АНХАГIВЧВА РХВИТНАГIАКВА ЙРЫЗГЫЛАПI

Февраль а 14 нхарали социальна тшауацIыхрали КЧР а-Министерства асквш 2019 ауацIала йшынхаз йгьи асквш 2020 ахачIвква йъарыквчважваз алачIвара акIвшатI. Ауи йалан КЧР а-Правительства а-Председатель йзаместитель СУЮНОВ Джанибек, КЧР Ажвлара палата агIащтийыгIв ТОТОРКУЛОВ Шагабан, Къарча-Черкес апны агIвычIвгIвыс йхвитнагIаквала ауполномоченна УМАЛАТОВА Зарема, Россия УагIахъа фронт (ОНФ) КЧРла ахъвшара а-Исполком унашва ахъызцIауа КАППУШЕВА Людмила, нхарали социальна тшауацIыхрали КЧР а-Министерства анхагIвчва, хIреспублика асоциальна нхартаква ръачIвагIагIвчва. ЙтыцIыз асквш ацIыхъвагIарбараквала йауацIыхта дгIачважватI нхарали социальна тшауацIыхрали КЧР аминистр ОХВТА Анзор Фуъад йпа. Ауи йшгIайхIвазла, асквш 2019 агIан нхарали социальна хчарали акъральыгIва политика абзазара йалажьра афедеральна йгьи ареспублика бюджетква ахчата йазалырхыз сом 3 миллиардкIи мильуан 398-и йнадзитI. ЙцIыхъвахауа ахысквша рпны абзазагIвчва рсоциальна хчарала акврыдзраква сом мильуан 459,8-ла йалахIатI. Альготква, ахча цхърагIараква йгьи акомпенсацияква зыкь 130-гIв райхIа йрадзатI. Аминистр йцаз асквш апны рахIа хъгалра змата йгIаликIгIаз «Демография» уагIахъа проект акIвпI. Ауи акIвымкIвагьи, нхарали социальна тшауацIыхрали КЧР а-Министерства гIвреспублика проекткI «Финансовая поддержка семей при рождении детей» йгьи «Старшее поколение» йрыцнакIтI. Йапхъахауа апроект сабита йгIадриуа йрылархIара йазынархапI. Ауи апкъ йтата 9476-гIв социальна цхърагIарата сом мильуан 803,3 гIарадзатI (ауи йауата сом мильуан 135,5 ареспублика бюджет йауапI). ПычIвта саби дзауыз тгIачвипхьадза цхърагIарата мзигIадза афедеральна бюджет йгIалцIуата сом 9608,0 гIарадзатI. Йшалу 2244-гIвы – сом мильуан 212,9 рзалырхтI. Асквш 2020, январь а 1 угIалагата йапхъахауа саби дзауа атгIачваква мзигIадзапхьадза ахчата йырзалырхуаш датшата йгIарпхьадзуштI, – йгIаликIгIатI аминистр. – АтгIачва рквтанай хъахIара йтыцIыз асквш йгIвбахуз ахмызкI агIан абзазагIв рахIа ймачIта йгIайтахъхауа ареспубликала йщаквгылаз ахча гIвба йчпата йахънамхIвузтын акIвпI мзигIадза ацхърагIара анырзалырхуаш, ауи асаби хысквша днадзандзыкIьа йгIарыртуаштI. Охвта Анзор датшагьи йшгIайхIвазла, асквш 2019 угIалагата йгIвыджьхауа саби дзауа атгIачва ареспублика абюджет йгIалцIуа зынцхърагIарата сом зыкь 20 рнатитI. Ауи апш цхърагIарата сом мильуан 20,2 тгIачвата 1003 йгIарадзатI. ЙхыгIвхауа саби дзауа атгIачва мзигIадзапхьадза сом 9608 рзалырхитI. ЦIыпх ауи апш цхърагIара 5422-джь йрадзатI, ахчата йгIадрысабапыз сом мильуан 483,8 надзитI. Ари ацхърагIара ауысла ареспублика хабза йадынхалхтI. Ауи апкъ йтата асквш 2020 январь угIалагата ауи апш цхърагIара йхыгIвхауа асаби йхъазымкIва, йащтагIайуата йрауа (йпщыгIвхауа, йхвыгIвхауа) рыхъазлагьи йгIарыртуаштI. ЙгIалкIгIара атахъыпI сабипхьадза йрыквшвауа ахча йацыта йшрыртуаш. ПщгIвы йгьи йайхIата саби зму атгIачваква республика ан капиталта сом зыкь 105,5 рзалырхитI. Асквш 2019 агIан ан капитал 807-гIвы йрырттI, йшалу ахчата йазалырхыз сом мильуан 85,8 йнадзитI. Саби дзауа атгIачваква ахча цхърагIара драдзарала ареспублика проект асквш 2019 агIан сом мильуан 803,3 азалырхтI, асквш 2020 агIан ауи сом мильуан 1213,8 азынадырхуштI. Афедеральна бюджет йгIалцIуата цхърагIара гIарадзитI саби зму ар къвырльыкъвхагIвчва ртгIачваква; саби драуырныс йазпшуа ар къвырльыкъв зхауа рхъапщылаква; асаби сквшыкIи бжакIи днадзандзыкIьа ан мзигIадза цхърагIара гIацIылгитI; саби дгIазлахIауа заджвипхьадзагьи зынцхърагIара гIапшцIыргитI. Ареспублика бюджет йгIалцIуата Къарча-Черкес апны тгIачвата 2645 йырсабита 51243-гIвы мзигIадза социальна цхърагIара раутI. Ан йа аба дныкъвадыкъвата саби зщарду тгIачватагьи 16919 социальна цхърагIара рзалхрала амальква зымгIва гIахIрысабаптI. ЙгIалскIгIара стахъыпI йнахIахвуа арат амальква хIышта адемография аъаща шагъьначIвуа