Амалсыз кереклилеге машинала берилдиле

Мындан алда Россия Федерацияны Социал страхованиесини фондуну Къарачай-Черкесияда бёлюмю, саулукълары къарыусуз болуб, къымылдаргъа аз мадарлары болгъанлагъа джюрютюрге тынч болгъан джангы машинала бердиле.

«Социал страхование фондну регионал бёлюмю 2000-чи джылдан бери сакъатланы машинала бла баджарыб кюрешеди. Алагъа игилик теджей, джашау халларын тынч этерге излейди. Ала машиналада амалсыз джюрюрге тыйыншлы къауумдула. Биз, медицина кёргюзюмлери алайгъа буюргъан сакъатлагъа излеб, машинала табыб, сатыб алыб беребиз. Ол машинала иш этиб сакъатлыгъына кёре (къолу неда аягъы болмагъанлагъа), аллай къауумгъа теджелиб этиледиле», - деди Социал страхованиени фондуну регионал бёлюмюню тамадасыны заместители Елена Зинченко.
Бу джол сакъатлагъа 6 джангы машинаны ачхычларын Къарачай-Черкесияны Правительствосуну Председатели Аслан Озов бла КъЧР-де ФСС-ни бёлюмюню тамадасы Крым Казанаков бердиле.
Елена Зинченко айтхандан, машинала хакъсыз 7 джылгъа бериледиле. Андан сора аланы дагъыда джангы машинала алыргъа эркинликлери барды. Аны тышында аллай бир заманны ичинде машинаны тамамлы ремонтун Социал страхованиени фондуну регионал бёлюмю этеди. Сакъатлагъа квартал сайын бензиннге, джаугъа деб да ачха бериледи.
Къарачай-Черкесияда озгъан 3 джылны ичинде джангы машинала 40-дан артыкъ сакъат алгъанды. Алагъа 2015-чи джыл 13, 2016-чы джыл 18, 2017-чи джыл 10 машина берилгенди. Мындан ары да ол сууаблы иш бардырылгъанлай турлукъду.
Лепшокъланы Хусеин.