АМЛЫКВРХIАРТАКВА ЙШРЫЦЫРКIУАШ ЙАЗХЪВЫЦИТI

ХIреспублика ахабарргагаква рынхагIвчва дгIарынйатI Россия агропромышленна комплекс астраховщикква радкIылара – агростраховщикква руагIахъа союз (НСА) апрезидент БЫЖД КIарней ДаткIа йпа. Москва йбзазауа хIхаквлагIв Псыжв кыт дауапI. Ауи Ростов къральыгIва университет экономика факультет йгьи Ломоносов Михаил йыхьыз зхъу Москва къральыгIва университет аспирантура дгIарылгатI, аэкономика наукаква дыркандидатпI. Ахъыхчара бизнес асквш 1995 угIалагата далапI, «Росгосстрах» хъыхчара компания апны ъанатIа щарда гIайызхъарцIатI. «Ласкор», «Сибур» хъыхчара компанияква, «Согаз» ОАО рунашвачпартаква рпны дынхатI. Асквш 2011 октябрь угIалагата НСА унашва ахъицIитI. «Национальный союз агростраховщиков» (НСА) йгьи акыт млыкврхIарала КЧР а-Министерства хIреспублика адгьылрхарджьыгIвчва йгIацIаргауа атшыгIвра хчара йазалху апрограммаква шацлырхуаш йазхъвыцитI. Адгьыл йадынхалуа афермерква апсабара пхастаква анрызарархара абаргвыраква йрынйитI. АгIайыраква рыцIа йрызарархауа агIаншараква йрыуапI апша чвгьа, агъ зцIу аква мчы. Ажва ахъазла, агIвычIвгIвыс сквшыкI дзайгвыгъауа атшыгIвра агъ йарпIапIарквын, алдзгIараква дзачIвыйа йзыгIащаквзыргылхуаш? НСА йгьи акыт млыкврхIарала КЧР а-Министерства адгьылрхарджьыгIвчва апсабара пхастаква йрызгIаргуа алдзгIараква рзыгIащаквыргылхрала акъральыгIва цхърагIараква гIадрысабапырныс рмурадпI. Ари ауыс йгьызным йъадзалачважвахьу. Сентябрь а 23 Черкесск город йтагылу Апечать а-Тдзы апны йайззазгьи адгьыл йадынхалуа ртшыгIвра шырхчуш йалачважватI. Айззара йалаз НСА апрезидент Быжд КIарней ДаткIа йпа йшихIвазла, НСА йгьи «Банк России» ргIарбараквала, йцIыхъвахауа асквшква хIреспублика адгьылрхарджьыгIвчва йгIапшцIыргаз ахъыхчара полисква швабыжта ймачIпI. КъральыгIва цхърагIарадъа ахъыхчара полисква сабапрата йгIаргуа уарыразуашта йгьаъам. – Къарча-Черкес адгьылрхарджьыгIвчва апсабара пхастаква йандрыгвжвайуа агIаншараква гьмачIым. Ажва ахъазла, ашуара адгьыл анарпшшара атшыгIвра гьбзихум, апшагьи агъгьи зцIу аква чвгьа агIайыраква швабыжта йрызарархитI. Апсабара пхастаква ансисквшагьи лдзгIарата йгIаргуа щардапI. ЙагIвсыз асквш хIреспублика адгьылрхарджьыгIвчва йрадзаз алдзгIараква рзыгIащаквыргылхрала афедеральна бюджет сом мильуан 120 гIаунащттI. ГIвадахь Россия апны апсабара пхастаква йырхъазымкIва, арахв згIваква рабакIрала ауысквагьи аквыргъвгъвапI. АкъральыгIва ацхърагIарала афермерква рымлыкв, рхъахIара шырзыхчуш апшта амальква гIарысабапра атахъыпI. Адг ь ы л рх а р д ж ь ы г I вч в и ахъыхчара организациякви рацынхара анзыргIалуаш йазакIу проект алыхра хIадынхалитI, – йгIаликIгIатI Быжд КIарней. Ауи йшихIвазла, хIреспублика адгьылрхарджьыгIвчва йгIацIаргауа атшыгIвра ансисквшагьи йалахIитI. Асквш 2018 ауацIа сом миллиард 28,5 ахв айхIа ацIаргатI. – ХIкъраль йгIадырхарджьуа акытмлыкврхIара пкъыгIваква агIвымакъральква рпны йпшцIыщтрала анхараква ртшауацIыхра йазалху ауагIахъа проект КъарчаЧеркесгьи йацнакIтI. Ауи апкъ йтата йагIвсыз асквш доллар мильуан 7,5 ахв пкъыгIва пшцIырщттI. Асквш 2024-дза хIреспублика йгIадырхарджьуа йауата агIвымакъральква рпны йпшцIырщтуаш рыцIагьи йалахIара атахъыпI, – йхIватI Быжд КIарней. Ауи датшагьи йшгIаликIгIазла, хIреспублика апны ашвыр цIлауатраква ргIаныршарала анхараква джьгарта йакIвшитI. ЦIла бзи ъаларцIахьаз аштаква йырхъазымкIва, апхъахьыла хвысквша руацIа ужвыгьи гектар зыкь 1,5 йгIарыцIанакIуа аштаква рпны цIла шIа ларцIуштI. – Ауатраква рпны йгIацIаргуш ашвырква ъархчуш, йъапшцIырщтуаш, йъарыдынхалуаш анхартаквагьи руыхвуштI. Апшвымаква ауатгьи шырхчуш йазхъвыцра атахъыпI, – йгIаликIгIатI НСА апрезидент. Айззара апны акыт млыкврхIарала КЧР а-Министерства агIащтийыгIвчвагьи, НСА йалу «Росгосстрах», «ВСК» хъыхчара компанияква рхъвшараква рунашвачпагIвчвагьи гIачважватI. Ауат НСА йгьи акыт млыкврхIарала КЧР а-Министерства йацлырхуа ахъыхчара проект абзазара йалажьра йшацыркIуаш, АПК анхагIвчва аргваныта йшрыцынхуш рхIватI. Айззара йалаз ажурналистква разцIгIараквагьи джьауап гIарырттI