йгьи сабита йгIадриуа йшрылахIауа. Асквш 2018 йашIуырпшрыквын, цIыпх сабита адуней йгIаквлыз 160-гIвла йайхIапI, рпхьадзара 2126 йнадзитI, – йгIайхIватI Охвта Анзор. Аминистр нхарали социальна хчарали РФ а-Министерства йгьи йбаргву бзазара аъаща йташваз асабиква рцхърагIарала а-Фонд йадыргалуа «Асквш атгIачва» россия анкъвакъвра хIреспублика йпщынхауата йшалалыз гIайхIватI. КЧР-ла ауи анкъвакъвра акьазу апны «Сельская семья» номинацияла йапхъагылагIвхаз Къарча район йауу СалпагаровргIа Москва йакIвшахыз атгIачва бзиква рыртлапIара йалан. ХIышта ауацIала йгIалыркIгIаз атгIачваква Охвта Анзор нхарали социальна тшауацIыхрали КЧР а-Министерства а-ЧIахIра ртшхъвагаква ритуата йразыра ажваква рзынайырхатI. ЙапхъагылагIвхаз йрыуапI Черкесск абзазагIвчва НауменкоргIа Сергей йгьи Татьяна («Многодетная семья»); ХIабаз район йауу ТхIакIвмащргIа Руслан йгьи Аннета («Молодая семья»); Устьджьгваты район йбзазауа ЭркеновргIа Хвсей йгьи Мекка («Золотая семья России»); Абаза район йауу ХвынаргIа Заудини Марии («Семья хранитель традиций»). Асквш 2019 агIан хвгIвы йгьи йайхIата саби гIадзынзыргылыз аныта 1952-гIв раъара «Материнская слава» республика ЧIахIра гвплацIа йанкъвгагIвхатI. Охвта Анзор «Старшее поколение» проект абзазара йшаларжьуа даквгIашIасуата йшгIайхIвазла, нхарали социальна тшауацIыхрали КЧР а-Министерства аунашва йацIу асоциальна цхърагIара нхартаква рпны йшалу 900-гIвы райхIа нхитI, ауат йрыуата йнаскIьахьаз ауагIаква йрызцумца йырхьпшуа 357-гIв йнадзитI. Асквш 2019 ауацIала йапшым социальна хьпшра 12-н зкьыгIв раъара йддрадзитI, «АзхъацIара телефонла» тшырзыгIаназырхаз рпхьадзара 7-н зыкь йнаднацалитI. Акытква йбзазауата сквш 65 айхIа йырту азгIвадарахчартаква йызларгуш транспортта 15 рхвгIатI, ауатла уагIата 1923-гIв атдрыпатI. «Старшее поколение» республика проект апкъ йтата асквш 2020 агIан Черкесск апны йызхъазхаз атажв-лыгажвкви аныкъвадыкъвакви рыхъазла тып 122 зму атдзы-интернат ауыхвара алдыргуштI. Гватра ду рзалхын Абашта айсра Ду аветеранква. Аветеранква йгьи айсра йаладзыз ртгIачваква бзазартала йадгалазлара ахъазла асквш 2019 агIан афедеральна бюджет сом 19 мильуанкIи зыкь 798-и гIаунащттI. Ауи 15 тгIачвакI йрыхъватI. Ауи йахъазымкIва, айсра алакшараква йрылаз, ныкъвадыкъвара зму йрыуата тгIачвата 20 рбзазартаква агъьырчIвырныс субсидията сом 664074 дасугьи йырзалырхтI. АлачIвара йалаз нхарали социальна тшауацIыхрали КЧР а-Министерства датшагьи ахъпшылра йацIу уыста йызхагIвазаз йрыуапI «Доступная среда» къральыгIва программа шдырхъйауа, йкIьыду акъральгIвчва рсоциальна реабилитация шакIвдыршауа, социальна нархара зму акоммерция йалам аорганизацияква шгIарцхърагIауа, анхаша йгьи анхара уысква рагъьчIврала амальта йнарахвуа. – «АчIахIри Ахъмаштылри рюбилей» сквшы апны а-Министерства ахачIв хъадаква йрыуапI хвду зквхIцIауа аветеранква социальна цхърагIарата йгIарадзара атахъу зымгIва рзадгалрала а-Песния Фонд КЧР-ла а-УнашвахъцIарта, агородкви арайонкви йаныргIалу абзазагIвчва рсоциальна хчарала акъвырльыкъвхартаква, датша организациякви аведомствакви аргваныта хIацынхарныс. РФ а-Президент Путин Владимир й-Унашва апкъ йтата Абашта айсра аветеранква, аныкъвадыкъваква, збальыгъ йнамдзаскIва афашист концлагерьква йыртаз, Ленинград блокада зыла йыцIсыз, абашта айсра аветеранква рпхIвыс чвзабаква дасугьи – сом зыкь 75, атыл анхагIвчва сом зыкь 50 гIарадзуштI. КЧР а-Хъада Темрезов Рашид йунашвала Къарча-Черкес йбзазауа аветеранква афедеральна ахча йахъазымкIва ареспублика бюджетгьи сом зыкь 50 рзалнахуаштI, адуней зхIваджьыз аветеранква рхъапщылакви атыл анхагIвчви сом 5-н зыкь гIарадзуштI, – йхIватI Охвта Анзор. Аминистр асквш 2019 ауацIа цхърагIагIв дута йырзалыз афедеральна структураква, ареспублика ведомстваква, ажвлара адкIылараква, акоммерция йалам аорганизацияква йгьи ашIыпIа хъаунашвахъцIара органква ръачIвагIагIвчва дшырзыразу йхIватI.