Актуально В КЧР открылся самый высокогорный ФОК Актуально Глава КЧР Рашид Темрезов в Учкулане поприветствовал участников конного перехода, проходившего в честь Дня Победы и Дня возрождения карачаевского народа Актуально Республиканская весенняя ярмарка проходит в столице КЧР Актуально В КЧР прошла конференция к 90-летию Юрия Калмыкова с участием делегации из Турции Актуально В столице КЧР подвели итоги и наградили отличившихся участников месяца патриотической, спортивной и оборонно-массовой работы

АКЫТЛА АПСАХРАКВА ГЬМАЧIЫМ

07.11.2019 157
АКЫТЛА АПСАХРАКВА ГЬМАЧIЫМ
ХIреспублика акыткви агородкви ртшауацIыхра йазалху акъральыгIва программаква
рыпкъ йтата акультура тыдзква, амедицина
нхартаква, апхьартаква,
асабигIзартаква руыхвитI, амгIваква йырхьпшитI, млыкврхIарта
гIанзыршарныс, цIла
лазцIарныс зтахъу йрыцыркIитI, ауагIа знадзара бзийу дзыла йадыргалуата анхараква
акIвшитI. Арат ауысква
хъйапхьадза акытква
рбзазагIвчва зрашшуа
абаргвыраквагьи йрылдзгIитI.
Абаза районла ауагIа
рбзазара агъьызчIвуа уыста йдырхъйауа гьмачIым.
Къвбина кыт апны культура Тдзы руыхватI, апхьарта апшцIа физкультура-згIвадарарыбагъьара комплекс (ФОК) рчпитI.
АлбыргIан апынгьи акультура Тдзы ауыхвара джвыквырцIахьатI, сквшквакIла утхъахта акыт аквта
урамквагьи ащъагIв ныкъвартаквагьи гIадыршIыцхтI. АлбыргIанква
сквшщарда цIуата йыззпшуа асабигIзарта ауыхварагьи йдмыркъвауата йалагара атахъыпI. Йара ауаса айынджьыгьквагьи акъарапагваквагьи тшызладыртшхъвуш
ауыс бзиква гьырмачIым.
Арайонла рыцIа йкыт
дуу Псыжв апны сынчIва
йдырчIаджьырныс амгIваква бзита йырхьпшытI,
уахьчIвала адзы ауысла
абаргвыраква алдыргитI. АшIыпIа хъаунашвахъцIара органква рынхагIвчва акытква рсанитар аъащагьи йахъпшылуата нхара ду акIвдыршитI. Аштаква дрыцкьауата асубботникква акIвдыршара йахъазымкIва,
ауагIа рунагIва йгIагварыргауа анышвкъвара
атгарагьи акытква унашва
рхъызцIауа йрыхъвдаквпI.
Псыжв кыт апны
сквшщарда цIитIта анышвкъвара ауыс швабыжта йаквыргъвгъвапI. СквшквакIла утхъахта акыт аурала
ауагIа нышвкъвара ъатарпсуз аконтейнерква
андыргыл ауыс тIакIв
йагъьхушта зымгIвагьи
гвыгъун. Ауаса ари амальгьи акыт ацкьара закIылагьи йгьацымхърагIатI,
анышвкъвара атгара ахча
азызымшвуз ауагIа щардагIвхатI. Акыт аунашвачпагIвчва ари амаль сабапракIгьи шалам ангIаргвынгIвы датша хъатакIла ауыс йадгылтI.
Акытла шIыцрата йаъу
хIахайыргIвазатI Псыжв
кыт администрация ахъада ТОБЫЛЬ Мурат МухIарби йпа.
– Акыт апны анышвкъварала ауыс аквыргъвгъвищтара йыгьсквшыкIым
йагIвсхьу. Аконтейнерква
ъагылаз аштаква йанакIвызлакIгьи йпIайын.
