АНАРКОМАНИЯ ТШАЗТУА ЙРЫЛДЗГIИТI

КЧР а-Хъади а-Правительстви р-Администрация аунашвачпагIв УАЗ Мурат НыхIв йпа йакIвйыршаз анаркотикква ргIарысабапра гIашIакIрала йазалху а-Комиссия алачIвара йалан СКФО-ла РФ а-Президент йгIащтийыгIв, афедеральна инспектор ДРАЛЬЩИКОВ Игорь, КЧР АуагIа Айззара (а-Парламент) а-Председатель ИВАНОВ Александр, агород йгьи арайон администрацияква рхъадаква. Уаз Мурат йшгIаликIгIазла архъйара власть органква, ашIыпIа хъаунашвахъцIартаква, ахабзахчагIвчва рацынхара чкIвыныргIа руацIала анаркомания гIашIакIра йазынархапI. УахьчIвала аъаща рыцIа йагъьхатI, айъазагIвчви ахабзахчагIвчви йшырпхьадзауала, афиан гIарысабапра щцалрата йыззалуа рпхьадзара йалдзгIитI, аптекаква рпны агIвычIвгIвыс дзырхъабльауа ахъвшвква рпшцIыщтра мчыта йахъпшылитI. АлачIвара апны арыпхьарали наукали КЧР а-Министерства агород йгьи арайон администрацияква, ахабзахчара органква рынхагIвчва злу йазалху агвыпква гIандыршарныс щаквнаргылтI, ауат апхьартаква йгьи аъачIвагIа гIацIгартаква рпны чкIвыныргIа рахIа аргваныта йрыдынхалуаштI. Агород йгьи арайон администрацияква рхъадаква «Общество без наркотиков» реабилитация Квта йгьи Черкесск городла анаркомания гIашIакIрала а-Комиссия ашвапхала аволонтерква злу агвыпква гIандыршарныс йаквгIазшIырттI. АлачIвара йалаз «Кавказское здоровье детям» проект шдырхъйауагьи йалачважватI, Къарча районла агIашIакIра нхараква шадыргалуа йалапштI. «Кавказское здоровье детям» социальна проект асквш 2018 йгIашIарышвта йдырхъйитI. Ауи лызхыз «Общество без наркотиков» реабилитация Квта агIаныршагIвчва ракIвпI. Ари апроект йацыркIтI апрезидент грантквала а-Фонд, нхарали социальна тшауацIыхрали КЧР а-Министерства, анаркомания апшIагылрала КЧР а-Комиссия. Ари ареабилитация Квта агенеральна директор Страх Виктор анаркомания тшазтуа рпхьадзара ъагIанакъвыз авласть, ажвлара, ахабзахчара органква рацынхара йапищылитI. Ауи йшихIвазла, апроект апкъ йтата апхьагIвчвагьи, аъачIвагIа гIацIгартаква йрыцIугьи, ауат ран-рабачвагьи йрынйалитI, ашIаква дара йрыквлу ражва рахIа йшаздзыргIвуа гIаргвынгIвуата йджьгару чкIвыныргIа аволонтер мгIвайсра йаланадыркIуаштI.