АМУЗЕЙ ДЫРЧIАДЖЬТI

Къарча район, Учкъвлан кыт апны йаныргIалу атурых йгьи акультура музей акапитальна рчIаджьра амщтахь йгIахъыртIыхтI. Ауи йгIанзыршаз арыпхьагIв, ажвлара уыснкъвгагIв ДЖАНИБЕКОВ Сосланбек Юнус йпа йыхьыз нкъвнагитI. Амузей агIахътIыхра йазынархаз айззара далан КЧР а-Правительства а-Председатель йапхъахауа йзаместитель БАЙЧОРОВ Эльдар. – Турых байа зму Учкъвлан кыт апны йгIадзынгылыз, ауи амшгIвыра агIащаквыргылхра къару щарда алазцIаз Джанибеков Сосланбек адуней йхIваджьищтара сквшыкI цIытI. Ауи агIвычIвгIвыс гвымчIва йбзирала ари акыт апны й-ХIХ-хауа асквшышв йгIахъыртIыз йапхъахауа апхьарта апны уагIахъа музей гIаншатI, – йхIватI Байчоров Эльдар. – Ари апхьарта апны акIвпI йъагIадзынгылыз хIхъа зладухауа йбергьльу агIвычIвгIвысква – Къарча-Черкес облисполком йапхъахауа апредседатель Алиев Умар, агIвгIвы, амедицина наукаква ркандидат Биджиев Асхат, ауысагIв Семенов Исмаил датшагьи. Ауи амузейква ащхъагIвчва ртурых, ркультура, рцIасква рхчара, абанпараква ргвбайара йгьи ртшдырра щаквыргылра йшазынхауа гIаликIгIатI. – Ари амузей ъадзанхауа азаман ауацIа Россия аштаква, агIвымакъральква йгIартыцIыз сасчва щардагIв аъан. АгIаршIыцхра амщтахь апшыгIвчва рпхьадзара йшалахIуш кьангьаш гьазсымам, – йгIаликIгIатI Байчоров Эльдар. Ауи атшын амузей апшцIа апны Джанибеков Сосланбек йсин гIахъыртIытI, амузей арчIаджьра йацхърагIаз Кайшев Владимир йгьи Каитов Али аразыра швъаква рырттI.