Акыт абзазагIвчва йгIаргвынгIвра атахъыпI рунагIва йгIагварыргауа анышвкъвара йъарбалакI йкIарпсарныс йшахвитым. Йара
анышвкъвара адынхалра анзыргIалуа афедеральна хабза атахъыраква хIмырхъйакIва йгьауам. Ахабза хIырхъйауата сынчIва октябрь а 1
йгIашIарышвта анышвкъвара акыт йтызгауа
«Глобус» фирма хIацынхитI. Ауи анхарта йахъатачIвыру атехника мчыбжьыкI апны гIвымшкI акыт
йгIауацIалитIта анышвкъвара тыргитI, – йхIвитI
Тобыль Мурат.
«Глобус» нхарта йгьи
акыт администрация йадырчпалыз ангIалра апны йшгIарбула, асабшаквала анышвкъвара тызгауа атехника Магазинна, Овражна, ПионерскIа,
Крайня, Береговая, Подгорна, Зелена, Дружба,
Заречна, айщчва КIвыджыргIа, айщчва КвырджьыргIа, айщчва ХIаткъваргIа, айщчва МалхIвазргIа рыхьыз зхъу
датшагьи аурамква йыруацIситI. Амтшашаквала Къвныжв ЗамахIщари
йыхьыз зхъу, Шоссейна,
Шан КIарней йыхьыз
зхъу, Набережна, ЧквтIу
ШахIым йыхьыз зхъу аурамква рпны анышвкъвара азыркIкIитI. Анышвкъвара тгара аунагIва
йбзазауа заджвы мызкIы
апны сом 79,53 азишвара атахъыпI. Анышвкъвара ъатыргауа, йъархчауа, йъадынхалуа йаквшвауа зымгIва ауи атариф йаланакIитI. Атдзы
йыцIагIвта, ауаса датша
зджьара йбзазауа акыт
йштам зырцIабыргуа ашвъаква гIадырбарыквын,
ари акоммунальна цхърагIара закIгьи гьазыршвум.
– Акыт абзазагIвчва рунагIва йазыркIкIуа анышвкъвара мчыбжьыкI апны
зны атехника йтнагауата
анхараква шакIвшауа йазыразым администрация йгIайитIта, ргвбжараква рхIвитI. Акоммунальна цхърагIара йаквшвауа ахча шмачIым, атгIачва дуква ауи ршварныс шырчвхIатлу гIахIгвынгIвитI. Ауаса датша царта гьхIымам, ари амаль
гIарысабапра акIвымкIва
администрация йатлакIьуаш гьаъам, – йгIаликIгIатI акыт администрация ахъада.
Швеция апны ауагIа
йкIарпсауа анышвкъвара (процент 99) ахча гIалырхитI. Ажва ахъазла,
акоммунальна нхартаква
йазыркIкIуа анышвкъвара
(процент 50,6) йадынхалитIта уадыргIвана йапшым апкъыгIваква гIарылырхитI. Анышвкъвара апроцент 48,6 энергия, пхара гIадырхарджьуата йырблитI. ЙгIанхауа апроцент 0,8 акIвпI
йгIадымрысабапхуа, ауи
анышвкъварахчарта апны йкIарпситI. Швеция
апны анышвкъвара йадынхалуа анхартаква
йгIадрысабапуаш нышвкъвара анырзымхъара ауи
агIвымакъральква рпны
йырхвгIитI. Ауат хIреспублика йгIайзарквын, зъара
ртахъу аъара нышвкъвара хвыдъа йрауашын.
Къарча-Черкес апны
анышвкъвара ахча уызгIалхуата анхараква адугалра ахъазла ахча щарда зквшвауа азавод
шIыцква уыргылра атахъыпI. КЧР апны афинанс
уысква шаъу акIвызтын,
анышвкъвара йъадынхалуаш, ауи йапшым апкъыгIваква ъагIалырхуаш азаводква ласы йыгьгIаншушым.
