АКОНСТИТУЦИЯЛА АПСАХРАКВА ЙРЫЦЫРКIТI

Россия а-Президент Путин Владимир йгIаджвыквцIарала РФ а-Конституция йаларцIарныс йгIархIваз апсахраква хIкъраль ареспубликакви аобластькви рпны ауагIа йрыларгауата нхара ду акIвдыршатI. Ари ауысла ахабзапроект РФ а-Федеральна Айззара йгьи а-Федерация а-Совет алапшхьатI, хIкъраль асубъектквагьи ауи йшацыркIуа гIадырбатI. МартI а 13 йакIвшаз КЧР АуагIа Айззара (а-Парламент) йызкьазумыз йагIбахауа алачIварагьи ауи йазынархан. Асессия йалан КЧР а-Хъада ТЕМРЕЗОВ Рашид, КЧР а-Правительства а-Председатель УАЗ Аслан, аминистрква, афедеральна инспектор хъада ДРАЛЬЩИКОВ Игорь, КЧР апрокуратура йгьи МВД ргIащтийыгIвчва, хIреспублика агородкви арайонкви рхъадаква. Апарламент апны аполитика партияква рфракцияква йрылу а-Конституция йаларцIуш апсахраква рыхъазла ргвгIанаграква рхIватI. КЧР АуагIа Айззара (а-Парламент) а-Председатель ИВАНОВ Александр Россия а-Конституция гIаншищтара йапхъахауата псахра алацIара шатахъу Путин Владимир йшгIайхIваз, апсахраква ауагIа рбзазара агъьчIвра, зтахъырала йынхауа чкIвыныргIа йрыцкIра, Россия адгьылква датша къральква йрырт шамуаш, анри асабихъи йрыцкIра, датшагьи агIвычIвгIвыс йхвитнагIаква зхчуш ажванахъаква шгIаргыз гIайхIватI. – ХIара Россия а-Конституция йаларцIуш апсахраква хIкъраль атшауацIыхра, ахIбачвагьи асабиквагьи рбзазара агъьчIвра йшырзынхуш гIахIгвынгIвра атахъыпI. Йшспхьадзауала, РФ а-Конституция апсахраква акъральыгIвара рыбагъьара, ауагIа рбзазара агъьчIвра йырзынарху уыспI, – йгIаликIгIатI Иванов Александр. А-Парламент а-Председатель асквш 2020, апрель а 22 а-Конституция псахраква руысла напIщтIыхра шакIвшуш, ауи агIаншара турых магIны шаму гIаликIгIатI. Асессия анхара йалаз адепутат 47-гIвы йрыуата депутат 41-джвы РФ а-Конституция апсахраква алацIарала афедеральна хабзапроект йацыркIтI. Ауи ахабзапроект хIкъраль асубъектква зымгIва рпны йацыркIтI, Путин Владимир мачвы ацIайцIан, а-Конституция суд алапшхырныс йщтитI. Апрель а 22 йакIвшуш ареферендум апны ауагIа а-Конституция йаларцIуш апсахраква йшырзаъу гIадырбуштI.