СКФО В Северной Осетии в 2024 году появятся прямые авиарейсы в Нижний Новгород СКФО Сельхозкооперативы в КБР набирают популярность Актуально Региональный этап Всероссийской олимпиады по истории российского предпринимательства прошел в КЧР на базе КЧГУ Актуально Глава КЧР Рашид Темрезов в Приэльбрусье встретился с активистами Общероссийского движения детей и молодежи «Движение Первых» Актуально Глава КЧР Рашид Темрезов в Тырныаузе КБР принял участие в открытии Дворца культуры им. Кайсына Кулиева

АКЪЫЛЬАКВШВАРА ЪАГIВНУ АУНАГIВА

05.02.2021 133
АКЪЫЛЬАКВШВАРА ЪАГIВНУ АУНАГIВА
Асквшква хъамкIыхла йымгIвайситI. НыбыжькI гIанызцIыз агIвычIвгIвыс йбзазащали мгIвата йамидазли данразу ацкIыс йагъьта йаъайа?! Декабрь агIан сквш 70 зрыцкьаз КВАБАЛА Баблина Маджьид йпхIа лпхыцIа дазыразпI, гвакъвпра лымдыруата тынчта дъагIабзазаз ахъазла Анчва дизыразпI. Баблина асквш 1950, декабрь а 16 АлбыргIан кыт ТIыкIваргIа Маджьиди Мерымхани рунагIва дйытI. Апхьарта дангIалга лылахь гIацIцIтI, Къвбина кыт абзазагIв Квабала Володи лари тгIачва шIыц гIандыршатI. Асквш 1971 Домбай поселок ауыхвараква анджвыквырцIа , атгIачва рпа Азаматгьи дрымата нхара ауаъа йцатI. Ауаъа йъадзаъаз Баблина Орджоникидзе йаныргIалыз аъачIвагIа гIацIгарта апны бухгалтер-экономист ъачIвагIа гIацIылгатI. Лынхара Домбай ачарта апны йджвыквылцIатI. УадыргIвана апоселок а-Совет, «Домбай» сасырта рпынква бзи йылбуз лъачIвагIала дынхатI. Квабала Баблина дъанхалакIгьи луыс дазъазан, дызлашвауа агвып дрангIалуан. Асквш 1992 КвабаларгIа МосковскIа поселок йгIайхтI. Баблина тшпсщара дчIвахындзыкIьара арпхарта комбинат апны дынхатI. Ауи уысдъа зынгьи дгьчIвам. Данынхузгьи, тшпсщара дангIачIвахгьи аунагIва уысква дрылгата заман чIыдакI шлауа закI гIалхъвыцитI, адзахри атадзахракви дырзычпапI, лнапIыла йылрыхIазыруа асогIа чкIвынквала лцриква лыргвыргъьитI, ларгьи гвшIыгъьра лымдыруата дбзазитI. Декабрь а 17 Баблина любилейла йлайхIвахIвуата КвабаларгIа гвыргъьахъв йалан, ахIвахIвраква щардан. Ауи атшын Баблина лбзазара зпылщылыз Квабала Владимири лари йацбзазауищтара йцIуа асквш 50-лагьи йрайхIвахIвтI, ргIариква рани раби гвыргъьахъв рзадыргалтI. Усабиква угIапсара рдырхра, хвы азырбара хIызту азаман апны насып дупI. Баблини Володи ракъыль аквшвауа, йацацхърагIауа, тынчта йгIабзазатI, пакIи пхIакIи гIадзындыргылтI. Асабиква раба Пятигорск технология техникум мацIаугIвы-технологта дгIалган, «Домбай» сасырта дынхауамца ргIариква рщапIы йхвынйыргылтI. «Технологта йынхуз ахъацIа йунагIва апны кIаран дмацIауазмищтI?»-хIва кьангьаш гIазгуашгьи дгIаншуштI. АмацIаура йанаквчважвуз Баблина йанакIвызлакIгьи йылхIвалун: «Азаджв азаджв зынгьи хIгьимайгвгъузтI: йара паса анхарта дгIайхызтын – дмацIауан, сара рыцIа щажьы сгIайхызтын – смацIауан, уыс алых гьхIымамызтI». Ани аби хIцIас пшдзаква рсабиква йрыларцIатI, агIвыджьгьи абызшва ддырдыртI, руагIахъа хвы рзырбауа йырбжьатI. Рпа Азамат Къарча-Черкес къральыгIва технология институт уыхвагIв-плиточникта дгIалгатI, арпхарта комбинат операторта дынхатI, йцIыхъвахауа асквшква амгIва патруль къвырльыкъвхара дрылан, ужвы тшпсищитI. РпхIа Залина Къарча-Черкес музыка училища дангIалга бзи йылбуз аъачIвагIала МосковскIа поселок амузыка апхьарта, акультура Тдзы, й-6-хауа апхьарта рпынква дынхатI, азъазара аджьащахъваракви ашIыцракви апхьагIвчва ахалыргIвазатI, лъачIвагIа дшазъазу гIалырбауата «Асквш арыпхьагIв» анкъвакъвра далан, апхъагыларагьи гIалквнадыргатI, лынхарала лдырраква йшрылалырхIуш дащтапI. Закъыль аквшвауата йбзазауа атгIачва ртаца Марджьанат ахIбачва гватра рзалылхитI, хвы рзылбитI, йыззыбжу гIалгвынгIвитI. Баблина лпа йпа Азнаур январь а 3 сквшы 20 днадзатI. Ауыгьи атгIачва рыхъаз гвыргъьахъвын. ЙшырхIвауала, асквш шгIатаужьуа апшта йакIвшуштI. Декабрь йгьи январь руацIа хгвыргъьахъвкI наздасыз КвабаларгIа ртгIачва йгIаталыз асквш шIыц хайырта, гвыргъьахъвыта йырзалыргIатI, рнашх гIащтIызхуаш рщардата, рунагIва абаракьати атынчри гIвната сквшщарда йбзазаргIатI. Швапха гIазхъухуаш атгIачваква хIщардазтI хIуагIахъа! 
133 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный