата хIреспублика ауасархIагIвчва, ахъатачIв млыкврхIартаква ртшауацIыхра йацхърагIуштI. – ЙгIадыршIыцхуа анхарта апны ажьы адынхалра йахъазымкIва зтлапкъ бзийу ауасаква злахъшахъырщтуа, рща зладырхъвыхуа ауыжвгIанчIви технологияква гIадрысабапуаштI. ХIреспублика апны щарда йнамихуата нхара тыпта 450 гIаншуштI йгьи ареспублика бюджет хъахIара азгIазгуа аналогква йгIарылахIуштI. АуасархIара йадкIылу хIфермерква рпкъыгIва ъапшцIырщтуаш рауаштI. «Дамате» компания аунашвачпагIвчва ажьы йъадынхалуаш гIандыршара йахъазымкIва, хIреспублика амлыкврхIартаква ртшауацIыхра йазынадырхуш ахча гIауырщтуаштI. Ауи хIреспублика ахъазла магIын ду амапI, – йхIватI Темрезов Рашид. Бабич Михаил йшгIаликIгIазла, «Дамате» компания апроектква рыпкъ йтата йгIахъыртIуа анхартаква рпны архарджьра тшауацIнахитI, анхара тыпква гIаншитI. – Аинвестор пхатшаква Лагъь КIавкIаз ареспубликаква рпны рбизнес тшъауацIнадрыхуа абзирала анхара тыпква гIаншитI. Къарча-Черкес апны абзазара йаларжьуа апроектгьи афермерква цхърагIарата йырзалуаштI. ХIапхъа араъа йауырщтуаш анхарта йыгьсквшыкIым йъадзанхуш, ауи гIахъызтIуа ауагIа хъара йпшитI, акъральгIвчва рбзазаща агъьчIвра йазхъвыцитI. Экономика тшауацIыхрала РФ а-Министерства СКФО асубъектква рпны ауагIа зрыразуа апсахраква ргIаныршара къару ду аланацIитI. Къарча-Черкес нхара йгIайыз акомпания пхатша йылнахыз ахачIвква зымгIва шдырхъйуш, уыжвгIанчIви гIархарджьырта шауырщтуаш кьангьаш гьалам, – йхIватI Бабич Михаил. – Ауаса тлапкъ бзиква рырхIара, ауат ржьы уадынхалырныс файда алапI. Асыс ангIадрира угIалагата ауи атлапкъ ъадырхъвыхуаш лаборатория, ветеринар къвырльыкъвхарта гIаныршара магIын ду амата йхIпхьадзитI. Араъа уасажьы йъадынхалуаш цех ангIахъхIтIуашзара, жьы бзита йызкIуа уаса пхатша шхIырхIушгьи хIазхъвыцра атахъыпI, – йгIаликIгIатI «Дамате» компания гIанзыршаз Бабаев Наум. Ауи йшихIвазла, хIапхъа йгIахъыртIуаш ажькомбинат апны йынхуш ауагIа ауыжвгIанчIви технологияквала ажьы йшадынхалуа йазырбжьуштI, йатахъхузтын, рарыпхьара адыргалуаштI. «Дамате» компания аъачIвагIагIвчва ажурналистква йшгIарархIвызла, азавод хвнархаракIла йгIадыршIыцхуаштI. Ажьы йанадынхалуа арызкъы агьама, акъуатра ачвымдзра, йцкьазлара ахъазла агIархарджьра апны атехнология шIыцква гIадрысабапуаштI, анхарта асанитар аъаща гватра ду азалырхуаштI. АгIархарджьра аэкология йамзарархара ахъазла амальква гIадрысабапуаштI. Аинвестиция проект апкъ йтата йгIандыршуш ауасащырта апны сахIаткI ауацIа уасата 300 рзыщуата автоматика андыргIалуаштI. Ауаъа ажьы анадзара зырхъвыхуаш аъачIвагIагIвчва нхуштI. Уаса ъарщуаши ажьы йъадынхалуаши кIьыдазлуштI. АгIархарджьра апны йгIадымрысабапуа ахъшвалква йъарыдынхалуашгьи рчпуштI. Ажькомбинат адгьылта жвыгIвгектаркI гIацIанакIитI, агIархарджьра объектква квадрат метр 17-н зыкь йнадзитI. ЙгIадыршIыцхуа азавод апны ауасажьы йгIалху йбжахIазыру афачIвква, жьлагахьа, йапшым аконсервква гIацIырщтуаштI.