Ареспублика филармония апны ауыхвагІвчва рыМш йазынархаз гвыргъьахъв айззара акІвшатІ. Ауи йалан КЧР а-Правительства анхагІвчва, КЧР а-Парламент адепутатква, ареспублика агородкви арайонкви рунашвачпагІвчва, ауыхвара нхартаква рынхагІвчва.
АуыхвагІвчва ргвыргъьахъвла драйхІвахІвтІ КЧР а-Правительства а-Председатель йзаместитель СМОРОДИН Сергей.
– АуыхвагІвчва ры-Мш уагІахъа гвыргъьахъвта йпхьадза ауаштІ,–йхІватІ ауи. – АуыхвагІв йпщылапІ хІыуа дзачІвызлакІгьи йбзазара анадзара. АгІвнабзазартаква руыхвара, агородква рархитектура квпшыра агъьчІвра ймамыру, йтынчу абзазара йагІарбагапІ. Къарча-Черкес апны зыкьпхьадзара йнадзауа архитекторква, апроект лыхыгІвчва, ауыхвагІвчва, ауыхвага пкъыгІваква гІацІызщтуа рбзирала хІкытква, хІгородква рпны ауыжвгІанчІви тыдзква, асабигIзартаква, апхьартаква, айъазартаква, афизкультуразгIвадара рыбагъьара комплексква, атшпсщартаква руыхвитI.
Смородин Сергей йшгIаликIгIазла, хIызту асквш апны социальна магIны зму уыхвара щарда абзазара йаларжьуаштI: Черкесск, Къарча городква йгьи Учкекен рпны хынзыкьыгIв йырзалху апхьартаква; «Теберда–Домбай» газцага; Черкесск, Къарча городква, Малый Зеленчук кыт, Преградна станица рпны Физкультура-згIвадара рыбагъьара комплексква; тыпта 1560 зму жвасабигIзартакI датшагьи.
– ЙлыхIхыз ахачIвква гьмайрам, ауаса йхIзымырхъйушта йгьаъам,– йхIватI КЧР а-Правительства а-Председатель йзаместитель. –ХIреспублика а-Правительстви ауыхвара нхартакви рацынхарала ауат ахачIвква шхIзынардзуш йазхъасцIитI.
Смородин Сергей зынхарала йгIалыркIгIаз ауыхвагIвчва КЧР а-Правительства ачІахIра грамотаква риттI.
АуыхвагIвчва йрайхIвахIвтI хабзалыхрала йгьи акъральыгIва уыхварала КЧР а-Парламент акомитет аунашвачпагIв УМАЛАТОВ Владимир, уыхварали ЖКХ-ли КЧР аминистр ГОРДИЕНКО Евгений. Ауат хIреспублика апны ауыхвара тшауацIнарыхра къару щарда алазцIауа аъачIвагIагIвчва КЧР АуагIа Айззара (А-Парламент) а-Президиум, уыхварали ЖКХ-ли КЧР а-Министерства рчIахIра грамотаква рырттI.
Комментарии