Псыжв администрация анхагIвчва акыт апны
анышвкъвара ауыс алдыргауата хабзала йчпачIву зымгIва шдырхъйуш
йащтапI. АуагIа акыт аунашвачпагIвчва ргIаджвыквцIараква йрыцыркIта анышвкъвара
атгара йшатахъу апшта
йаквдмыршварыквын,
ацкьара рхчарныс хIатлахуштI. АтгIачваква рнышвкъвара амашаквква йыртарцIумца мчыбжьыкI апны зны аурам йгIахвындыргылларквын, ауи тыргалуштI. Ауыс йаквшвауа ахчагьи йаназаману
йыршварыквын, анышвкъвара тгарала анхараква гьгIашIасуашым. Ауыс
датшата йанырзадымгалуазара ауи тшаквуыргIапсра атахъыпI.
АКЪРАЛЬЫГIВА
АЦХЪРАГIАРАЛА
АБЗАЗАРА
АГЪЬЫРЧIВИТI
Асквш 2014 йгIашIарышвта Псыжв кыт апны
мгIвата йгIащаквдыргылхыз, щъагIв ныкъвартата йыруыхваз щардапI.
СынчIвагьи рчIаджьра
йазыбжу аурамква бзита
йрыдынхалтI. КЧР амгIва
Фонд, акыт штаква раныргIалра йазалху ареспублика программа рбзирала анхараква акIвшитI.
– ХIкыт аштаква раныргIалрала анхараква джьгарта йакIвшитI.
СымхIа Михаил йыхьыз
зхъу йгьи Овражна урамква рпны асфальт щтIарцIатI. Заречна урам апынгьи амгIва асфальт щтIарцIара апхъала хIакъвара
аквырпсан йдыргъгъахтI.
Анхараква шакIвшазла ауагIа разхарыквын хIгвыргъьуштI, – йхIвитI администрация ахъада.
Тобыль Мурат йшихIвазла, акыт абзазагIвчва знадзара хIагIу дзыла йадгалрала апроект дрыхIазырхьатI йгьи ауи асквш
2020-дза акыт штаква
ртшауацIыхра йазалху
афедеральна программа йаларцIатI.
– Псыжв кыт апны йыруыхвуш адзцагаква метр
2445 йнадзитI йгьи пщурамкI рпны ауат щтIарцIара атахъыпI. СынчIва
гIвурамкI ракIвпI апрограмма йаларцIаз. УахьчIвала ЧквтIу ШахIым йыхьыз зхъу аурам аурала
(километркI айхIа) адзцага трубаква щтIарцIитI.
УадыргIвана СымхIа Михаил йыхьыз зхъу аурам
апны анхараква джвыквырцIуштI, – йхIватI акыт
администрация ахъада
Тобыль Мурат.
ЧквтIу ШахIым йыхьыз
зхъу аурам абзазагIвчва дзы ъарызкIылыргауа
йгвыргъьитI.
– Сара сквш 51 цIитIта
араъа сбзазитI. Акыт рыцIа-рыцIа тшгIащтIнахитI,
абзазагIвчва хIызрашшуа
йалдзгIитI. ХIызланыкъвауа СымхIа Михаил
йыхьыз зхъу аурам асфальт щтIарцIатI, ужвы
дзы хIызкIылыргитI. Арат
анхараква гIаджвыквызцIаз зымгIвагьи сырзыразпI, – лхIвитI ари аурам
абзазагIв ХIачвыкъва
Лиза Кьарим йпхIа.
АшIыпIа хъаунашвахъцIара органква рынхагIвчва акытква ртшауацIыхра, ауагIа рбзазара
агъьчIвра, ршварагIварадара хчара йазхъвыцуата йрылшауа рчпитI.
Ажва гьалам, йъакIвызлакIгьи абаргвыраква
гьмачIым. Ауаса йагIвсуа асквшква урылапшхырквын, ажвлара зрыразуа псахра бзита йыншауа рыцIа йщардапI.
Псыжв кыт администрация ахъада Тобыль Мурат, ауи йыцынхауа аъачIвагIагIвчва гвып ари
асквш апынгьи социальна
магIны зму уыста йрылшаз гьмачIым. Ауат Къарча-Черкес аунашвачпагIвчва, Абаза район администрация анхагIвчва, дара акыт абзазагIвчва гIарыцIагылуазтын, йрыхъвдакву ахачIвква дырхъйауата ауысква къару ду
рыларцIитI.
157 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный