АМАМЫРИ АКЪЫЛЬАКВШВАРИ ЙРЫЗГЫЛАПI

МартI а 16 йакIвшаз Къарча-Черкес Республика амсылманква р-Дин УнашвахъцIарта (ДУМ КЧР) й-X-хауа аотчет-алхра съезд йалан КЧР а-Правительства а-Председатель йапхъахауа йзаместитель ЧЕККУЕВ Хзыр, КЧР а-Хъада йгьи а-Правительства р-Администрация а-Хъада йзаместитель СЕМЕНОВ Ахмат, ауагIахъа уысквала, ажвлара коммуникацияквала йгьи печатьла КЧР аминистр йапхъахауа йзаместитель ХВБИ Ислам, а-Дин УнашвахъцIарта знапIыцIу БЕРДИЕВ Исмаил-хIаджь, апротоиерей НАРТОВ Александр, хIреспублика агородкви арайонкви рмуфтква, Нальчик город йгIатыцIыз адиннкъвгагIвчва. Чеккуев Хзыр КЧР а-Хъада Темрезов Рашид хIреспублика амсылманква р-Дин УнашвахъцIарта йазцауа йтшазынархара дгIапхьатI. «ХIреспублика адиннкъвгагIвчва ауагIахъаква ракъыльаквшвара рыбагъьарала, чкIвыныргIа аэкстремизми атерроризми йырчвырхчауата йырхауа ауыс магIын ду рымапI. КЧР амсылманква р-Дин УнашвахъцIарта ацхърагIарала агородкви акыткви рпны амаджьгытква руыхвитI, йгIащаквдыргылхитI, саби щарда зму, зхъахIара накъву атгIачваква йрыцыркIитI. АдиннкъвгагIвчва швмурадква йанакIвызлакIгьи йгIашвдарыхIв, згIвадара багъьа швымата мамырта швырбзаза» – йаныпI атшазынархара. Амсылманква р-Дин УнашвахъцIарта йцIыхъвахауа ахвысквша руацIа нхарата йакIвнаршазла отчет йчпатI Бердиев Исмаил-хIаджь. Ауи хIреспублика акытква рпны амаджьгытква шыруыхвауа, йшдырчIаджьуа гIайхIватI, ауагIа йшырцхърагIауа, агвчIагIвра фондква, ажвлара организацияква йшрыцынхауа, амадырсква йгьи Исльам институт рпны чкIвыныргIа шадрыпхьауа датшагьи анхараква дрыквгIашIастI. Бердиев Исмаил-хIаджь йшгIаликIгIазла, Черкесск апны йыруыхвауа амаджьгыт шIыц хIапхъа мартI йгIахъыртIуаштI. – КЧР а-Хъада Темрезов Рашид йцхърагIарала амаджьгыт шIыц йапхъахауа аэтаж апны намаз учпа ауашта йдыргIапсхьатI. ЙгIанхаз анхараква асквш ауацIа йалдыргарныс хIгвыгъитI, хIапхъа мартIдза йхIазырхуштI, – йхIватI Бердиев Исмаил-хIаджь. УахьчIвала хIреспублика апны маджьгытта йаъу 130 райхIа йнадзитI. Ауат рызджьакI шIыцта йыруыхватI, арахьарат гIащаквдыргылхтI, капитальна рчIаджьра ддрадзатI. – Амаджьгыт ауыхвара гIаджвыквхIцIазтын, ауи бжачпата йгIанымхара ахъазла йхIтлакIьуа хIчпара атахъыпI. Ажва ахъазла, ахIаракьатчпагIв, аполитик Березовский Борис йцхърагIарала Псыжв кыт апны зныкI йгIаджвыквырцIаз амаджьгыт ауыхвара гIашIасын, заман бзидздза бжачпата йгылан. Амаджьгыт ауаса йгIанымхара ахъазла акыт абзазагIвчва тшадыркIылын, ауи йатахъыз адыргалтI, пшдзата йырчпатI. Амаджьгытква руыхвара йацхърагIауа, рынкъвгара ахча азалызхуа ауагIа АлахI дшвзыразхатI, згIвадара багъьа швымазтI, – йгIаликIгIатI Бердиев Исмаил-хIаджь. Айззара апны КЧР амсылманква р-Дин УнашвахъцIарта апредседатель йуысгьи йалапштI. Асквш 2021, февраль а 3 йакIвшаз КЧР амсылманква р-Дин УнашвахъцIарта апленум алачIвара йалаз агIважвагIв Бердиев Исмаил-хIаджь йыхьыз гIархIватI. Асъезд йалаз йацшIакIта ауи йыхъазла напIы щтIырхтI. Бердиев Исмаил-хIаджь хвысквша КЧР амсылманква р-Дин УнашвахъцIарта дапредседательызлуштI. Ауи ауагIахъаква райгвара рыбагъьара,